Həftənin icmalı
Milli Məclisdə bir dəqiqəlik sükut
01.02.2016
Azərbaycan Milli Məclisinin 2016-cı il yaz sessiyasında ilk iclası başlayıb.
Spiker Oqtay Əsədov tərəfindən açıq elan edilən sessiya dövlət himninin səsləndirilməsi ilə başlayıb.
Bunun ardınca O. Əsədov akademik Cəlal Əliyevin vəfat etdiyini bildirib, ona Allahdan rəhmət diləyib.
C. Əliyevin xatirəsi bir dəqiqəlik sükutla yad edilib.
Gələn ay əfv gözlənilir
01.02.2016
İnsan Haqları üzrə İşçi Qrupu toplaşacaq.
Ölkə.Az xəbər verir ki, bu haqda Modern.az saytına hüquq müdafiəçisi Novella Cəfəroğlu Novruz bayramı ərəfəsində gözlənilən əfv sərəncamı barədə danışarkən bildirib.
O qeyd edib ki, təxminən 20 gün əvvəl İşçi Qrupunun iclası olub:
“Toplaşdıq, müzakirələr apardıq. Bu ay növbəti iclasımız olacaq”.
N.Cəfəroğlu deyib ki, əvvəlcədən müəyyən olunan siyahıya daha bir neçə yeni məhbusun adının salınması gözlənilir.
Bananlardakı xəstəlik şayiəsi ilə bağlı — Açıqlama
01.02.2016
Artıq bir neçə gündür sosial şəbəkələrdə, tərkibində yoluxucu xəstəlik olan bananların satılması ilə bağlı xəbərlər yayılır.
Ölkə.Az xəbər verir ki, sosial şəbəkələrdə və bəzi saytlarda gedən yazılarda ölkəyə gətirilən bananlara iynə vasitəsilə qan xəstəliyinin yeridilməsi iddia olunur.
Hətta içərisində qırmızı ləkələr olan bananın şəkli bir neçə saytda da yayılıb.
Azad İstehlakçılar Birliyinin (AİB) sədri Eyyub Hüseynov Sputnik-ə açıqlamasında bu xəbərləri inandırıcı hesab etmədiyini deyib
Vergilər nazirinə daha iki müşavir təyin edildi
01.02.2016
Vergilər Nazirliyində növbəti kadr dəyişikliyi baş verib.
Ölkə.Az APA-ya istinadən xəbər verir ki, İlqar İsmayıl oğlu Əhmədov və İlham Əli oğlu Əmirəliyev vergilər nazirinin müavini təyin edilib.
Bununla da, vergilər nazirinin müşavirlərinin sayı 13-ə çatıb.
Akademik Cəlal Əliyev dəfn olundu
01.02.2016
Akademik dəfn olundu.
Azərbaycan Milli Elmlər Akademiyası (AMEA) Rəyasət Heyətinin üzvü, AMEA-nın həqiqi üzvü, biologiya elmləri doktoru Cəlal Əliyev l Fəxri xiyabanda qardaşı akademik Aqil Əliyevin yanında dəfn olunub.
Dəfn mərasimində Prezident Administrasiyasının rəhbəri, akademik Ramiz Mehdiyev, baş nazirin müavini İsmət Abbasov, daxili işlər naziri Ramil Usubov, fövqəladə hallar naziri Kəmaləddin Heydərov, Mərkəzi Seçki Komissiyasının sədri Məzahir Pənahov, SOCAR prezidenti Rövnəq Abdullayev, Qafqaz Müsəlmanları İdarəsinin sədri şeyxülislam Allahşükür Paşazadə, deputatlar, ziyalılar, mərhumun ailə üzvləri iştirak edib.
“Günəşli” qurbanlarına ödənilən müavinətlərin həcmi açıqlandı
01.02.2016
Azərbaycanın Dövlət Neft Şirkəti (SOCAR) “Günəşli” və “Neft Daşları”nda baş vermiş qəza nəticəsində həlak olmuş, itkin düşmüş işçilərin ailələrinə və təxlis olunmuş işçilərə göstərilmiş yardımlar barədə məlumat yayıb.
