8-ci mərtəbədən atılıb sağ qalan gənci nənəsi evə aparmır
İki gün əvvəl Bakının Günəşli qəsəbəsində yaşadığı evin mənzilindən - 8-ci mərtəbədən özünü atan Orxan Vahabzadənin sağ qalması günün möcüzəsi oldu. 8-ci mərtəbədən özünü atsa da, bədənində sınıq belə olmayan, sadəcə müxtəlif nahiyələri əzilən Orxan hazırda Sabunçu rayonu 3 saylı şəhər xəstəxanasının reanimasiya şöbəsindədir.
Gəncin səhhəti ilə maraqlanmaq üçün xəstəxanaya gedən lent.az əməkdaşlarını onun nənəsi qarşıladı.
- Orxan xəstədir, çıxıb pəncərəyə, özünü atıb. Allahın möcüzəsi onu saxlayıb.
Nənə bildirib ki, Orxan uzun müddət Maştağadakı 1 saylı Respublika Ruhi-Əsəb Xəstəxanasında müalicə olunub. Gənc psixoloji problemləri olduğu üçün məktəbə də getməyib. Yaşlı qadının sözlərinə görə, Orxanı özü saxlayıb:
- Orxan illərin xəstəsidir. O dünən, bu gün xəstələnməyib. İndiyədək heç kim mənə kömək etməyib. Bu 22 ildə heç kimin köməyini görməmişəm. Ata-ana yoxdur. Onun məndən başqa heç kəsi yoxdur. Orxan anadangəlmə xəstədir. Onu bütün xəstəxanalara aparmışam.
Öyrəndik ki, evin tək övladı olan O. Vahabzadənin atası ilə anası o, uşaq olan zaman ayrılıblar. Atası ikinci dəfə ailə qurub. Əsəb xəstəliyindən əziyyət çəkən ana da Orxanla bərabər 67 yaşlı təqaüdçü nənə ilə yaşayır. Gənc sonuncu dəfə ötən il bir aydan çox Maştağadakı 1 saylı Respublika Ruhi-Əsəb Xəstəxanasında müalicə alıb.
Gəncin nənəsi onun evdə ambulator müalicə aldığını da əlavə etdi:
Həkimlə söhbətində yaşlı xanım Orxanı evə apara bilməyəcəyini israrla təkid edirdi:
- Həkim, onu mən necə evə aparım? Evdə ona baxan yoxdur. Anası da xəstədir.
Həkimlər bildirdilər ki, nənəsindən başqa onunla maraqlanan yoxdur. Məlum oldu ki, Orxanın uşaqlıqdan epilepsiyası var və ikinci qrup əlildir. İstənilən vaxt ruhi dispanserdə müalicə ala bilər.
Sabunçu rayon 3 saylı şəhər kliniki xəstəxanasının reanimasiya şöbəsinin müdiri Namiq Dəmirçiyev hazırda O. Vahabzadənin vəziyyətinin stabil olduğunu və yaxşılaşmaya doğru getdiyini əlavə etdi. Xəstə bu gün reanimasiya şöbəsindən çıxarılıb palataya köçürüləcək. Sonrakı mərhələdə onunla psixiatr və travmatoloq məşğul olacaq: "Xəstəxananın psixiatoru Orxana baxıb və vəziyyətini dəyərləndirib. Maraqlısı ondadır ki, xəstə bir müddət əvvəl Maştağadakı 1 saylı Respublika Ruhi-Əsəb Xəstəxanasında müalicə alıb. Yəqin ki, vəziyyəti pis olmadığı üçün evə buraxıblar. Amma bu cür xəstələrdə vaxtaşırı dəyişikliklər olur. Ola bilər, dərmanlarını içmir, ya da müayinəyə vaxtında getmirlər".
Evə buraxılıb-buraxılmamağı isə Orxanın vəziyyətindən asılıdır. Həkim N. Dəmirçiyev vəziyyəti yaxşılaşdıqdan sonra onun müalicəsini ruhi dispanserdə davam etdirə biləcəyini də qeyd edib: "Özünü atma halı Orxanda baş verən ilk hadisə deyil. Bir neçə il əvvəl o, elektrotravma alıb. Binanın üstünə çıxaraq naqil məftillərindən tutub. Yanıq xəsarəti ilə xəstəxanaya çatdırılıb və müalicə alıb. Bu cür xəstələrin psixi durumunda dəyişikliklər olur, psixi durumun müxtəlif halları baş verir. Sayıqlamalar baş verir, birdən uçmaq istəyirlər, birdən elə bilirlər ki, quş kimi uçsalar, rahat olacaqlar. Onlarda psixi durumun pozğunluqlarının müxtəlif durumları baş verə bilər. Ona görə də xəstəliyin müxtəlif mərhələlərində müxtəlif cür hərəkətlər edirlər".
Xatırladaq ki, fevralın 20-də Günəşli qəsəbəsində 1994-cü il təvəllüdlü Vahabzadə Orxan Azad oğlu doqquzmərtəbəli binalardan birinin 8-ci mərtəbəsindən özünü atıb. Xoşbəxtlik nəticəsində sağ qalan gənc müxtəlif dərəcəli bədən xəsarətləri ilə 3 saylı şəhər xəstəxanasına yerləşdirilib. Onun sağ qalmasına səbəb yağışdan sonra xeyli yumşalmış torpağın üstünə düşməsi olub.
