Tələbat olmayan ixtisaslara qəbul məhdudlaşdırıldı
Bu günə qədər ölkəmizdə fəaliyyət göstərən Təhsil Nazirliyinin tabeliyində olan orta ixtisas təhsil müəssisələrinin 40%-dən çoxu humanitar, pedaqoji və musiqi yönümlüdür.
Bir çox kolleclər eyni profil üzrə kadr hazırlığı həyata keçirir və bəzilərində peşəkar idarəetmə və müəllim heyəti ilə bağlı o qədər yüksək keyfiyyət olmadığı üçün onların fəaliyyəti qənaətbəxş hesab edilə bilməz.
Bunu Təhsil Nazirliyinin ictimaiyyətlə əlaqələr şöbəsinin müdiri Cəsarət Valehov bildirib.
“Əmək bazarında yetərincə tələbat olmayan sahələr üzrə kadr hazırlığının aparılması və çoxsaylı idarəetmənin saxlanılması büdcə vəsaitlərində səmərəsiz xərcləmələrə gətirib çıxara bilir.
Buna görə də, Təhsil Nazirliyi tərəfindən bu istiqamətdə müəyyən addımlar atılıb, görülən tədbirlər nəticəsində orta ixtisas müəssisələrində pedaqoji kadr hazırlığı minimuma endirilib, əmək bazarında tələb olunmayan digər ixtisaslar üzrə qəbul planları məhdudlaşdırılıb”, - deyə nazirliyin rəsmisi əlavə edib.
“Burada əsas məqsəd ondan ibarətdir ki, orta ixtisas təhsil müəssisəsinin optimallaşdırılması daha mobil, daha keyfiyyətli kadr hazırlığının əmələ gətirmək və bu kadr hazırlığının birləşdirilən orta ixtisas təhsil müəssisələrinin infrastrukturunun daha da yenilələşdirilməsi, eyni zamanda bu imkanlardan daha yaxşı kadr hazırlığı üçün istifadə olunmasıdır”, - deyə C.Valehov bir daha vurğulayıb.
Xatırladaq ki, Təhsil Nazirliyinin tabeliyində 45 orta ixtisas təhsil müəssisəsi fəaliyyət göstərir.