Şirkətdən Ölkə.Az-a daxil olan məlumatda bildirilir ki, həlak olmuş və itkin düşmüş 33 nəfərin hər birinin ailəsinə aşağıdakı məbləğdə maddi yardım edilib:
- Azərbaycan Respublikası Nazirlər Kabinetinin qərarına əsasən 15000 manat;
- SOCAR-ın vəsaiti hesabına 5000 manat;
- Azərbaycan Həmkarlar İttifaqları Konfederasiyası tərəfindən 1000 manat;
- Azərbaycan Neft və Qaz Sənayesi İşçiləri Həmkarlar İttifaqı Respublika Komitəsi tərəfindən 1000 manat;
2. Qəza nəticəsində 11 nəfər həlak olmuş şəxslərlə bağlı göstərilən yardımlar:
- dəfn mərasimləri SOCAR-ın aidiyyəti struktur bölmələrinin nümayəndələrinin iştirak ilə təmin olunmuş, dəfn və məzar daşlarına çəkilən xərcləri SOCAR-ın vəsaiti hesabına həyata keçirilir;
- hər bir ailəyə 2100 manat maddi yardım verilib;
- hər bir ailəyə Azərbaycan Respublikasının Əmək Məcəlləsinə uyğun olaraq orta əmək haqqının üç misli miqdarında müavinət ödənilib;
Bundan başqa, həlak olanların azyaşlı uşaqları 18 (əyani qaydada təhsil alırsa 23) yaşa çatanadək hər birinə görə - uşaqlara himayəlik edən ailə üzvlərindən birinə - ayda 262,5 manat maddi yardım verilməsi nəzərdə tutulur.
Xalqın ordu üçün yığdığı vəsaitin həcmi açıqlandı
01.02.2016
Azərbaycan Müdafiə Nazirliyi Silahlı Qüvvələrə Yardım Fonduna daxil olan vəsaitin məbləğini açıqlayıb.
Nazirliyin mətbuat xidmətindən Ölkə.Az-a verilən məlumata görə, Silahlı Qüvvələrə Yardım Fonduna 1 fevral 2016-cı il tarixədək 70 milyon 074 min 862 manat, 211 min 791 dollar və 2093 avro vəsait daxil olub.
Silahlı Qüvvələrə Yardım Fondu Azərbaycan Prezidentinin 2002-ci il 17 avqust tarixli, 755 nömrəli fərmanı ilə yaradılıb.
Bu gün gənclər günüdür
02.02.2016
2 fevral ümumrespublika Gənclər günüdür.
Ölkə.Az xəbər verir ki, bu gün 1997-ci ildə prezident Heydər Əliyevin sərəncamı ilə təsdiq olunub.
Ölkəmizdə yaşı 14-dən 29-a qədər olan əhali gənc kateqoriyasına daxil edilir.
Dövlət Statistika Komitəsinin verdiyi məlumata görə, ölkə əhalisinin 31 faizini gənclər təşkil edir.
Onların 49 faizi kişi, 51 faizi isə qadınlardır.
Rabitə Nazirliyində yeni Aparat rəhbəri təyin edildi
02.02.2016
Əli İzzət oğlu Abdullayev Rabitə və Yüksək Texnologiyalar Nazirliyinin aparat rəhbəri vəzifəsinə təyin olunub.
Ölkə.Az 7News.az -a istinadən xəbər verir ki, Ə.Abdullayev 1979-cu ildə anadan olub, Azərbaycan Respublikasının Prezidenti yanında Dövlət İdarəçilik Akademiyasını siyasi idarəetmə, hüquqşünaslıq ixtisasları üzrə bitirib.
Ə.Abdullayev 2001-2006-cı illərdə Əmlak Məsələləri Dövlət Komitəsində Hüquq şöbəsinin müdiri, 2007-ci ildən Hərracların Təşkili üzrə Auksion Mərkəzinin baş direktoru vəzifələrində işləyib.
Dövlət dilinin informasiya bazası yaradılacaq
02.02.2016
Azərbaycanda ilk dəfə olaraq, dövlət dilinin informasiya bazası yaradılacaq.
