Quran ayələrində Azərbaycan və türklük
Yanvar ayının 30-da "Oğuz" Müstəqil Araşdırmaçılar Qrupunun təşkilatçılığı ilə “Dini-səmavi mətnlərdə Azərbaycan” mövzusunda MQF Bakı QHT Resurs və Təlim Mərkəzində dəyirmi masa keçirilib.
Ölkə.Az xəbər verir ki, tədbiri “Oğuz” MAQ rəhbəri Vüqar Zifəroğlu açdı.O, bildirdi ki, rəhbərli etdiyi fikir mərkəzi mütəmadi şəkildə milli kimliyimiz və mənəvi dəyərlərimizin təbliğatı ilə bağlı müxtəlif mövzularda tədbirlər təşkil edir və bu dəyirmi masa da onlardan biridir. Azərbaycanın zəngin mənəvi irsin daşıyıcısı olan dəyərlər sisteminə malik olduğunu bildirən Zifəroğlu, bununla əlaqədar dini mətnlərdə istinadlar tapmaq mümkün olduğunu bildirdi. İstər Tövrat, istər Zəbur və İncildə tarixi keçmişimizlə bağlı bu cür qeydlər kifayət qədərdir. İslam dininin müqəddəs kitabı olan Quranda isə Azərbaycanla bağlı olan bir çox maraqlı məqamlar tapmaq mümkündür və tədbirin keçirilməsində də əsas məqsəd məhz bu məqamlara diqqət çəkməkdir. “Oğuz” MAQ idarə heyətinin üzvü, tədqiqatçı Ceyhun Bayramlı “Quran ayələrində Azərbaycan və türklük” mövzusunda birliyin hazırladığı slaydın əsasında geniş şəkildə çıxış etdi. Ceyhun Bayramlı çıxışında vurğuladı ki, Quran tarixşünaslığına yeni baxış sərgilənməlidir. Qurani-Kərimdə qeyd olunmuş tarixi hadisələrlə bağlı məlumatlar da, bəzi din xadimlərinin fikirlərinin əksinə olaraq, təkcə ərəblərin keçmişini və Ərəbistan yarımadasını deyil, Yer kürəsinin qədim dövr insanları yaşamış bir çox məkanlarını əhatə etməkdədir. O qeyd etdi ki, dinimizin müqəddəs kitabında Azərbaycanla bağlı bir sıra qeydlər var. Daha sonra tədqiqatçı Musa ilə Xizirin görüşdükləri məkan, Quranda adı keçən Ərrəs əhli, Səba eli və Bilqeys qissəsi, Quranda və eləcə də digər səmavi kitablarda adı çəkilən Mədyən eli,
Zülqərneyn səddi, Ad qövmü barədə geniş məlumat verərək, onların Azərbaycanla bağlılığına diqqət çəkdi. Çıxış və slayd təqdimatından sonra qonaqların da iştirakı ilə mövzu ilə bağlı fikir mübadiləsi aparıldı.
