Həftənin icmalı
"Kiçik çilə" niyə soyuq olur?
25.01.2016
Rəvayətə görə, çilələr qışın oğullarıdır. Çilələr həm də Novruza qədərki qışdan çıxmaq mərhələləri hesab edilir. Daha çox davam edən “Böyük çilə” 40, “Kiçik çilə” 20 gün, bundan sonra isə 1 ay davam edən "boz ay" olur.
Ölkə.Az xəbər verir ki, Azərbaycan Milli Elmlər Akademiyasının Folklor İnstitutundan Trend-ə verilən məlumata görə, Azərbaycanın bəzi bölgələrində böyük çilədən çıxıb kiçik çiləyə keçəndə müəyyən mərasimlər keçirilir. Belə mərasimlərdən biri “çilə qarpızı” ilə əlaqədardır. Adətə görə, xüsusi yerlərdə yaydan saxlanılan "çilə qarpızları" kəsilir və ailənin bütün üzvləri bu təamdan dadır.
Kiçik çilənin birinci ongünlüyündə isə Xıdır Nəbi bayramı keçirilir: “Xıdır Nəbi bərəkət rəmzidir. Xalqın istəyi odur ki, qışdan çıxandan sonra yeni il onlar üçün bolluq və bərəkət gətirsin. Ona görə də Xıdır Nəbi bayramında xüsusi mərasimlər keçirilir: qovurğa qovrulur, qovut çəkilir və bu qovut qaba çəkilib bir tərəfə qoyulur ki, Xıdır Nəbi gəlib ona əlini çəksin və həmin il bolluq olsun”.
Aeroportda viza mərkəzləri açılacaq
25.01.2016
Azərbaycana bütün beynəlxalq hava limanlarından gələn sərnişinlər üçün fevralın 1-dən etibarən viza rəsmiləşdirmə mərkəzləri fəaliyyətə başlayacaq.
“Azərbaycan Hava Yolları” QSC-dən verilən xəbərə görə, bu mərkəzlərdə Fars Körfəzi (Qətər, Oman, Səudiyyə Ərəbistanı, Bəhreyn, Küveyt) ölkələrinin, eyni zamanda Yaponiya, Çin, Cənubi Koreya, Malayziya və Sinqapur vətəndaşları ölkədə 30 günlük birdəfəlik vizanı rəsmiləşdirə biləcəklər.
Nardaranda saxlanılan daha 3 nəfər azadlığa buraxılıb
25.01.2016
Nardaranda inzibati qaydada həbs olunan daha 3 nəfər qəsəbə sakini azadlığa buraxılıb.
Ölkə.Az xəbər verir ki, bu barədə Trend-ə Nardaran sakinləri məlumat verib.
Məlumatda bildirilir ki, Nardaran hadisələrindən sonra ümumiyyətlə inzibati qaydada həbs olunan şəxslərin hamısının həbs müddəti başa çatıb və onlar azadlığa buraxılıb.
Tanınmış videobloger Hüseyn Əzizoğlu azadlığa çıxdı — FOTO
25.01.2016
Tanınmış videobloger Hüseyn Əzizoğlu azadlığa çıxıb.
Ölkə.Az xəbər verir ki, bu barədə sosial şəbəkələdə məşhur bloqçunun özü yazıb:
"Hər kəsə salam. Artıq azadlıqdayam. 15 gün əvvəl başıma xoşagəlməz hadisə gəldi. Bir nəfərlə mübahisə edərək, insanların içində onu söyməli oldum. Oda məni 102 polis xidmətinə şikayət etdi. Buna görə də 15 gün həbs olundum. Ona əmin olun ki, həbsimin polis videolarına heç bir adiyyatı yoxdur. Hər şey əladır. 2-3 gün istirahət edim yeni vine'lərlə qarşınızda olacam. Bu arada 8-ci kameradan hamınıza salam var."
Ramiz Mehdiyev sərəncam imzaladı
25.01.2016
Azərbaycan Respublikası Prezidenti Administrasiyasının rəhbəri Ramiz Mehdiyevin sərəncamı ilə Bakı şəhərində “Çoxqütblü dünyaya doğru” IV Qlobal Bakı Forumunun keçirilməsinə dair Tədbirlər Planı təsdiq edilib.