Ölkə.Az xəbər verir ki, bunu Trend-ə Azərbaycan Milli Elmlər Akademiyasının Dilçilik İnstitutunun direktor müavini Baba Məhərrəmli deyib.
Onun sözlərinə görə, Azərbaycan dilinin informasiya bazası “Azərbaycan dilinin qloballaşma şəraitində zamanın tələblərinə uyğun istifadəsinə və ölkədə dilçiliyin inkişafına dair Dövlət Proqramı”na əsasən yaradılır.
Magistraturaya qəbul imtahanlarının vaxtı açıqlandı
02.02.2016
2016-cı ildə ali təhsil müəssisələrinin magistratura və tibb ixtisaslarının rezidentura səviyyəsinə keçiriləcək imtahanların və tədbirlərin plan-qrafiki təsdiqlənib.
Ölkə.Az APA-ya istinadən xəbər verir ki, bu barədə TQDK sədrin Məleykə Abbaszadə məlumat verib.
O bildirib ki, ali məktəblərin magistratura səviyyəsinə ərizə qəbulu 10-19 fevral tarixlərində aparılacaq:
“İmtahanın birinci mərhələsi 6 martda olacaq. İmtahanın ikinci mərhələsi isə iyunun 5-də keçiriləcək”.
Tikinti aparılması qadağan edilən sahələr açıqlandı
02.02.2016
Abşeron yarımadası istisna olmaqla, Azərbaycan ərazisində təhlükəli sürüşmə sahələrinin adları açıqlanıb.
Ekologiya və Təbii Sərvətlər Nazirliyinin (ETSN) Milli Geoloji Kəşfiyyat Xidmətinin Geoloji planlama ekspedisiyasının rəisi Əziz Qaralov APA-ya açıqlamasında deyib ki, onlar tərəfindən Azərbaycan ərazisində Abşeron yarımadası istisna olmaqla, təhlükəli sürüşmə sahələrinin xəritələri hazırlanıb.
Bananlardakı qan ləkələri bakterial xəstəlik imiş — RƏSMİ
02.02.2016
Son günlər Facebook sosial şəbəkəsində bananla bağlı insanları qorxuya salan faktlar yayılıb.
Bu barədə yazılanlara Kənd Təsərrüfatı Nazirliyi yanında Dövlət Fitosanitar Nəzarəti Xidmətinin rəisi Camal Quliyev aydınlıq gətirib.
C.Quliyev qeyd edib ki, son günlərdə bəzi Kütləvi İnformasiya Vasitələrində banan meyvələrində qeyri-adi qırmızı ləkələrə rast gəlinməsi, meyvələrin daxilinə yeridilmiş qan kimi qələmə verilir.
Bu hallar insanlar arasında ciddi narahatlığa səbəb olur.
"Dövlət Xidmətinin müfəttişləri tərəfindən idxal olunan banan meyvələrinə karantin baxışı keçirilən zaman bu tip meyvələrə rast gəlinməyib.
Məsələnin aktuallığını nəzərə alaraq, Dövlət Xidməti tərəfindən kənd təsərrüfatı məhsullarının topdan və pərakəndə satış məntəqələrində fitosanitar monitorinqlər həyata keçirilib və bitki mənşəli xəstəliklərlə yoluxma ehtimalı olan banan meyvələrindən laboratoriya analizləri məqsədilə nümunələr götürülüb.
Ötən ay doğuş zamanı 18 uşaq ölüb
02.02.2016
"Ədliyyə Nazirliyinin adlarla bağlı statistik məlumatlarında yer alan siyahıda "Adsız" adı ilə göstərilmiş körpələr ölü doğulmuş körpələri göstərir. Bu, körpələrə qoyulan ad deyil".
Ölkə.Az xəbər verir ki, bu barədə "Report"un sorğusuna cavab olaraq Ədliyyə Nazirliyinin mətbuat xidmətindən bildirilib. Belə ki, bu ilin yanvar ayında 13 oğlan, 5 qız uşağının doğum faktı qeydə alındığı üçün siyahıda yer alıblar. Lakin onlar ölü doğulduqlarından siyahıya "adsız" kimi düşüblər. "Yəni Azərbaycanda doğulan heç bir körpəyə "Adsız" adı verilməyib", - nazirlikdən bildirilib.
