157 nəfər işinə qaytarıldı
Ölkə.Az-da Mingəçevir şəhəri Azərbaycan İstilik Elektrik Stansiyasında işçilərin kütləvi ixtisara salınması ilə bağlı xəbərlər getmişdi.
Mingəçevir şəhəri Azərbaycan İstilik Elektrik Stansiyasından 11-i Qarabağ veteranı da daxil olmaqla 157 nəfər kütləvi ixtisar edilmişdi. Bir neçə gün öncə "Ölkə.az sadə vətəndaşlarımızın haqq səsinə çevrilir" başlıqlı yazıda 11 nəfər Qarabağ əlilinin yenidən işlə təmin edildiyini bildirmişdik.
Bu gün Mingəçevir şəhəri Azərbaycan İstilik Elektrik Stansiyasının aparıcı mühəndisi Qarabağ veteranı, Mingəçevir Qarabağ Veteranları Cəmiyyətinin sədri Həsənov Natiq Ölkə.Az-a zəng edərək bildirib ki, Mingəçevir şəhəri Azərbaycan İstilik Elektrik Stansiyasının direktoru Bəşirov Gülağa ixtisar edilmiş işçiləri müəssisəyə çağıraraq işdən çıxarılmaları barədə verilən bildirişləri kadrlar şöbəsinə təqdim etmələrini və hər kəsin yenidən işə bərpa edildiyini bildirib.
Həsənov Natiqin sözlərinə görə, artıq ixtisar edilmiş hər bir işçi köhnə işində işləməyə başlayıb.
Qeyd edək ki, Mingəçevir şəhəri Azərbaycan İstilik Elektrik Stansiyasında işçilərin kütləvi ixtisara salınması ilə bağlı "Qarabağ əlilini səbəbsiz yerə işdən qovdular — Mingəçevirdə özbaşınalıq" və ""Sizi Qarabağa kim göndəribsə, gedin ondan iş tələb edin!" — Baş mühəndisdən veteran və şəhid ailələrinə təhqir" başlıqlı iki yazı dərc edilmişdi.
Səxavət Məmməd
Ölkə.Az