Sərəncamda Tədbirlər Planının icrasına məsul qurumlara Forumla bağlı tədbirlərin yerinə yetirilməsi tapşırılıb.
Qeyd edək ki, “Çoxqütblü dünyaya doğru” IV Qlobal Bakı Forumu martın 10-11-də keçiriləcək.
MTRŞ telekanallara köçürülmüş vəsaiti açıqladı
25.01.201
Milli Televiziya və Radio Şurası (MTRŞ) Azərbaycan prezidentinin 09 sentyabr 2011-ci il tarixli 1709 nömrəli və 04 aprel 2013-cü il tarixli 2830 nömrəli sərəncamına əsasən müvafiq olaraq ayrılmış 5 və 6 milyon manat vəsaitdən serial çəkilişi üçün kanallara köçürülmüş vəsaiti açıqlayıb.
Ölkə.Az xəbər verir ki, MTRŞ-nin Aparatından APA-ya verilən xəbərə görə, 09 sentyabr 2011-ci il tarixli 1709 nömrəli sərəncamına əsasən ayrılan 5 milyon manatdan ATV kanalının hesabına “Sirr”, “Pərvanələrin rəqsi”, “Onu bağışlamaq olarmı” serialının çəkilişi üçün ümumilikdə 1 milyon manat, ANS kanalına “Xoca” və “Ağabəyovlar” serialının çəkilişi üçün ümumilikdə 800 min manat, “Lider” kanalına “Dostlar”, “Satko”, “Muradına çatan günəş” seriallarının çəkilişi üçün ümumilikdə 800 min manat, “Space” kanalına “Cənnətə səyahət”, “Bir kəndin Sevinci” seriallarının çəkilişi üçün ümumilikdə 800 min manat, “Xəzər” kanalına “Aramızda qalsın”, “Qaynana”, “Ayrılıq son deyil”, “Həyat varsa”, “Sonun başlanğıcı” seriallarının çəkilişi üçün ümumilikdə 800 min manat, İctimai televiziyaya “Qarabağ”, “Dalan” , “Döngələr”, “Qaranlıqlar çiçəyi”, “Xoş təsadüf” seriallarının çəkilişi üçün isə ümumilikdə 800 min manat vəsait köçürülüb.
Hərbi həkimlər də gücləndirilmiş iş rejiminə keçdi
25.01.2016
"Bu günədək şəxsi heyətin sağlamlığı ilə bağlı heç bir ciddi narahatlıq qeydə alınmayıb. Mövsümi kəskin respirator xəstəliklərin yayılması ehtimalını nəzərə alaraq, eləcə də hərbi hissələrin şəxsi heyətinin kənardan bu kimi xəstəliklərə yoluxmasının qarşısını almaq məqsədilə müdafiə nazirinin əmrinə əsasən qabaqlayıcı tədbirlər görülür".
Ölkə.Az-ın xəbərinə görə, bu barədə Müdafiə Nazirliyinin mətbuat xidmətinin yaydığı məlumatda bildirilir. Məlumatda deyilir ki, bütün şəxsi heyət yüksək kalorili ərzaq payı, yarıvitaminlərlə təmin olunub, hərbi hissələrə normadan əlavə dərman preparatları, profilaktiki və dezinfeksiyaedici vasitələr çatdırılıb və ehtiyatı mövcuddur.
Azərbaycan Ordusu strateji yüksəkliyi ələ keçirdi
25.01.2016
Azərbaycan Müdafiə Nazirliyi“Odundağ” yüksəkliyinin ordumuzun nəzarətinə keçməsi xəbərini təsdiqləyib.
Müdafiə Nazirliyinin mətbuat xidmətindən Ölkə.Az-a verilən məlumatda qeyd olunur ki, bəzi elektron kütləvi informasiya vasitələrində Ermənistandakı mənbələrə istinadən Azərbaycanın Qazax rayonu ilə Ermənistanın Noyemberyan yaşayış məntəqəsi arasındakı ərazidə yerləşən “Odundağ” yüksəkliyinin Azərbaycan ordusunun nəzarətinə keçməsi və ətraf erməni ərazilərinin asanlıqla müşahidə edilməsi barədə məlumat yayılıb: “Faktı təsdiq edərək bildiririk ki, həqiqətən həmin yüksəklik əlverişli və əhəmiyyətli olduğu üçün bölmələrimiz tərəfindən nəzarətə götürülüb, taktiki və mühəndis-istehkam baxımından gücləndirilib”.
