ASAN könüllüləri TQDK-nın imtahanlarına nəzarət edəcək
"Bu ildən ASAN Xidmətin könüllüləri Azərbaycanda keçirilən imtahan prosesində nəzarətçi qismində iştirak edəcəklər".
Bunu Tələbə Qəbulu üzrə Dövlət Komissiyasının nəzarətçi müəllimlərinin mükafatlandırılmasına həsr olunan tədbirdə komissiyanın sədri Məleykə Abbaszadə deyib. Onun sözlərinə görə, bununla əlaqədar ASAN Xidmətlə saziş imzalanacaq. Belə ki, onlar nəzarətçi müəllimlərin yanında köməkçi qismində iştirak edəcəklər.
M.Abbaszadə bildirib ki, ötən il 600 mindən çox şəxs qəbul imtahanlarda iştirak edib: "Komissiya işini elə qurub ki, ictimaiyyət nümayəndələri imtahanlarda iştirak edə bilsinlər. İmtahan prosesi başa çatdıqdan sonra biz ən yaxşı müəllimləri seçirik. Bir neçə ildir ki, nəzarətçilərin elektron qeydiyyatı sistemi yaradılıb".
M. Abbaszadə əlavə edib ki, hazırda TQDK-nın 15 minə yaxın nəzarətçisi var: “Hazırda təsdiq edilmiş qrafikə uyğun olaraq seminar məşğələlər paytaxtda və regionlarda keçirilir. TQDK-nın 1000-ə yaxın imtahan rəhbəri var. Onlar nəzarətçilərin fəaliyyətini yaxından izləyirlər. İlin yekunlarına görə, 766 müəllim yaxşı fəaliyyət göstərib. Onlardan 25-i fəxri fərmanla təltif olunub. Yaxşı müəllimlərin sayına görə Gəncə şəhəri, Binəqədi rayonu fərqlənir”.
Tədbirdə qeyd olunub ki, imtahanlarda köçürmə halları ildən-ilə azalır: “Əvvəllər köçürmə halları çox olurdu. Ötən il köçürmə halına görə 112 nəzarətçini bazadan müvəqqəti olaraq uzaqlaşdırmışıq”.
