“Saxta profilli saxta qəhrəmanlar”, yaxud Əli Kərimlinin qaraguruh kampaniyası
8 ay öncə qarşımıza Azərbaycanda yeni, qaraguruhdan, şər-böhtandan, söyüşdən-təhqirdən, xəyanətdən uzaq, sivil siyasi mübarizə aparacaq müxalifət yaratmaq məqsədini qoyduq. Və Əli Kərimli tərəfindən çirkin oyunlarla məhv edilən Azərbaycan Xalq Cəbhəsi Partiyasının keçmiş nüfuzunu geri qaytarmaq üçün real və olduqca məsuliyyətli işə başladıq.
Razi Nurullayevin rəhbərlik etdiyi AXCP onlara qarşı aparılan son kampaniya ilə bağlı bəyanat yayıb.
Ölkə.Az həmin bəyanatı sizə təqdim edir.
Bu yolda ilk addımlarımızı atdıqda çoxları, özəlliklə Əli Kərimli və komandası bizlərə qeyri-ciddi yanaşdılar, daha doğrusu bizi ciddiyə almadıqlarının imicini yaratmaq istədilər. Düşündülər illərdir yalan, qara oyunlar üzərində qurulan imperiyalarını dağıtmaq mümkün olmayacaq. Lakin, sonradan attığımız cəsarətli, hədəfə hesablanmış addımlardan sonra nə qədər ciddi, qətiyyətli olduğumuzu anlamağa başladılar. Və nə etdilər? Təlaşa düşdülər və həmən ən yaxşı bacardıqları yolu seçdilər - şərlə, qarala, təhqir et, nüfuzdan sal. AXCP-nin möhtəşəm qurultayında Razi Nurullayev gizli səsvermə yolu ilə sədr seçildikdən sonra qaraguruh kampaniyası daha da gücləndirildi. Sosial mediada saxta profillərlə olsun, reket media orqanları vasitəsiylə olsun hər tərəfdən əxlaqsızca, siyasi mübarizəyə yaraşmayan şəkildə üzərimizə hücuma keçdilər. Biz nə etdik? Biz əlbəttə əxlaqsızlığa özümüzün sivil siyasi mübarizəmizlə, gördüyümüz real işlərlə cavab verdik, cavab verməkdə də davam edirik. Bu isə qarşı, hər zaman müxtəlif qara oyunlarla qələbəyə alışan Əli Kərimli və onun robotlarını daha da aqressivləşdirdi.
Bir ara Əli Kərimli öz oyuncaqlarına guya bizi gündəmdə saxlamamaq üçün tapşırıq verdi ki, haqqımızda heçnə danışıb, yazmasınlar. Amma təbii ki, bu çox çəkə bilməzdi. Çünki, heçnəyə baxmayaraq biz görüdüyümüz işlərlə gündəmdə qalmağa davam etdik. Bizim uğurlu işimiz, təkliflər, yeni ideyalar, parlaq perspektivlər Əli Kərimlini, onun yalançı imzalar arxasında gizlənən qaraguruh, iftira, qarayaxmadan başqa əlindən heçnə gəlməyən komandasını narahat etməyə bilməzdi. Və yenidən başladılar. Artıq yenə mediada heç bir fakta söykənməyən, jurnalist peşə etikasına yaraşmayan, qanunlara zidd şər-böhtan yazılara, sosial şəbəkələrdə saxta profil arxasında gizlənənlər tərəfindən heç bir etikaya, əxlaqa, mədəniyyətə sığmayan söyüş kampanyasına start veriblər. Təbii ki, biz hər bir belə saxta imza, saxta media, saxta profilin arxasında Əli Kərimli və onun ətrafındakı özü kimi saxta qəhrəmanların hiyləgər üzünü, qaraguruh, qarayaxma, şərləmə dəsti-xəttini görürük.
Biz isə, əlbəttə AXCP olaraq yenə də bu əxlaqsız oyunlara alət olmayacağıq. Bu karvan heçnəyə baxmayaraq öz yolunu davam etdirir və etdirəcək. AXCP real iş görür, xalqı, ölkəni düşdüyü ağır böhran durumundan çıxarmaq üçün yollar axtarır, təklifllər hazırlayıb hökumətə təqdim edir. Kimisə şərləmək, qaralamaq, böhtan atmaq bizim imicimizə, tutduğumuz yola yaraşmaz. Və gördüyümüz işlərin nəticəsi də göz qabağındadır. Artıq insanlarda müxalifətə yenidən inam formalaşmağa başlayıb. İnsanlar görürlər ki, müxalifətin işi yalnız daş atmaq, söyüş söyməkdən ibarət deyilmiş. Bizim attdığımız addımlar digər müxalifət partiyalara da stimul verir. Bunun nəticəsidir ki, AXCP-nin antiböhran təkliflərindən sonra bir neçə partiya da təkliflər hazırladığını bəyan etdi. Bu bizi sevindirir. Biz hər zaman demişik, təklifi kimin hazırlaması önəmli deyil, önəmli olan bu təklifin dövlətin və xalqın xeyrinə hesablanmasıdır. Bu gün hakimiyyət artıq onun qarşısında real bir müxalif gücün durduğunun fərqindədir.
Bir daha bəyan edirik, Azərbaycan Xalq Cəbhəsi Partiyasının heç bir müxalifət partiyası və heç bir şəxslə problemi yoxdur. AXCP heç bir çirkin oyunlara alət olmayacaq. AXCP tutduğu sivil siyasi mübarizə yolunu davam etdirəcək.