Azərbaycanda müdafiə sənayesi üzrə istehsal həcmi artıb
25.01.2016
Müdafiə Sənayesi Nazirliyində (MSN) 2015-ci ilin yekunlarına həsr olunmuş səyyar kollegiya iclası keçirilib.
Ölkə.Az nazirliyin saytına istinadən verdiyi məlumata görə, iclası açan müdafiə sənayesi naziri Y.Camalov 2015-ci ilin MSN üçün də yaddaqalan il olduğunu bildirib. Qeyd edib ki, ötən ay yaradılmasının 10 illiyi qeyd olunan Müdafiə Sənayesi Nazirliyinin müəssisələrində müasir növ atıcı silahlar, döyüş sursatları, mühəndis texniki vasitələri və s. müdafiə təyinatlı məmulatlar istehsal edilərək Silahlı Qüvvələrə təhvil verilib. Məmulatların yaradılması istiqamətində aparılan məqsədyönlü işlər nəticəsində yüzlərlə məhsulun mənimsənilməsinə və silahlanmaya qəbul edilməsinə nail olunub. Nəticədə 2015-ci ilin yekunlarına görə istehsal olunmuş müdafiə təyinatlı məmulatların həcmi ötən illərlə müqayisədə dəfələrlə artıb.
“Uşaq pulu” da artırıldı
25.01.2016
Azərbaycan Prezidenti İlham Əliyev uşağa qulluğa görə qismən ödənişli sosial məzuniyyətdə olanlara verilən müavinətin artırılması haqqında sərəncam imzalayıb.
Sərəncamda deyilir:
1. 2016-cı il fevralın 1-dən bir yaş yarımadək uşağa qulluğa görə qismən ödənişli sosial məzuniyyətdə olanlara verilən aylıq müavinətin məbləği 40 manat, bir yaş yarımdan üç yaşınadək uşağa qulluğa görə isə həmin müavinətin məbləği 25 manat miqdarında müəyyən edilsin.
2. Azərbaycan Respublikasının Nazirlər Kabineti bu Sərəncamdan irəli gələn məsələləri həll etsin.
3. “Uşağa qulluğa görə qismən ödənişli sosial məzuniyyətdə olanlara verilən müavinətin məbləğinin artırılması haqqında” Azərbaycan Respublikası Prezidentinin 2013-cü il 23 avqust tarixli 3082 nömrəli Sərəncamının (Azərbaycan Respublikasının Qanunvericilik Toplusu, 2013, № 8, maddə 962) 1-ci hissəsi ləğv edilsin.
Azərbaycanda vulkan püskürdü
26.01.2016
Azərbaycanın ən böyük vulkanlarından biri püskürüb
Azərbaycanın Hacıqabul rayonundakı Axtarma-Paşalı vulkanı püskürüb.
Bu barədə APA-nın Mil-Muğan bürosuna Hacıqabul rayonu Udulu kənd icra nümayəndəliyindən məlumat verilib. Məlumatda bildirilib ki, püskürmə bu gecə saat 03.00 radələrində qeydə alınıb və səhər saatlarına qədər davam edib.
Daşaltı əməliyyatından 24 il ötür...
26.01.2016
Daşaltı kəndinin erməni silahlı birləşmələrindən təmizlənməsi məqsədilə keçirilən əməliyyatdan 24 il ötür.
Ölkə.Az xəbər verir ki, Daşaltı əməliyyatı hərb tariximizə I Qarabağ müharibəsində Azərbaycan Ordusunun ağır məğlubiyyətə uğraması ilə yanaşı, ordumuzun qəhrəmanlığı və şücaəti ilə də düşüb.
Daşaltı əməliyyatı 1992-ci il, yanvarın 25-də saat 20:00-da başlanıb, yanvarın 26-da gecə uğursuzluqla başa çatıb.
Şuşa yaxınlığında yerləşən, Əsgəran rayonunun Daşaltı kəndinin erməni yaraqlılarından azad edilməsi məqsədilə keçirilən əməliyyata sabiq müdafiə naziri, general-mayor Tacəddin Mehdiyev birbaşa rəhbərlik edib.
