Əhali rəqəmsal yayımın tərəfdarıdır - \"Donma olmur, kanallar qarışmır, görüntü daha yaxşıdır\"
Rəqəmsal yayım: keyfiyyət, geniş imkanlar, əlavə xidmətlər.
Dünyanın inkişaf etmiş olkələrinin əksəriyyəti analoq yayımla vidalaşaraq, rəqəmsal yayıma keçmişdir. Məsələn, İngiltərə rəqəmsal yayıma keçidi 2010-cu ildə başlatmış, bir neçə ildə bu prosesi tamamlaya bilmişdir. Avropanın əksər ölkələrində rəqəmsal yayım həyata keçirilir.
Qonşu Türkiyədə ilk rəqəmsal yayım testləri 2006-cı ildə həyata keçirilmiş, 2015-ci ilin sonuna doğru böyük kanalların əksəriyyəti bu yayım növünü seçmişdir. Bəs, Azərbaycanda vəziyyət necədir?
Azərbaycanda rəqəmsal yayıma keçidlə bağlı ilk test işləri 2004-cü ildə başlanılıb. Ötən ilin sonuna qədər ölkənin bütün ərazisinin rəqəmsal yayımla tam əhatə olunması nəzərdə tutulsa da, proses hələ ki, yekunlaşmayıb.
Hazırda respublikada yaşayış məntəqələrinin 99 faizi rəqəmsal televiziya siqnalları ilə əhatə olunub. Vətəndaşlara sosial və kommersiya tipli 2 paket təklif olunur. 10-11 kanalın daxil olduğu sosial paketlərdə yerli, yəni dövlət və özəl televiziyaların yayımı pulsuz həyata keçirilir. Kommersiya tipli paketlərdə isə 90-a yaxın kanalı izləmək mümkündür. Bu paketlər hələlik Bakı, Gəncə, Quba və Lənkəranda izləyicilərə təqdim olunur.
Rəqəmsal yayımın əsas üstünlükləri:
1.DAHA YÜKSƏK KEYFİYYƏT: Rəqəmsal yayım analoq yayımla müqayisədə daha keyfiyyətlidir. DVB T formatında, yəni rəqəmsal yayımda təsvir və səs siqnallarının ötürülmə və qəbul edilmə keyifiyyəti olduqca yüksəkdir.
2. GENİŞ İMKANLAR: Analoq yayımda 1 tezlikdə yalnız 1 televiziya kanalının yayımı mümkündür. Rəqəmsal yayımda isə 1 tezlikdən bir neçə kanal yayımlana bilir.
3. SƏRFƏLİLİK: Rəqəmsal yayım maliyə məsələləri də daxil olmaqla, bir çox məsələdə analoq yayıma görə daha sərfəlidir.
4.ƏLAVƏ XİDMƏTLƏR: Rəqəmsal yayımın üstünlüklərindən biri də mobil və portatip qəbuledicilərdə izləməyin mümkünlüyüdür. Bu yayımdan təkcə televiziya xidməti deyil, digər xidmətlər də vermək mümkündür. Data, internet və sair. Televiziya xidmətləri ilə yanaşı, əlavə xidmətlər üzrə, məsələn, hava haqqında, nəqliyyatın hərəkət cədvəli ilə bağlı məlumatların ötürülmə imkanları var.
Bəs, Azərbaycan əhalisi rəqəmsal yayımla bağlı nə düşünür?
"Region TV"-nin hazırladığı videosorğunu təqdim edirik.