Dezinfeksiya stansiyaları gücləndirilmiş rejimdə çalışır
03.02.2016
“Donuz qripi” ilə əlaqədar Bakı, Sumqayıt, Gəncə, Mingəçevir şəhərləri və Abşeron rayonundakı məktəb və bağçalarda dezinfeksiya işlərinin aparılması üçün şəhər dezinfeksiya stansiyaları gücləndirilmiş iş rejimində çalışır.
Ölkə.Az xəbər verir ki, bunu Trend-ə Azərbaycan Səhiyyə Nazirliyi Respublika Gigiyena və Epidemiologiya Mərkəzinin şöbə müdiri Ziyəddin Kazımov deyib.
Onun sözlərinə görə, hazırda dezinfeksiya tədbirləri davam etdirilir. Bu tədbirlər Bakı, Sumqayıt, Gəncə, Mingəçevir şəhərləri və Abşeron rayonundakı bütün ümumtəhsil və məktəbəqədər təhsil müəssisələrini əhatə edəcək.
Şəmkir 2016-cı ilin “Gənclər paytaxtı” seçildi
03.02.2016
Gənclər və İdman Nazirliyinin təşkilatçılığı ilə keçirilən Gənclər Günü tədbirində “Gənclər paytaxtı” ilə bağlı onlayn səsvermənin nəticələri açıqlanıb.
Ölkə.Az Kəpəz TV-yə istinadən xəbər verir ki, Şəmkir şəhəri 2016-cı ilin "Gənclər paytaxtı" seçilib.
Bu seçim Azərbaycanın regionlarında gənclərin fəaliyyətinin genişləndirilməsi və inkişafı məqsədi ilə həyata keçirilir.
“Paytaxt” seçilmiş şəhərin gənclərinin regionun ictimai, siyasi və mədəni həyatında daha fəal iştirakı təmin edilir.
Nazir nardaranlılara iş təklif etdi
03.02.2016
Azərbaycan Respublikasının Əmək və Əhalinin Sosial Müdafiəsi Nazirliyi yanında Dövlət Məşğulluq Xidməti tərəfindən işsiz və işaxtaran vətəndaşların münasib işlərlə təmin olunması məqsədilə Bakının Nardaran qəsəbəsində Əmək yarmarkası təşkil edilib.
Nazirlikdən verilən məlumata görə, qəsəbənin işsiz və işaxtaran sakinlərinə 215 boş iş yeri təklif olunub. Yarmarkanın açılışında iştirak edən əmək və əhalinin sosial müdafiəsi naziri Səlim Müslümov tədbirin təşkilatı vəziyyəti ilə yaxından tanış olub, müvafiq tapşırıqlarını verib.
Ramiz Mehdiyev sərəncam verdi
03.02.2016
Azərbaycan Respublikasının Prezidenti Administrasiyası rəhbərinin sərəncamı ilə “Xocalı soyqırımının iyirmi dördüncü ildönümünün keçirilməsinə dair tədbirlər planı” təsdiq edilib.
Ölkə.Az AzərTac-a istinadən xəbər verir ki, tədbirlər planında Bakının Xətai rayonunda, Goranboy rayon mərkəzində və Ağcakənd qəsəbəsində Xocalı soyqırımı qurbanlarının xatirəsinə ucaldılmış abidələrin önünə əklil qoyulması mərasimlərinin keçirilməsi, Azərbaycan Respublikasının xarici ölkələrdəki səfirliklərində, nümayəndəliklərində və diaspor təşkilatlarında bu soyqırımı ilə bağlı tədbirlərin (mətbuat konfranslarının, anım mərasimlərinin və s.) təşkili, xarici və yerli kütləvi informasiya vasitələri, o cümlədən teleradio kanallarında, internet şəbəkəsində qanlı qırğını əks etdirən materialların yayılması və mütəmadi olaraq yenilənməsi nəzərdə tutulub.