Müdafiə Nazirliyi: "Düşmən qorxu içərisindədir"
26.01.2016
Azərbaycan Müdafiə Nazirliyi cəbhədə bizə məxsus diversiya qrupunun qarşı tərəfə keçməyə cəhd etməsi barədə Ermənistan Müdafiə Nazirliyinin yaydığı məlumatları təkzib edib.
Müdafiə Nazirliyinin mətbuat xidmətindən Ölkə.Az-a verilən məlumatda qeyd olunur ki, Silahlı Qüvvələrimizin bölmələri heç bir fəaliyyət həyata keçirməyib: “Düşmən o qədər qorxu, səksəkə içərisindədir ki, hər tərəfdə gözünə Azərbaycan əsgəri görünür”.
Qeyd edək ki, Ermənistan Müdafiə Nazirliyinin mətbuat xidməti bu gün səhər saat 04.00 radələrində guya Azərbaycan diversiya qrupunun qarşı tərəfə keçməyə cəhd edib və cəhdin qarşısı alınıb.
Vidadi Zeynalovun həbs müddəti uzadıldı
26.01.2016
Rabitə və Yüksək Texnologiyalar Nazirliyinin sabiq Aparat rəhbəri, hazırda həbsdə olan Vidadi Zeynalovun həbs müddəti uzadlılıb.
Ölkə.Az-ın xəbərinə görə, bu barədə Trend-ə V.Zeynalovun vəkili Muğan Əliyev məlumat verib.
Vəkil bildirib ki, V.Zeynalov barəsində seçilmiş 3 aylıq həbs qətimkan tədbirinin müddəti yanvarın 26-da başa çatmalı idi. Məhkəmənin qərarı ilə V.Zeynalov barəsində seçilmiş həbs müddəti fevralın 21-nə qədər uzadılıb.
V. Zeynalovla mütəmadi görüşdüyünü deyən vəkil qeyd edib ki, müvəkkilinin həbs müddətinin uzadılmasından apelyasiya şikayəti vermək fikri yoxdur.
Azərbaycanda universitetlər birləşdirilir
26.01.2016
Gələcəkdə bəzi ali təhsil müəssisələrinin birləşdirilməsi prosesinin davam etdiriləcəyi istisna deyil".
Ölkə.Az "Report"-a istinadən xəbər verir ki, bunu Təhsil Nazirinin müavini Ceyhun Bayramov deyib. C. Bayramov onu da xatırladıb ki, bu proses çərçivəsində ötən il Azərbaycan Müəllimlər İnstitutu Azərbaycan Dövlət Pedaqoji universitetinə birləşdirilib:
"Həmçinin, Müəllimlər İnstitutunun bir neçə filialları bağlanıb. Mingəçevir Müəllimlər İnstitutu ilə Mingəçevir Politexnik İnstitutu Mingəçevir Dövlət Universiteti adı altında birləşdirilib".
Azərbaycanda uşaqlara bu adların qoyulmasının qarşısı alınıb
26.01.2016
“Yanvar ayı ərzində “ASAN Xidmət” mərkəzlərindən uşaqlara qoyulan adlarla bağlı bizə 20-yə yaxın müraciət daxil olub”.
Ölkə.Az xəbər verir ki, bunu APA-ya açıqlamasındaNazirlər Kabineti yanında Terminologiya Komissiyasının sədr müavini Sayalı Sadıqova deyib.
O bildirib ki, “ASAN Xidmət” mərkəzlərindən daxil olan müraciətlər zamanı valideynlərin yeni doğulan körpələrinə “Arsen”, “Mutluay”, “Mutlugün”, “Peşiman” və “Lumu” adlarını qoymaq istədikləri məlum olub.
Sədr müavinin sözlərinə görə, valideynlərə bu adların uşaqlara verilməsinin qanuna müvafiq olmadığı izah olunub: “Nəticədə uşaqlara həmin adlar qoyulmadı”.
Azərbaycanlı deputat AŞPA-nın qurumuna sədr seçildi
26.01.2016
Azərbaycanın Avropa Şurası Parlament Assambleyasındakı (AŞPA) nümayəndə heyətinin üzvü Sahibə Qafarova AŞPA-nın Miqrasiya, qaçqınlar və məcburi köçkünlər üzrə Komitəsinin sədri seçilib.
