Həftənin icmalı
Azərbaycanda hazırda 5062 KİV var
07.03.2016
Ötən il Ədliyyə Nazirliyi tərəfindən 70 qeyri-kommersiya qurumu və 34 təhsil müəssisəsi dövlət qeydiyyatına alınıb.
Bu barədə Nazirlər Kabinetinin 2015-ci ildə fəaliyyəti haqqında hesabatda qeyd olunub.
Statistikaya görə, dövlət qeydiyyatına alınan qeyri-kommersiya təşkilatlarının ümumi sayı artaraq 4.100-ü ötüb.
Eyni zamanda 2015-ci ildə 89 mətbu nəşr uçota götürülüb. Beləliklə də ölkədə KİV-lərin sayı artaraq 5062-i olub.
Florensiyada Xocalı qurbanları anıldı
07.03.2016
Martın 4-də İtaliyanın Florensiya şəhərinin “Palazzo Borghese” sarayında ABŞ və Litva kinematoqrafçılarının birgə istehsalı olan, kino sahəsində nüfuzlu beynəlxalq mukafatlara layiq görülmüş “Endless Corridor” (“Sonsuz Dəhliz”) adlı müstəqil sənədli filmin premyerası keçirilmişdir.
Filmin nümayişi Heydər Əliyev Fondunun vitse-prezidenti Leyla xanım Əliyevanın təşəbbüsü ilə həyata keçirilən “Xocalıya Ədalət!” təbliğat-təşviqat kampaniyası çərçivəsində təşkil edilmişdir. Anım gecəsi 26 fevral 1992-ci il tarixində baş vermiş Xocalı qətliamı qurbanlarının əziz xatirəsinə həsr edilmişdir.
Keçmiş MTN generalının həbs müddəti artırıldı
07.03.2016
Səbail Rayon Məhkəməsində ləğv edilmiş Milli Təhlükəsizlik Nazirliyinin (MTN) Transmilli İqtisadi Cinayətkarlığa Qarşı Mübarizə Baş İdarəsinin (TİCQMBİ) sabiq rəisi, general-mayor Sübahir Qurbanov barəsində seçilmiş həbs qətimkan tədbirinin uzadılması ilə bağlı istintaq orqanın verdiyi təqdimata baxılıb.
Ölkə.Az xəbər verir ki, Report-un əldə etdiyi məlumata görə, S.Qurbanov barəsində həbs qətimkan tədbirinin müddəti üç ay artırılıb.
Ölkədə işsizlərin 38 faizi qadınlardır
07.03.2016
2016-cı il yanvar ayının 1-i vəziyyətinə məşğulluq xidməti orqanları tərəfindən ölkə üzrə rəsmi işsiz status verilən şəxslərin sayı 28,9 min nəfər olub.
Bu barədə Nazirlər Kabinetinin 2015-ci ildə fəaliyyəti haqqında hesabatda qeyd olunub.
Qeyd olunub ki, işsizlərin 38,6 faizini qadınlar təşkil edib.
İşsizliyə görə müavinətin orta məbləği 262,3 manat olub.
500-dən çox dövlət müəssisəsi özəlləşdirilib
07.03.2016
2015-i ildə Azərbaycanda 500-dən çox kiçik dövlət müəssisəsi və obyekti, 470 obyektin yerləşdiyi torpaq sahəsi özəlləşdirilib.
Bu Nazirlər Kabinetinin 2015-ci ildə fəaliyyəti haqqında hesabatda bildirilib.
Qeyd olunub ki, səhmlərin satışı üzrə keçirilən pul hərraclarında 19, investisiya müsabiqələri vasitəsilə isə 5 səhmdar cəmiyyətin səhmləri satılıb.
Hesabat ilində investisiya müsabiqəsi vasitəsilə özəlləşdirilən müəssisələrə müqavilələr üzrə müsabiqə qalibləri tərəfindən 6,5 milyon maant məbləğində investisiya qoyulub.
24 mindən çox əcnəbi Azərbaycandan deportasiya edilib
07.03.2016
Azərbaycanda ötən il ərzində 24 330 nəfər əcnəbi və vətəndaşlığı olmayan şəxs ölkədən xaric edilib, onlardan 19 340 nəfəri 48 saat vaxt verilməklə ölkədən çıxarılıb.
Ölkə.Az APA-ya istinadən bildirir ki, bu barədə Nazirlər Kabinetinin 2015-ci il üzrə fəaliyyəti barədə hesabatında deyilib.
Buna səbəb həmin şəxslərin ölkə ərazisində olma, müvəqqəti və daimi yaşama qaydalarına əməl etməməsi, habelə etibarsız sənədlərlə yaşama qaydalarını pozmaları olub. Hesabatda o da bildirilir ki, ötən il ərzində 2039 nəfər əcnəbi və vətəndaşlığı olmayan şəxsin əsas olduğu üçün ölkə ərazisində yaşaması leqallaşdırılıb. Ümumilikdə ölkədə yaşayan əcnəbilərin və vətəndaşlığı olmayan şəxslərin sayı 120 103 nəfərdir.
Son üç ildə 33 min nəfər diplom alıb
08.03.2016
Son 23 il ərzində Azərbaycanda ali və orta ixtisas təhsili alan 339388 nəfər diplom alıb.