Xırdalan qəbiristanlığı palçıq vulkanının üzərində yerləşir
03.02.2016
Bakı-Sumqayıt magistral yolunun sol tərəfindəki Xırdalan qəbiristanlığı “Zigilpiri” palçıq vulkanının üzərində yerləşir.
Ölkə.Az xəbər verir ki, bunu Trend-ə Azərbaycan Milli Elmlər Akademiyası Geologiya İnstitutunun Palçıq vulkanizmi şöbəsinin müdiri, geologiya-mineralogiya elmləri doktoru, professor Adil Əliyev deyib.
Onun sözlərinə görə, həmin vulkan nisbətən sönüb, aktiv deyil.
A.Əliyev qeyd edib ki, qəbiristanlıqda qəbirlərin sementlənməsi ərazidə vulkan püskürməsinin də qarşısını alır
Maşını etibarnaməsiz də sürmək olacaq — Yenilik
04.02.2016
Sürücü avtomobildədirsə, həmin avtomobili sürücülük hüququ olan istənilən şəxs etibarnaməsiz idarə edə bilər.
Ölkə.Az Avtosfer.az-a istinadən xəbər verir ki, Yeni İnzibati Xətalar Məcəlləsi etibarnamə üzrə nəqliyyat vasitəsinin idarə edilməsi zamanı təcrübədə yaranan bir mübahisəyə birdəfəlik son qoyacaq. Belə ki, hazırda qüvvədə olan Məcəllə nəqliyyat vasitəsini etibarnamə olmadan yalnız onun sahibi avtomobildə olduqda idarə edilməsinə icazə verir. Təcrübədə bəzən hesab edilir ki, “sahib” ifadəsi yalnız mülkiyyətçini və sərəncam hüququnu ehtiva edən etibarnaməsi (“baş etibarnaməsi”) olan şəxsi nəzərdə tutur. Ona görə də sürmək üçün etibarnaməsi olan şəxsin özü avtomobildə olsa da digər şəxsin belə avtomobili idarə etməsi qanunsuz sayılır və buna görə cərimə tətbiq olunur. Düzdür, bu yanaşma mülki qanunvericiliyin mahiyyətinə ziddir və dəfələrlə mütəxəssislər də belə yanaşmanı doğru olmadığına dair şərhlər veriblər. Amma indi də bəzən buna görə cərimələnənlər olur.
Keçmiş MTN-in binası DTX-ə verildi
04.02.2016
Ləğv edilmiş Milli Təhlükəsizlik Nazirliyinin (MTN) binası Dövlət Təhlükəsizliyi Xidmətinin (DTX) istifadəsinə verilib.
Ölkə.Az xəbər verir ki, APA-nın məlumatına görə, artıq binanın üzərindəki "Milli Təhlükəsizlik Nazirliyi" yazısı "Dövlət Təhlükəsizliyi Xidməti" ilə əvəzlənib.
Qeyd edək ki, Azərbaycan prezidenti İlham Əliyev 2015-ci ilin dekabrında Dövlət Təhlükəsizliyi Xidmətinin və Xarici Kəşfiyyat Xidmətinin yaradılması haqqında fərman imzalayıb.
Prezidentin sərəncamı ilə Dövlət Təhlükəsizliyi Xidmətinin rəisi vəzifəsinə Mədət Quliyev, Xarici Kəşfiyyat Xidmətinin rəisi vəzifəsinə isə Orxan Sultanov təyin ediliblər.
Azərbaycan peyki üzərindən yayımlanan kanalların sayı artdı
04.02.2016
“Azərkosmos” ASC Gürcüstanın “Maestro TV” və “Saperavi TV” kanalları ilə kommersiya yayımına dair müqavilə imzalayıb.
Bu barədə “Azərkosmos”dan Ölkə.Az-a bildirilib.
“Müqaviləyə əsasən, kanallar 2016-cı ildən etibarən “Azerspace-1” peyki üzərindən 11095/H/27500 tezliyi ilə yayımlanmaqdadır.
Qeyd edək ki, “Maestro” kanalı 1995-ci ildə təsis edilib. “Saperavi TV”də isə qədim gürcü adət-ənənələrini əks etdirən proqramlar yayımlanır.