APA-nın Avropa müxbirinin verdiyi məlumata görə, o, bu vəzifədə fransalı deputat Tyeri Marianini əvəz edib.
Bakıda NATO-nun təlim kursu başlayıb
26.01.2016
Azərbaycan Respublikası Müdafiə Nazirliyinin NATO ilə 2016-ci il üçün Fərdi Tərəfdaşlıq üzrə Əməkdaşlıq Proqramına əsasən yanvarın 26-dan Bakıda Müttəfiq Dəniz Qüvvələrinin Qərargah rəisi vitse-admiral Corco Latsionun rəhbərlik etdiyi Mobil Təlim Qrupu tərəfindən “Hərbi Dəniz Qüvvələri standartları” mövzusunda təlim kursu başlayıb.
Bu barədə Ölkə.Az-a Müdadiə Nazirliyinin mətbuat xidmətindən məlumat verilib.
Regionların inkişafına 3,6 milyard xərclənib
26.01.2016
2015-ci ildə Azərbaycan regionlarının inkişafına bütün mənbələr hesabına 3,6 milyard manat vəsait yönəldilib.
Ölkə.Az-ın məlumatına görə, bunu iqtisadiyyat naziri Şahin Mustafayev Heydər Əliyev Mərkəzində “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın reallaşdırılmasının ikinci ilinin yekunlarına həsr edilmiş konfransda deyib.
Onun sözlərinə görə, il ərzində 400 kilometrdən artıq ölkə və yerli əhəmiyyətli avtomobil yolu, 12 yeni körpü və yol ötürücüləri tikilib və ya təmir olunub: "Tapşırığınıza əsasən kənd yollarının tikintisi davam etdirilib, əhalisi 351 min nəfər olan 245 yaşayış məntəqəsini birləşdirən 590 kilometrdən artıq kənd yolu çəkilib.
Son 10 ildə Azərbaycanda çovğun olma halları artıb
27.01.2016
Son 10 ildə Azərbaycanda, xüsusilə Bakıda və Abşeron yarımadasında çovğunların baş verməsi halları və intensivliyi artıb.
Azərbaycan Milli Elmlər Akademiyası Coğrafiya İnstitutundan verilən məlumata görə, Bakıda və Abşeron yarımadasında küləyin sürəti də artıb: "Covğunların baş vermə intensivliyinin və küləyin sürətinin artmasının səbəbi dünyada baş verən iqlim dəyişiklikləri ilə izah edilir. Azərbaycanda çovğunlar daha çox ölkənin şərq hissəsində, yəni Xəzər dənizi sahili boyunca baş verir. Ancaq güclü küləklər ölkənin qərb hissəsində də müşahidə edilir".
Cavid Hüseynov azadlığa çıxa bilmədi
27.01.2016
Bu gün Səbail rayon Məhkəməsində futbolçu Cavid Hüseynovun cinayət işi üzrə keçirilən məhkəmə prosesində müdafiə tərəfinin vəsatətləri təmin olunmayıb.
Ölkə.Az-ın APA-ya istinadən verdiyi məlumatına görə, hakim Elmar Rəhimovun sədrlik etdiyi hazırlıq iclasında müşavirədən sonra vəsatətlərin təmin olunmadığı elan edilib.
Məhkəmənin baxış iclası fevralın 10-na təyin edilib.
Azərbaycanda bağlanan iş yerlərinin sayı açıqlandı
27.01.2016
Ötən il 84 mini daimi olmaqla 110 min yeni iş yeri açılıb, eyni zamanda, müxtəlif səbəblərdən 40 min iş yeri bağlanıb.
Bu barədə İqtisadiyyat naziri Şahin Mustafayev bildirib.
“Qarşıdakı illərdə məşğulluğun artırılması məqsədilə regionlarda ənənəvi istehsal sahələrinin, o cümlədən pambıqçılığın, tütünçülüyün, eləcə də xalçaçılığın və digər sənətkarlıq növlərinin inkişaf etdirilməsi üçün müvafiq tədbirlər görüləcək.
