Ata öldü, baba öldü, nənə infarkt, ana xəstə...
Fəlakət içində olan ailəni bank borcu da bir yandan çıxılmaza salıb
Deyir, dərd gələndə batmanla gələr. Tovuzun Xatınlı kəndində yaşayan Qocayevlər ailəsinə də dərdlər üst-üstə gəlib. Övladını dünyaya gətirəndən sonra Şəfəqin sağlığında problemlər yaranır. Elçin həyat yoldaşını müalicə etdirmək üçün bankdan kredit götürür. O xəstəxana sənin, bu xəstəxana mənim Şəfəqi gəzdirir. Onun səhhəti düzəlməyə başlayırdı ki, Elçin özü qəzaya düşür.
Elçin Qocayev tikinti şirkətində sürücü işləyirmiş. İşdən ezamiyyətə göndərilir. Orda ağır qəza keçirir və həyatını itirir. Ailənin bütün yükü Elçinin yaşlı atası Əsgər Qocayevin öhdəsinə düşür. Gözünün ağı-qarası olan yeganə övladını itirən ata oğlunun yoxluğunda nəvəsiylə ovunur. Balaca Nəzrin də atasının qoxusunu babasından alır.
Övlad həsrətinə dayana bilməyən qoca ata ötən ilin oktyabrında haqqın rəhmətinə qovuşur. Qocayevlər sonuncu ailə başçısını da itirir. Evdə xəstə qayınana, gəlin, bir də balaca Nəzrin qalır. Atası öləndə hələ körpə olan Nəzrin babasının itkisini ağır keçirir. Uşaq ürəyi bu ayrılığa dözmür. Aylar keçdikcə Nəzrin saralıb-solur. Əvvəl iştahasızlıq başlayır. Sonra ayaqlarında göyərmələr. Göyərmələrin biri solur, digəri çıxır. Əsas da baş barmağı qaşıntı verir.
Nəzrini Tovuz rayon Mərkəzi Xəstəxanasına gətirirlər. İlkin müayinədən sonra həkimlər uşağı dərhal Bakıya aparmağı məsləhət görür. Bu xəstəliyin qanla əlaqədar olduğu güman edilir. Bakıda isə Nəzrinin xəstəliyinə dəqiq ad qoyulur: kəskin leykoz.
Anası Şəfəq Qocayeva deyir ki, nəsillərində kimsədə indiyə qədər belə xəstəlik olmayıb. Həkimlər də körpənin ağır stressdən bu günə düşdüyünü ehtimal edirlər. Babası rəhmətə gedəndə Nəzrin həddindən artıq üzülübmüş. Ola bilsin, bu səbəbdən körpənin qanında xəstəlik yaranıb.
Yanvarın 25-dən Nəzrin Qan Xəstəlikləri İnstitutunda müalicə alır. Bu günlərdə ikinci kimya terapiyasını qəbul edib. Preparat kürəkdən bədənə yeridildiyindən uşaq 2 saata yaxın ağzı üstə uzanıqlı qalmalıdır.
Nəzrinin 5 yaşı var. Xəstəliyinin nə qədər ciddi olduğunu anlamır. Xəstəxanadan, dərmanlardan, əlinin üstünə bərkidilmiş iynələrdən bezib. O kəndə, evlərinə qayıtmaq üçün ağlayır. Əvvəlcə olduğu kimi, qonşu uşaqlarla ora-bura qaçmaq, torpaqla oynamaq istəyir.
Xəstəlik hələ başlanğıc mərhələsindədir və müalicəsi mümkündür. Lakin ailənin maddi vəziyyəti buna imkan vermir. Elçin həyat yoldaşı Şəfəqin müalicəsi üçün bankdan götürdüyü 2 min dolları qaytarmadan rəhmətə getdi. Son devalvasiyadan sonra ailənin banka olan borcu xeyli artıb. Hazırda işləri məhkəmədədir.
Nəzrinin xəstəlik xəbəri eşidəndə ata nənəsi infarkt olub. Ana babası və qohumların köməkliyi ilə onun Bakıdakı xərcləri ödənilir. 45 günlük müalicədən sonra Nəzrin həftədə 2 dəfə kimya terapiya almaq üçün bura gətirilməlidir. Bakıda qalmağa imkanı olmayanlar hər dəfə uşaqlarını rayona aparıb gətirirlər. Bu halda da uşaqlar çox zaman yolda soyuqlayırlar. Belə hal baş verməsin deyə Nəzrinin yaxınları Bakıda kirayə ev tutublar. Müalicə xərcləri dövlət hesabına aparılsa da, əlavə xeyli xərclər çıxır. Əgər mütəmadi olaraq yaxşı müalicə aparılarsa, 5 ilə Nəzrin sağalacaq, yaşıdlarıyla yenə də həyətdə oynaya biləcək.
Həyat yoldaşını erkən itirən Şəfəqin isə tək ümidi Nəzrindi. Xəstəxanada balasının yanında qalır. Qayğılı ananın başqa dərdi də var - köhnə xəstəliyi qayıdır. Hərdən qıcolmaları olur. Onda kimsəni tanımır, körpə balasını belə. Nəzrindən danışanda ananın dodaqları əsir, “qızımı qurtarın” deyir.
Nəzrinin həyatı sizin yardımlarınızdan asılıdır. Ona kömək etmək istəyənlər üçün bank hesabı açılıb.
Alanın bankı - Bank Respublika ASC Nərimanov Filialı
- Kod : 508182
- VÖEN : 9900001901
- M/H : AZ80NABZ01350100000000014944
- SWIFT : BRESAZ22
Alan - Arif Aslanov
İBAN : AZ53BRES00380194400151729301
Həmçinin, MilliÖn və E-Manat ödəmə terminalları vasitəsilə də “Banklar” bölməsindən “Bank Respublika”nı seçib yardım etmək olar: Hesab nömrəsi : 380194400151729301
Şəxsiyyət vəsiqəsi : 04057802
