Ramil Məmmədli: “Azərbaycan vasitəçilik missiyasına israrlı şəkildə başlamalıdır”
“Qərbin Türkiyə-Rusiya arasında hərbi-siyasi gərginliyin dərinləşməsinə canfəşanlıq göstərməsinin səbəbi artıq bəllidir. Ukraynada gözlənilməz duruma düşən qərb, Suriya kartından ustalıqla yararlandı. Cavab addımı kimi Türkiyədən istifadə olundu”.
Bunu Ölkə.Az-a açıqlamasında hərbi-siyasi şərhçi Ramil Məmmədli deyib.
Onun sözlərinə görə, belə görünür ki, NATO Rusiyaya qarşı bütün hərbi-siyasi oyunları bundan sonra Türkiyə üzərindən həyata keçirəcək. Ona görə də Türkiyə ilə Rusiya arasında bütün körpülərin yandırılmasına ciddi cəhdlə çalışılır. Artıq qismən də olsa buna nail olunub.
“Rəsmi Ankaranın Türkiyə Hərbi Hava Qüvvlərinin döyüş hazırlığına gətirilməsi ilə bağlı verdiyi əmr isə çox mətləblərdən xəbər verir. Pilotlara verilən əmrdən belə qənaətə gəlmək olur ki, sanki, Türkiyə aktiv hərbi əməliyyatlar situasiyasındadır. Hesab edirəm ki, həm Türkiyə, həm də Rusiya məsələlərə çox emosional yanaşır və regionda hansı partlayışın baş verəcəklərinin fərqinə belə varmırlar. Hər iki ölkə yalnız və yalnız öz nüfuzunu saxlamaq uğrunda mübarizə aparır. Açıq aydın hiss olunur ki, Rusiya şərqdə Sovet dövründəki nüfuzunu artırmağa, Türkiyə isə Osmanlı İmperiyasının tarixi ərazilərində hegemonluğu bərpa eləməyə cəhd edir. Nəticədə isə yerli əhali – müsəlman icması əziyyət çəkir”.
Hərbi-siyasi şərhçinin fikrincə, burada həm Türkiyə, həm də Rusiya bu və ya digər halda ABŞ-ın toruna düşüb: “Ötən ilin ortalarına qədərki Rusiya ilə Türkiyə arasındakı vəziyyəti şərh etdikdə görürük ki, bu ölkələr müttəfiq ola biləcək səviyyədə əməkdaşlıq vəziyyətində idilər. Lakin bu müttəfiqliyə aparan yol bir andaca dağıldı. Demək olar ki, Türkiyə-Rusiya münasibətləri bu gün 1960-cı illərin SSRİ-ABŞ münasibətlərini xatırladır. Vəziyyətdən çıxış yolu isə yalnız tərəflərin masa arxasına oturmasıdır. Bu məsələdə ən maraqlı tərəf isə yenə də yalnız və yalnız Azərbaycandır”.
R. Məmmədli bildirib ki, Azərbaycan israrlı şəkildə tərəflər arasında vasitəçilik missiyasına başlamalıdır. Bu gərginliyin azalmasına da xidmət edəcək: “Hesab edirəm ki, bu məsələ Azərbaycanın milli maraqları qədər vacib olan bir məsələdir”.