İnvestisiyaların təşviqi və qeyri-neft məhsullarının ixracının stimullaşdırılması ilə bağlı qəbul etdiyiniz qərarlar sözsüz ki, sahibkarlığın daha da inkişafına və xarici investisiyaların cəlb edilməsinə, qeyri-neft ixracının artırılmasına səbəb olacaq və bununla da həm regionların, həm də ümumilikdə qeyri-neft sektorunun inkişafına güclü təkan verəcək.
Bir ildə 300 uşaq ürəyindən əməliyyat olunub
27.01.2016
M.A.Topçubaşov adına Elmi-Cərrahiyyə Mərkəzinin Uşaq Cərrahiyyə Mərkəzində 2011-ci ildən indiyədək mindən artıq uşaq ürək əməliyyatı edilib.
Səhiyyə Nazirliyinin mətbuat xidmətindən verilən məlumata görə, bu əməliyyatların 100-ü qapalı, qalanları isə açıq ürək əməliyyatları olub. Mərkəzdə uşaqların kardiocərrahiyyə əməliyyatları müvafiq növbə əsasında həyata keçirilir. Aparılan əməliyyatlar beynəlxalq norma və standartlar səviyyəsindədir. Bütün əməliyyatların təchizatı tamamilə dövlət hesabına, ödənişsiz həyata keçirilir.
Mərkəzdə həyata keçirilən uşaq ürək əməliyyatlarının sayı artır. Əgər fəaliyyətə başladığı ildə burada 72 uşaq əməliyyat olunmuşdusa, 2015-ci ildə bu göstərici 300-ü aşıb.
TQDK-dan abituriyentlərə müraciət
28.01.2016
"Son vaxtlar müəyyən qüvvələr Tələbə Qəbulu üzrə Dövlət Komissiyasının müxtəlif nəşrlərinin, o cümlədən test kitabları, dərs vəsaitləri və test toplularını qeyri-qanuni yolla çap etdirərək Bakı şəhərində, ölkənin digər şəhər və rayonlarında satışını təşkil etməkdə fəallaşıblar".
Bu barədə Ölkə.Az-a TQDK-dan bildirilib.
Məlumata görə, saxta nəşrlərdə ciddi elmi-metodiki səhvlərə yol verilir, materialların məzmunu təhrif edilir və ya bunlar köhnəlmiş olur, yeni qəbul və tədris proqramlarına uyğun gəlmir. Belə ki, çox vaxt saxta nəşrlərdə köhnəlmiş, aktuallığını itirmiş və ya istifadədən çıxarılmış materiallar yenidən çap edilərək satışa çıxarılır.
Məcburi köçkünlərin geri dönməsi ilə bağlı qanun layihəsi hazırlanır
28.01.2016
Azərbaycan Milli Məclisində “Qaçqın və köçkünlərin repatriasiyası haqqında” qanun layihəsi hazırlanıb.
Ölkə.Az APA-ya istinadən xəbər verir ki, bu barədə parlamentin Əmək və sosial siyasət komitəsinin bu gün keçirilən iclasında komitə sədri Hadi Rəcəbli bildirib.
O qeyd edib ki, qanun layihəsi müvafiq prosedurlar tamamlandıqdan sonra müzakirəyə çıxarıla bilər.
Binəqədi və Qaradağda yüzlərlə bina, ev söküləcək
28.01.2016
Nazirlər Kabineti Bakı şəhərinin Binəqədi və Qaradağ rayonlarının sosial-iqtisadi inkişafının sürətləndirilməsinə dair əlavə tədbirlər barədə qərar verib.
