Razi Nurullayev: \"Azərbaycanda iş yerləri açmaq istəyən iş adamları qorxurlar\"

"Hazırda ölkədə ən böyük problem işsizlikdir. İşsizlik fonunda isə qiymətlər artan xətt üzrə “inkişaf” edir. Nəyinsə, ucuzlaşmasını görmək mümkün deyil. Yalnız siqaretlərin bəzi növləri ucuzlaşır. Sanki bilərəkdən ucuzlaşdırılır ki, dərdli xalq çəkib qəmini unutsun".

Bu sözləri Ölkə.az-a açıqlamasında Azərbaycan Xalq Cəbhəsi partiyasının sədri Razi Nurullayev deyib.

"İş yerlərinin itirilməsi və yenilərinin açılmaması hər gün yüzlərlə ailəni yaşam imtahanı ilə üz-üzə qoymaqdadır" deyən sədr bildirib ki, Sosial Müdafiə Nazirliyinin Məşğulluq idarələrinin önündə 1992-ci ildə əhalinin çörək növbəsinə dayandığı ab-hava var.

"Hökumətin əl-qolunu sallayıb bunu seyr etdiyini demək də düz olmaz. Lakin, görülən işlər nəticəsiz qalacaqdır. Çünki, pafosla, istəklə, arzu ilə nə iş yeri açılandır, nə də fabrik və zavod tikiləndir. Büdcə vəsaiti ilə bunu tam həll etmək mümkün deyildir. Onsuzda büdcədə pul da yoxdur. Bununla bərabər, pulunu sandıqda gizləyən minlərlə adam var ki, onlar yatırım qoyub qazanc götürmək istəyərlər. Amma, hələ də biznes üçün əlverişli şərait yoxdur. Hələ də pul sahibi pulunun qorunacağına ümid etmir və elə ona görə də ya sandıqda saxlayır, ya da əmlaka yatırır. Halbuki, 10 min manatı olan da 2-3 iş yeri yarada bilər. Qorxur, əlində olanı da yandırmaqdan, itirməkdən qorxur".

Razi Nurullayev qeyd edib ki, ölkədə biznes heç 20% də azad deyil. AXCP sədrinin sözlərinə görə, bu gün ölkədə bizneslə məşğul olmaq istəyənlər “haqqa oturdulur” və talan edilirlər:

"İş yerlərinin açılması üçün biznes tam azad olmalıdır. Bizneslə məşğul olan şəxs güvənməlidir ki, pulu, malı, canı qorunur. Türkiyədə, Rusiyada və digər ölkələrdə milyonları olan həmyerlilərimiz var ki, onlar Azərbaycana yatırımlar qoymaq istəyirlər. Amma, qorxurlar. İllərlə yığdıqlarını bir gündə itirməkdən qorxurlar. Buna görə də biznesin toxunulmazlığı və sığortalılığı ölkənin Konstitutsiyası qədər toxunulmaz olmalıdır. Bu olmadıqca, prezident sərəncamlar verəcək, çoxu isə kağız üzərində qalacaqdır. İndiyə qədər qaldığı kimi. İnam yaratmaq da vacibdir. İnamın yaradılması üçün isə, talan edilmiş, oğurlanmış, qəsb edilmiş, zorla alınmış bizneslərin sahiblərinə qaytarılması zərurətdir. Əgər zəbt edilmiş, oğurlanmış bizneslər sahiblərinə qaytarılarsa və onların zərəri ödənərsə, o zaman bir il ərzində ölkəyə ən azı 4-5 milyard vəsait axını baş verər. Bəlkə də daha çox. Sahibkar malının, mülkünün, canının toxunulmazlığına inanacaqsa, yatırım edəcək. Başqa cür mümkün deyil".

Ölkə.az