Mətn ölçüsü:
  • 100%

Razi Nurullayev: "Azərbaycanda icra başçıları büdcə vəsaitlərini talan etmək üçündürlər"

Rayonlarda icra başçılarının icazəsi olmadan quş da uça bilməz. Vəzifələri satmaq, obyektləri qohumlarının adına keçirmək, dövlət büdcəsindən ayrılan pulları mənimsəyib, rayonun imkanlı şəxslərinə küçələri, parkları təmir etdirmək icra başçılarının əsas işidir.

Bunları Ölkə.az-a verdiyi açıqlamasında AXCP sədri Razi Nurullayev deyib. O, bildirib ki, icra hakimiyyətləri ləğv olunmalıdır.

"İcra başçıları ilə bağlı mənə sual veriləndə mənim tüklərim biz-biz durur, əsəbiləşirəm, psixi drumum tamamilə dəyişir. Çünki icra hakimiyyətləri haqqında mənim fikrim birmənalıdır. İcra hakimiyyətləri birmənalı oaraq ləğv olunmalıdır. Prezident bu addımı nə qədər gec atacaqsa, özü, qurduğu iqtidar, Azərbaycan xalqı ziyan çəkəcək. Çünki icra hakimiyyətləri nə prezidentin yerlərdə verdiyi tapşırıqları yerinə yetirə bilirlər, nə də rayonların inkişafı ilə bağlı addımlar ata bilirlər. Onlar özlərinə varidat yığmaq üçün, yağlı tikələri, yaxşı obyektləri öz altlarına yığırlar, öz qohum-əqrabalarının adlarına özəlləşdirirlər. Öz təcrübəmdə olub, 2000-ci illərin əvvəllərində xarici ekspertlərlə rayonlara səfər etmişdim. 3 rayonun təcrübəsini deyəcəm, onların adlarını çəkməyəcəm, çünki keçmişdə qalıb, artıq o şəxslər icra başçıları deyillər. Onların yanaşmasını gördüm, düşünürəm ki, heç prezident özünü o cür aparmazdı. Xarici ekspertin yanında icra başçısı o cür danışmazdı, o cür oturmazdı, o cür göstəriş verməzdi. Bizimlə gedən sürücüyə benzin pulu təklif etməzdi. Bir icra başçısı var idi, işçilərinə tapşırdı ki, bunların maşınına benzin tökün. Bunu xarici ekspertlərə dedim, onlar çox təəccübləndilər ki, nəyə görə benzin tökməlidirlər? Bu mənim heysiyyatıma toxundu. Onların benzininə ehtiyacımız yox idi, pulumuz da var idi. Bu məsələ çox ciddi şəkildə xarici ekspertlərin heysiyyatına toxundu. Ekspertlərdən biri Kanadadan, biri İsraildən, digəri isə İsveçdən idi. Digər bir rayonda isə icra başçısı ortada dayanıb, məmurlar isə ondan 30-40 metr kənarda dayanırdılar. İcra başçısı məmurları barmağı ilə çağırıb, nə isə deyib, barmağı ilə geri göndərirdi.

İcra başçılarının üzərinə qoyulur ki, onlar rayonun inkişafı ilə mşğul olsunlar, sosial-iqtisadi proqramları yerinə yetirsinlər, zavod, fabrik açsınlar, ancaq onlar kolxoz sədrləridir. Onların savadı yoxdur, icra başçılarının çoxu "Biləcəridən o yana" getməyib. Bir çox icra başçısını Romaya, Berlinə, Drezdenə, Londona göndərirlər ki, oradakı memarlığı, şəhərsalma mədəniyyətini, ab-havanı görüb, gəlib rayonda tətbiq etsin. İcra başçıları isə dil bilmir, gedib turist kimi baxıb gəlirlər. İcra başçıları bunu bacara bilməz, onlar beynəlxalq korporasiyaları, bankları tanımırlar, xaricilərlə söhbət etməyi bilmirlər, xarici ölkələrin səfirlərini rayonlara dəvət edib, onların iş adamlarını rayona investisiya qoymağa dəvət etmirlər. Azərbaycanda icra başçıları heç nə bacarmır. İcra başçıları sanki büdcə vəsaitlərini talan etmək üçündürlər.

Bu məsələdən çıxış yolu, icra hakimiyyətləri hətta ləğv olunmasa da, oraya xaricdə oxumuş, təcrübəli, inkişaf etmiş ölkələrin investisiya şəraitini, xarici dilləri yaxşı bilən, əhali ilə rəftar etmyi bacaran gənc kadrlar təyin olunmalıdır. Onlar 1-2 ilə rayonda nizam-intizam, düzən yaradandan sonra prezidentin nümayəndəsi kimi rayonlarda qalır, icra hakimiyyətlərinin səlahiyyətləri bələdiyyələrə ötürülür. İcra hakimiyyətlərinin ləğvi tamamilə labüddür və lazımdır. İcra başçıları nəinki əhali ilə rəftarı, heç yemək süfrəsində əyləşmək qaydasını belə bilmirlər. İcra başçıları tanıyıram ki, ətrafındakılarla söyüşlə danışırlar, barmaqlarının işarəsi ilə çağırırlar, bəzən döyürlər. İcra başçıları özlərini kral kimi aparırlar. Təbii ki, bu insanların gözündən qaçmır.

Rayonlarda başlayan sosial etirazlar, iğtişaşlar, narazılıqlar məhz icra hakimiyyətlərinin fərsiz faliyyəti nəticəsində üzə çıxır. Nə olsun ki, bunu bizim, müxalifətin üzərinə yıxırlar ki, müxalifət nümayəndələri yerlərdə insanları iğtişaşa çağırır. Sonda da həbs olunan günahsız müxalifət nümayəndələri olurlar. Ancaq əslində bunun günahkarı icra başçıları, onların yarıtmaz siyasətləri və özlərini kolxoz sədri kimi aparmalarıdır. İcra başçılarında kolxoz sədri təfəkküründən ayrı təfəkkür görməmişəm və çətin ki, bundan sonra da görək".

Ölkə.Az AXCP sədri Razi Nurullayevin bu məsələ ilə bağlı videomüsahibəsini də siz təqdim edir:

Səxavət Məmməd
Ölkə.Az