Ölkə.Az APA-ya istinadən xəbər verir ki, qərara əsasən Bakı şəhəri Binəqədi Rayon İcra Hakimiyyəti və Bakı şəhəri Qaradağ Rayon İcra Hakimiyyəti 5 il müddətinə mülkü, mənzil, şəhərsalma və tikinti qanunvericiliklərinin tələblərinə əməl etməklə, şəhərin ümumi görünüşünə xələl gətirən, qəzalı vəziyyətdə olan və mövcud şəhərsalma normalarına cavab verməyən Binəqədi rayonu üzrə 1247 ailə yaşayan 49 çoxmənzilli yaşayış binasının, həmçinin Biləcəri bələdiyyəsi ərazisində yeraltı qaz sızması aşkar olunmuş zonadakı 166 fərdi yaşayış evinin və Qaradağ rayonunun Lökbatan, Sahil, Puta, Qızıldaş və Ələt qəsəbələrində XIX əsrin sonları və ötən əsrin əvvəllərində tikilmiş, 10 960 nəfər yaşayan 274 qamış və taxta yaşayış binalarının, habelə Binəqədi və Qaradağ rayonları ərazisində yaşayış üçün yararsız olan digər binaların, sosial və digər təyinatlı qeyri-yaşayış obyektlərinin sökülməsini və yenidən qurulmasını, ərazi və ərazi hissələrinin müfəssəl planlarının hazırlanmasını və təsdiqini, habelə yeni tikiləcək yaşayış binalarının və qeyri-yaşayış obyektlərinin layihələrinə razılığın, tikintiyə və tikinti obyektinin istismarına icazənin verilməsini, həmçinin bu məqsədlə dövlət mülkiyyətində olan torpaqların daimi istifadəyə və icarəyə verilməsini təmin etməlidir.
Casusluq edən azərbaycanlı həbs olundu — FOTO
28.01.2016
Azərbaycan Dövlət Təhlükəsizliyi Xidməti (DTX) xarici ölkəyə casusluq edən Azərbaycan vətəndaşını həbs edib.
DTX-nin İctimai əlaqələr şöbəsindən Ölkə.Az-a daxil olan məlumatda bildirilib ki, xidmətin həyata keçirdiyi istintaq-əməliyyat tədbirləri nəticəsində Azərbaycan Respublikasının vətəndaşı Əhədov İnqilab Xəlil oğlunun xarici xüsusi xidmət orqanı əməkdaşları tərəfindən məxfi əməkdaşlığa cəlb edilərək 2011-ci ildən etibarən mütəmadi olaraq həmin orqan tərəfindən verilən tapşırıqları yerinə yetirməsi və Azərbaycan Respublikasının dövlət təhlükəsizliyi zərərinə casusluq edərək dövlətə xəyanət etməsinə əsaslı şübhələr müəyyən edilib.
Azərbaycan bütün MDB ölkələrini qabaqladı
28.01.2016
Azərbaycanın Ekoloji Effektivlik İndeksi reytinqi üzrə göstəricisi yüksəlib.
Ekologiya və Təbii Sərvətlər Nazirliyinin mətbuat xidmətindən Ölkə.Az-a verilən məlumata görə, ABŞ-ın Yel və Kolumbiya universitetləri tərəfindən hazırlanan Ekoloji Effektivlik İndeksi reytinqində Azərbaycan son 10 ildəki göstəricilərini 18,1 faiz yaxşılaşdıraraq 180 ölkə arasında 31-ci sırada yer alıb.
Rusiyada borca görə 2 yaşlı azərbaycanlı uşağı "yandırdılar"
29.01.2016
"40 min rublu qaytarmasam beş gün ərzində evimi yandıracaqlarını yazmışdılar"
Rusiyanın Ulyanovsk vilayətində azərbaycanlının ailəsinə qarşı qəddar cinayət törədilib.
Ölkə.Az APA-ya istinadən xəbər verir ki, yanvarın 27-də Ulyanovskda 45 yaşlı şəxs azərbaycanlı iş adamının evinə "molotov kokteyli" atıb. Nəticədə evdə olan iki yaşlı körpə uşaq üz və çiyin nahiyəsindən ağır yanıq xəsarətləri alıb.
"Avis" apteklər şəbəkəsinin sahibi tutuldu
29.01.2016
Bakıda geniş aptek şəbəkəsinə malik olan "Avis" Tibbi Marketlərinin direktoru Elmir Məhərov həbs olunub.
Ölkə.Az "Report"a istinadən xəbər verir ki, “Avis” apteklərinin sahibi ötən gün Baş prokuror yanında Korrupsiyaya qarşı Mübarizə Baş İdarəsinin əməkdaşları tərəfindən saxlanılıb. Bu gün Binəqədi Rayon Məhkəməsində Elmir Məhərov barəsində həbs qətimkan tədbirinin seçiləcəyi gözlənilir.
Qeyd edək ki, "Avis" Tibbi Marketlər şəbəkəsi Azərbaycanda fəaliyyətə 1998-ci ilin yanvar ayından başlayıb. Həmin ildə şəbəkənin ilk şöbəsi olan “İstanbul” apteki açılıb. 8 il ərzində isə şirkət Bakıda 10 aptek yaradıb.
