\"Prezidentin çağırışlarına diqqət verməyən məmurların aqibəti pis olacaq\"

"Azərbaycanda bir nəfər də olsun toxunulmaz adam yoxdur"

Bu sözləri prezident İlham Əliyev "Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət proqramı"nın icrasının ikinci ilinin yekunlarına həsr olunmuş konfransda çıxışında deyib.

İlham Əliyev konfransda çıxışı zamanı məmurlara çox ciddi xəbərdarlıqlar edib.

Dünənki konfrans barədə millət vəkili Fəzail Ağamalı Ölkə.Az-a danışıb:

"Bundan sonra məmur özbaşınalığının davam etməsi sadəcə olaraq mümkün deyil. Ölkə prezidentinin bir müddət öncə söyləmiş olduğu "hövsələm yoxdur" ifadəsi bu gün konkret addımlarla müşayət olunur. Keçirilən bütün müşavirələrdə ölkə prezidenti bir daha məmurlara xəbərdarlıq etdi.

Azərbaycanda dövlətçiliyə, Azərbaycan xalqına xidmət edən kifayət qədər məmurlarımız var. Ancaq məmurların içərisində Eldar Mahmudov və onun bandasında olanları da var. Son hadisələr də göstərdi ki, ölkə prezidenti heç kimə güzəştə getmək niyyətində deyil. Nümunə və təcrübə ortalıqdadır. Əgər MTN-nin onlarla adamı nəinki vəzifədən uzaqlaşdırılıb, eyni zamanda onlar haqqında cinayət işi açılıbsa, artıq hər bir məmur bunu göz önünə gətirməlidir. Artıq məmurlar öz fəaliyyətlərini yenidən qurmalıdırlar və əminəm ki, quracaqlar. Çünki bunun başqa alternativi yoxdur. Ya bu cür işləmək lazımdır, ya da onları ciddi cəzalar gözləyir.

"Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət proqramı"nın icrasının ikinci ilinin yekunlarına həsr olunmuş həm nazirlərin, həm də icra başçılarının iştirakı ilə konfransda prezident çox ciddi məqamlar üzərində dayandı. Ölkəmizin iqtisadi inkişafını bundan sonra davam etdirmək, sosial proqramları həyata keçirmək üçün əlində, ixtiyarında olduğu prezidentin çıxışlarında birmənalı şəkildə ifadə olundu. Prezident öz çıxışını çox inamlı, çox nikbin notlar üzərində qurmuşdu. Bu cür hallara qarşı öz yaramazlıqlarını davam etdirən, ölkə prezidentinin çağırışlarına diqqət verməyən hər kəsin də nəticədə taleyini yaxşı heç nə gözləmir".

Səxavət Məmməd
Ölkə.Az