AMEA-nın institutları birləşdirildi
04.02.2016
Bu gün Azərbaycan Milli Elmlər Akademiyasının (AMEA) Rəyasət Heyətinin növbəti iclası keçirilib.
Ölkə.Az xəbər verir ki, Rəyasət Heyəti aparatının İctimaiyyətlə əlaqələr və elmin populyarlaşdırılması idarəsinin İctimaiyyətlə əlaqələr şöbəsindən Trend-ə verilən məlumata görə, iclasda AMEA Biologiya və Tibb Elmləri, Yer Elmləri və Aqrar Elmlər bölmələrinin 2015-ci ildəki elmi və elmi-təşkilati fəaliyyətlərinə dair hesabatları dinlənilib. Hesabat məruzələrində sözügedən bölmələrin həm fundamental elmi tədqiqat işləri, həm də tətbiqi xarakterli elmi-texniki tədqiqatları haqqında məlumat verilib, bir sıra elmi-təşkilati məsələlər müzakirə edilib.
Daha 600-dən çox dərman vasitəsinin qiyməti təsdiqləndi
04.02.2016
Bu gün Tarif (qiymət) Şurasının növbəti iclası keçirilib və daha 600-dən çox dərman vasitəsinin qiyməti təsdiqlənib.
Şuradan verilən məlumata görə, ümumilikdə, indiyədək Tarif (qiymət) Şurası tərəfindən dərman vasitələrinin ticarət adı, təsiredici maddəsinin adı, dozası, farmasevtik forması, ticarət qablaşdırması, qablaşdırma miqdarı, istehsal ölkəsi nəzərə alınmaqla 5651 dərman vasitəsinin topdan və pərakəndə satış qiyməti və qüvvəyə minmə tarixi təsdiq edilib ki, bunlardan 3711 dərman vasitəsi təsdiq edilmiş qiymətlərlə artıq satışdadır. Qiymətləri təsdiqlənmiş digər 1940 dərman vasitəsinin yeni qiymətləri bu ilin 25 fevral tarixindən qüvvəyə minəcək.
Mədət Quliyevdən yeni rəis təyinatları
05.02.2016
Bakı şəhərinin bütün rayonlarında Dövlət Təhlükəsizlik Xidmətinin (DTX) idarələri formalaşdırılıb.
Ölkə.Az Report-a istinadən xəbər verir ki, DTX-nın 12 rayonunun hər birində idarələri yaradılıb, idarələrdə müvafiq qaydada kadr təyinatları olub. Təyin edilmiş şəxslərdən bəzilərinin adları da açıqlanıb. Belə ki, Nizami rayon Dövlət Təhlükəsizlik Xidmətinin rəisi vəzifəsinə Yusif Mirzəyev təyin edilib, müavini isə Şahin Həsənov olub.
Xətai rayon Dövlət Təhlükəsizlik Xidmətinin rəisi vəzifəsinə isə Vahid Tağıyev təyin edilib.
Dövlət qurumlarında nöqsanlar aşkar edildi
05.02.2016
Maliyyə Nazirliyi Dövlət Maliyyə Nəzarəti Xidmətinin regional maliyyə müfəttişlikləri tərəfindən 2015-ci ildə müvafiq rayonların (şəhərlərin) ərazilərində yerləşən büdcə təşkilatlarında aparılan nəzarət tədbirləri ilə aşkar olunmuş 2 392,2 min manat məbləğində artıq və əsassız ödənişlərin 1 669,56 min manatı təqsirkar şəxslər tərəfindən büdcəyə bərpa edilib.
Nazirliyin mətbuat xidmətindən Ölkə.Az-a verilən məlumatda deyilir ki, bundan başqa Ağcabədi rayon İcra Hakimiyyətinin Hacıbədəlli kənd inzibati ərazi dairəsi üzrə nümayəndəliyində 132,90 min manat, Samux rayon İcra Hakimiyyətinın Zazalı kənd inzibati ərazi dairəsi üzrə nümayəndəliyində 130,74 min manat mənimsəmə halı aşkar edilib.
