Politoloq: Türkmənləri silahlandırıb Bəşər Əsədə qarşı qaldıranda Türkiyə anlamalı idi ki...

Türkiyənin baş naziri Əhməd Davudoğlu bildirib ki, Rusiya Suriyada etnik təmizləmə işi aparır.

Davudoğlu deyib ki, biz qaçqınları qəbul etməliyik, amma bu hücumlar Suriyada rejimi dəstəkləməyən insanları ölkədən çıxarmaq məqsədi daşıyır. Bu, bilərəkdən aparılan etnik təmizləmə siyasətidir.

Davudoğlunun səsləndirdiyi fikirlərə politoloq Zərdüşt Əlizadə Ölkə.Az-da cavab verib:

"Davudoğlu düz deyir. Çünki Türkiyənin təşkilatlandırıb, Bəşər Əsədə qarşı qaldırdığı türkmənləri faktiki olaraq Rusiyanın bombalama siyasəti və Suriya ordusunun əməliyyatları sıxışdırıb Suriya ərazisindən Türkiyəyə qaçmağa məcbur edir. Bunun adını həqiqətən də etnik təmizləmə qoymaq olar. Ancaq bu etnik təmizləmənin bir səbəbi var. Əsəd rejimi, ata və bala Əsəd Suriyanı idarə edəndə türkmənləri heç kəs etnik təmizləməyə məruz qoymurdu. Normal yaşayırdılar. Düzdür, avtoritar ölkədə yaşayırdılar, ancaq can və mal güvənliyi var idi. Bəşər Əsəd rejimini devirmək üçün qərbə qoşulan Türkiyə türkmənləri silahlandıranda, onlarda ordu yaradıb, orada türkmən muxtar qurumu yaratmaq istəyəndə Davudoğlu və Ərdoğan anlamalı idi ki, onlar Suriya türkmənlərini təhlükəyə məruz qoyurlar. O təhlükə də baş verdi. Bəşər Əsəd əvvəllər ona sadiq olmuş türkmənləri Türkiyənin aləti sayaraq onları Suriyadan qovmağa başladı.

Hər hansısa bir addım atanda müdrik siyasətçi gərək onun aqibətini görsün. Türkmənləri silahlandırıb Bəşər Əsədə qarşı qaldıranda Türkiyə anlamalı idi ki, elə bir vəziyyət yarana bilər, qüvvələr nisbəti dəyişər və türkmənlər əzilməyə başlayar. Türkmənlər məğlub olanda doğma Türkiyəyə qaçmalıdır. 1989-cu ildə Hari Kasparov Moskvada Saxrovun rəhbərlik etdiyi yığıncaqda Qarabağ komitəsinin başçıları haqqında bunu demişdi ki, Qarabağda hadisələri başladanda Bakı ermənilərini düşünməmişdilər. Ona görə də, Bakıdan bütün ermənilər qovuldu.

Türkmənlərə qarşı etnik təmizlik bir faciədir. Suriya üçün faciədir ki, sadiq, ağıllı, vicdanlı bir əhalidən məhrum olur, Suriya türkmənləri üçün də faciədir ki, yüzlərlə illərdir yaşadığı ərazini tərk edib, qaçqın statusunda Türkiyəyə sığınacaqlar. Bütün bunların səbəbi həm Suriya hökumətindədir ki, imkan verdi ölkə daxilində müharibə başladı, həm Suriyadakı qiyamçıları dəstəkləyən Qərbə və onların tərəfdaşı olan Türkiyədədir".

Səxavət Məmməd
Ölkə.Az