Gürcüstandan Azərbaycana diri heyvanların idxalına — QADAĞA
29.01.2016
Bu gündən Gürcüstandan Azərbaycana diri heyvanların (xırda və iribuynuzlu) idxalına müvəqqəti məhdudiyyət tətbiq edilib.
Bu barədə APA-ya Kənd Təsərrüfatı Nazirliyi yanında Dövlət Baytarlıq Nəzarəti Xidmətinin (DBNX) rəis vəzifəsini müvəqqəti icra edən, rəis müavini Azər Süleymanov məlumat verib.
O bildirib ki, bununla bağlı artıq bu gün DBNX-da müvafiq əmr imzalanıb.
A. Süleymanov qeyd edib ki, Gürcüstanın paytaxtı Tbilisi şəhəri yaxınlığındakı Varketili ərazisində xırda buynuzlu heyvanlar arasında “bulutank” virusu yayılıb: “Ümumilikdə Gürcüstandan Azərbaycana diri heyvanların idxalına müvəqqəti məhdudiyyət tətbiq olunub. Lakin virusun qeydə alındığı ərazidən başqa digər yerlərdən Gürcüstan Baytarlıq Xidmətinin rəyi əsasında heyvan mənşəli məhsullar ölkəyə idxal edilə bilər”.
Azərbaycan əsgəri şəhid oldu
29.01.2016
Müdafi Nazirliyi məlumat yaydı.
Yanvarın 29-da saat 15.00 radələrində Azərbaycan-Ermənistan dövlət sərhəddində düşmən təxribatı nəticəsində hərbi qulluqçumuz əsgər Səfərov Nahid Fikrət oğlu şəhid olub.
Bu barədə Ölkə.Az-a Müdafiə Nazirliyinin mətbuat xidmətindən məlumat verilib.
Müdafiə Nazirliyinin rəhbərliyi şəhidin yaxınlarına və əzizlərinə dərin hüznlə başsağlığı verir və səbr diləyir.
Günəşli” faciəsi ilə bağlı son məlumat — 11 ölü, 19 itkin
29.01.2016
SOCAR 4 dekabr 2015-ci il tarixində “Günəşli” və “Neft Daşları” yataqlarında baş vermiş qəza haqqında məlumat yayıb.
Ölkə.Az xəbər verir ki, məlumatda 4 dekabr 2015-ci il tarixində “Günəşli” yatağında yerləşən 10 saylı Dərin Dəniz Özülündə baş vermiş qəza nəticəsində platformadakı 63 nəfər işçidən 29 yanvar 2016-cı il tarixə olan vəziyyətə əsasən 33 nəfər xilas olub, 11 nəfər həlak olub (Əlavə 1) və 19 nəfər (Əlavə 2) itkin düşüb.
Eyni zamanda həmin gün Neft Daşlarında baş vermiş qəza nəticəsində SOCAR-ın Nəqliyyat İdarəsinin 3 nəfər (Əlavə 3) işçisi itkin düşüb.
“Günəşli” yatağından təxliyə edilmiş işçilərə lazımi tibbi yardım göstərılib, bir nəfər isə - Ələkbərov Bəxtiyar Söhrab oğlu yanıq xəsərəti ilə Əziz Əliyev adına Cərrahiyyə Klinikasının Yanıq Mərkəzində müalicə alır.
Cəbhə xəttində gərginlik
30.01.2016
Erməni silahlı bölmələri cəbhənin müxtəlif istiqamətlərində iriçaplı pulemyotlardan da istifadə etməklə sutka ərzində atəşkəs rejimini ümumilikdə 128 dəfə pozub.
Ölkə.Az-ın Müdafiə Nazirliyinin saytına istinadən verdiyi məlumata görə, Ermənistan Respublikası İcevan rayonunun Berkaber, Noyemberyan rayonunun Voskevan kəndlərində yerləşən mövqelərdən Qazax rayonunun Qızılhacılı, Fərəhli kəndlərində, Krasnoselsk rayonu ərazisindəki adsız yüksəkliklərdə yerləşən mövqelərdən Gədəbəy rayonu ərazisindəki adsız yüksəkliklərdə yerləşən mövqelərimiz atəşə tutulub.