Bakı Azərbaycanda ən çirkli şəhərdir
05.02.2016
Bakı şəhəri atmosfer havasının çirklənməsinə görə ölkə üzrə birinci yerdədir.
Ekologiya və Təbii Sərvətlər Nazirliyindən Ölkə.Az-a verilən məlumata görə, normal halda atmosferdə dəm qazı 5, toz 0,5, his isə 0,15 olmalıdır.
Paytaxtda isə hava həddindən artıq tozlanmış vəziyyətdədir. Belə ki, Bakıda atmosferdə dəm qazı 2,9-3,4, toz 0,4-0,9 mq/m3-dür. Sumqayıtda Bakıya nisbətən atmosfer havası az çirklənib. Azərbaycanın üçüncü ən böyük şəhəri Sumqayıtda havanın tozlanma miqdarı 0,3-0,8 mq/m3-dür. Dəm qazının miqdarı isə 1,1-1,6 mq/m3-dür. Gəncə şəhərində də havadakı toz miqdarı normadan artıqdır. Atmosfer havasındakı tozlanma normadan 0,3 mq/m3 çoxdur.
Sürücülük vəsiqəsi almaq üçün yaş həddi artırılır
05.02.2016
Layihə Milli Məclisin fevralın 12-də keçiriləcək plenar iclasında müzakirəyə çıxarılacaq
Azərbaycanda sərnişin daşıyan avtobus sürücüləri üçün qoyulan tələblər dəyişdirilir, bu fəaliyyətlə məşğul olmaq üçün maksimum yaş məhdudiyyəti tətbiq edilir. Ölkə.Az avtosfer.az-a istinadən xəbər verir ki, bu barədə məlumat "Avtomobil nəqliyyatı haqqında" qanuna təklif edilən yeni dəyişikliklərdə öz əksini tapıb.
Hazırda avtobuslarla sərnişin daşımalarına "D" kateqoriyası üzrə nəqliyyat vasitələrini idarə etmək hüququnu təsdiq edən sürücülük vəsiqəsi olan, yaşı 21-dən , "DE" kateqoriyası üzrə nəqliyyat vasitələrini idarə etmək hüququnu təsdiq edən sürücülük vəsiqəsi olan, yaşı 24-dən və avtonəqliyyat vasitələrini idarə etmək sahəsində təcrübəsi 3 ildən az olmayan sürücülər buraxılır.
Eynulla Fətullayevin iki saytı bağlandı
05.02.2016
Jurnalist Eynulla Fətullayev iki layihəsini birdən dayandırdı
Ölkə.Az korrespondent.az-a istinadən xəbər verir ki, fevralın 5-də Haqqın.az və Virtualaz.org saytları işini dayandırıb. Hər iki sayta rəhbərlik edən araşdırmaçı-jurnalist Eynulla Fətullayev kollektivi toplayaraq maliyyə durumu ilə bağlı saytların işini dayandırmaq haqqında qərar verdiyini deyib.
Bu haqda sözügedən saytlarda çalışanlar Facebook sosial şəbəkəsi üzərindən xəbər yayıb. Onlar iş axtardıqlarını bildirirlər.
Mətbuat Şurası bəzi saytlara xəbərdarlıq etdi
05.02.2016
Mətbuat Şurasının (MŞ) Şikayətlər üzrə Komissiyasının iclası keçirilib.
Şuradan verilən xəbərə görə, MŞ sədrinin müavini, Beynəlxalq Avrasiya Mətbuat Fondunun (BAMF) rəhbəri Umud Rəhimoğlunun başçılıq etdiyi komissiya 4 sayt barədə məsələyə baxıb.
İlk olaraq, Yardımlı Rayon İcra Hakimiyyətinin “Bizimxeber.az” saytı ilə bağlı müraciəti müzakirə olunub. Komissiya rəyə gəlib ki, şikayət doğuran yazılarda balansın gözlənilməməsi, qarşı tərəfin mövqeyinə aydınlıq gətirilməməsi yazılarda digər etik pozuntulara da yol açıb: “Nəticədə rayon rəhbərinin ünvanına real faktlara, dəlil-sübutlara söykənməyən fikirlər yayımlanıb”.
