"Özlərini hərbi sahənin bilicisi sayanlar ermənilərin fətvasına getdilər"

"Odundağ" yüksəkliyinin Azərbaycan ordusunun nəzarətinə keçməsi barədə erməni mətbuatında məlumat yayıldı.

Bir müddət sonra "Odundağ" yüksəkliyinin Azərbaycan ordusunun nəzarətinə keçməsi barədə məlumatı Azərbaycan Respublikası Müdafiə Nazirliyi də təsdiqlədi.

Bununla bağlı hərbi ekspert Üzeyir Cəfərov Ölkə.Az-a danışıb:

"Bu məsələ dünənin və ya bugünün söhbəti deyil. “Odundağ” yüksəkliyi məsələsi xeyli müddət bundan əvvəl baş verib. “Odundağ” yüksəkliyi strateji baxımdan çox önəmli bir yüksəklikdir. Noyanberyan ərazisindən Qazax rayonu və həmsərhəd ərazilər həmişə atəşə tutulurdu. “Odundağ” yüksəkliyinin bizdə olması önəmli və yaxşı haldır. Bir şeyə təəssüfləndim ki, Müdafiə Nazirliyi erməni mətbuatında gedən bu xəbərə rəsmi münasibət bildirdi. Bunun üstündən sakitçiliklə də keçmək olardı. Ona görə ki, dünən Strasburqda Avropa Şurası Parlament Assambleyasında Azərbaycanla, Dağlıq Qarabağla, o cümlədən girovluqda qalan Dilqəm Əsgərov və Şahbaz Quliyevlə, Sərsəng su ambarı ilə bağlı çox önəmli məsələlər müzakirə olunurdu. Çox təəssüflər olsun ki, mətbuatda özlərini hərbi sahənin bilicisi sayanlar erməni mətbuatına istinadən bu xəbəri yaymaqla onların fətvasına getdilər. Bu məlumatı 3 gün sonra da təsdiq etmək olardı. Bu məlumatdan ermənilər geninə-boluna istifadə edib ağır olan daşımızı biraz da başlarına vuracaqlar ki, Azərbaycan az qala Ermənistana hücuma hazırlaşır, silahlar Ermənistana yönəlib, Kollektiv Təhlükəsizlik Müqaviləsi, ATƏT-in Minsk qrupu buna münasibət bildirməlidir. Haqlı olduğumuz halda dəfələrlə bizi haqsız göstərmək istəyiblər.

“Odundağ” yüksəkliyi əvvəldən bizdə idi. Bir müddət idi ki, neytral ərazidə idi. Son zamanlar ermənilərin həyasızlaşmasının nəticəsi olaraq komandanlıq çox doğru və düzgün qərar qəbul edib, o yüksəkliyi bizim nəzarətimiz altına keçirib. Müdafiə Nazirliyinin mətbuat xidməti çox uğursuz bir açıqlama verib, gərək bu açıqlama verilməyə idi. Bu düşmənə mənəvi, psixoloji zərbədir, gəlin unutmayaq ki, bunun xeyli fəsadları da olacaq.

Ötən il Ermənistanın Noyanberyan rayonunundan 3 kənd boşalandan sonra Müdafiə Nazirliyimiz “Odundağ” yüksəkliyində mühəndis istehkamı qurmağa başladı. Bu uzun müddət idi ki, davam edirdi. Ermənilər bu ərəfədə bu məlumatı hiyləgərcəsinə mətbuata sızdırdı".

Qeyd edək ki, Azərbaycan Respublikası Müdafiə Nazirliyinin mətbuat xidməti bildirib ki, həqiqətən həmin yüksəklik əlverişli və əhəmiyyətli olduğu üçün bölmələrimiz tərəfindən nəzarətə götürülüb, taktiki və mühəndis-istehkam baxımından gücləndirilib.

Səxavət Məmməd
Ölkə.Az