Daxili İşlər Nazirliyi işçi axtarır
05.02.2016
Daxili işlər naziri, general-polkovnik Ramil Usubov fevralın 27-də saat 10:00-da Şirvan, Sabirabad, Salyan, Neftçala, Hacıqabul, Biləsuvar, Cəbrayıl, İmişli, Zərdab və Saatlı şəhər, rayon sakinlərini Şirvan şəhər Polis Şöbəsində qəbul edəcək.
Nazirlikdən Ölkə.Az-a verilən məlumata görə, vətəndaşlar daxili işlər orqanlarının əməkdaşlarının fəaliyyətinə və Daxili İşlər Nazirliyinin səlahiyyətlərinə aid məsələlərlə bağlı müraciət etməklə qəbula yazıla bilərlər.
Qəbul başa çatdıqdan sonra saat 12:00-da Ramil Usubov tərəfindən Şirvan, Sabiabad, Salyan, Neftçala, Hacıqabul, Biləsuvar, Cəbrayıl, İmişli, Zərdab və Saatlı şəhər, rayon polis orqanlarında vakant olan sıravi və kiçik rəis heyəti vəzifələrində xidmətə qəbulla bağlı Şirvan şəhər Polis Şöbəsində sıra baxışı keçiriləcək.
Azərbaycanda işıqforlar səsli olacaq
05.02.2016
Azərbacanda əlillərin və sağlamlığı məhdud olan şəxslərin kütləvi toplaşdığı obyektlərin (tibb müəssisələri, reabilitasiya mərkəzləri, müvafiq cəmiyyətlər, həmçinin bu şəxslər üçün tikilmiş yaşayış binaları) yaxınlıqda olan piyada keçidlərində (kor piyadalara yolun hərəkət hissəsini keçməyin mümkünlüyünü bildirmək üçün) svetoforun işıq siqnallarına səs siqnalı da əlavə ediləcək.
Ölkə.Az Trend-ə istinadən bildirir ki, Nazirlər Kabinetindənverilən məlumata görə, bu, yeni təsdiqlənən "Piyada zolağında hərəkətin svetoforla nizamlanması və avtomobil yollarında yerüstü və ya yeraltı keçidlərin tikilməsi vacib olan hallar"da öz əksini tapıb.
Penitensiar xidmətin 18 əməkdaşı işdən çıxarılıb
05.02.2016
Pozuntulara yol verən 322 əməkdaş intizam məsuliyyətinə cəlb olunub.
Penitensiar xidmətin 18 əməkdaşı tutduqları vəzifədən azad olunub.
Bu barədə Ədliyyə Nazirliyi Penitensiar Xidmətinin 2015-ci ildəki fəaliyyətinin yekunlarına həsr olunmuş müşavirədə bildirilib.
Qeyd olunub ki, hesabat dövründə vəzifədən sui-istifadə, vəzifə səlahiyyətlərini aşma və digər korrupsiya elementlərinin yaranmasına zəmin olan səbəb və şəraitin aradan qaldırılmasına yönələn konkret tədbirlər görülüb. Pozuntulara yol verən 322 əməkdaş intizam məsuliyyətinə cəlb olunub, 18 əməkdaş isə tutduqları vəzifədən azad olunub.
Formula 1 yarışları Azərbaycanda 10 il keçiriləcək
06.02.2016
Azərbaycan təşkilatçıları Formula 1 Qran Pri yarışlarının Bakıda keçirilməsi üçün 10 illik müqavilə imzalayıb, BBC bu barədə rəsmi məlumat alıb.
Formula 1-ə rəhbərlik edən FOM şirkəti ilə Bakı yarışlarını təşkil edən Baku City Circuit arasında müqavilənin imzalanması iki il əvvəl bəyan edilsə də, kontraktın detalları indiyədək açıqlanmamışdı.
Yarışa sahiblik etmək üçün illik ödənişin nə qədər olacağı "məxfilik şərtinə" görə açıqlanmır, lakin BBC Azərbaycancaya danışan britaniyalı Formula 1 eksperti bunun 2016-cı ildə 34 milyon dollar olaraq hər il təxminən 10 faiz qalxacağını bildirib.