Trend "Tələbə-məzun" Dövlət Elektron Məlumat Sisteminə 2015-ci ilin 25 noyabr tarixinə qədər təhsil müəssisələri tərəfindən tələbə kontingentinin idarə edilməsi üzrə sistemə daxil edilmiş məlumatlara istinadən bildirir ki, həmin tələbələrin 207237-si ali təhsilin bakalavriat, 19902-si magistratura, 63815 nəfər tam orta təhsil bazasında, 48434 nəfər isə ümumi orta təhsili bazasında orta ixtisas pilləsi üzrə diplom alıb.
Ötən il Azərbaycanda 115,9 min yeni iş yeri açılıb
08.03.2016
Dövlət Statistika Komitəsinin məlumatı.
Regionların sosial-iqtisadi inkişafına istiqamətlənmiş üçüncü Dövlət Proqramının icrasını əhatə edən (1.01.2014 - 1.01.2016) dövr ərzində respublikada ümumilikdə 243,2 min olmaqla, 196,2 min daimi iş yeri yaradılıb.
Ölkə.Az-ın məlumatına görə, Dövlət Statistika Komitəsindən AzərTAc-a bildirilib ki, 2015-ci ildə ölkədə 115,9 min yeni daimi iş yeri açılıb. Onların 66 faizi regionların payına düşüb. Bu dövrdə yaradılmış iş yerlərinin 75,5 faizi qeyri-dövlət sektorundadır.
Azərbaycan MDB-də ən təhlükəsiz ölkədir
09.03.2016
Hər 100 min nəfərə (277) düşən cinayət sayına görə, Azərbaycan MDB və Şərqi Avropa ölkələri arasında ən təhlükəsiz və sabit ölkədir.
Bu barədə Azərbaycan Nazirlər Kabinetinin 2015-ci il üçün hesabatında deyilir.
Keçən il ölkədə cinayətkarlıqla mübarizədə müsbət nəticələr əldə edilib, operativ vəziyyət nəzarət altında olub, - hesabatda deyilir.
Keçən il keçirilən 585 kütləvi tədbir, o cümlədən də 517 beynəlxalq tədbir zamanı ictimai təhlükəsizlik daxili işlər orqanları və daxili qoşunlar tərəfindən təmin edilib.
“TURAZ Şahini - 2016” birgə uçuş təlimləri başladı
09.03.2016
“TURAZ Şahini - 2016” birgə taktiki-uçuş təlimləri başlayıb.
Ölkə.Az Müdafiə Nazirliyinin saytına istinadən xəbər verir ki, Azərbaycanla Türkiyə arasında illik hərbi əməkdaşlıq haqqında plana əsasən, Konya şəhərində iki ölkənin Hərbi Hava Qüvvələrinin cəlb olunduğu birgə taktiki-uçuş təlimləri başlayıb.
Keçirilən təlimlərin əsas məqsədi Azərbaycan və Türkiyə Silahlı Qüvvələri arasında təcrübə mübadiləsini həyata keçirməklə, iki ölkənin Hərbi Hava Qüvvələrinin qarşılıqlı fəaliyyətinə nail olmaqdır.
Baş prokurordan “MTN işi” ilə bağlı — QƏRAR
09.03.2016
“MTN işi” ilə bağlı başlanılan cinayət işi üzrə ibtidai istintaqın müddəti artırılıb.
Ölkə.Az APA-ya istinadən xəbər verir ki, bununla bağlı baş prokuror Zakir Qaralov tərəfindən qərar qəbul edilib. Qərara əsasən, istintaqın müddəti iyunun 17-dək uzadılıb.
Cinayət işi üzrə istintaqın başlanması barədə qərar ötən il oktyabrın 17-də verilib. Cinayət işi üzrə istintaq Baş Prokurorluğun Ağır Cinayətlərə dair İşlər üzrə İstintaq İdarəsi tərəfindən həyata keçirilir. İş üzrə 20 nəfərdən çox şəxs həbs edilib.
Rəşad Məmmədovun həbs müddəti uzadıldı
09.03.2016
Dövlət Bayrağı Meydanı Kompleksinin sabiq rəisi Rəşad Məmmədovun həbs müddəti uzadılıb.
Ölkə.Az xəbər verir ki, bu barədə APA-ya məlumat verən R.Məmmədovun vəkili Akif Əlizadə bildirib ki, Səbayel rayon Məhkəməsi həbs müddətinin iyunun 12-dək uzadılması barədə qərar qəbul edib.
A.Əlizadə baş prokuror Zakir Qaralovun cinayət işi üzrə istintaqın müddətinin də uzadılması barədə qərar qəbul etdiyini deyib.
Azərbaycanda 103 nəfər vətəndaşlıqdan çıxarılıb
09.03.2016
Ötən ilin yekunları.
2015-ci ildə 422 nəfər Azərbaycan vətəndaşlığına qəbul edilib, 7 nəfərin isə vətəndaşlığı bərpa olunub.
Ölkə.Az xəbər verir ki, bu barədə Nazirlər Kabinetinin 2015-ci il üzrə hesabatında bildirilib.
Eyni zamanda 2015-ci ildə aparılan araşdırmalar nəticəsində 103 nəfərin Azərbaycan vətəndaşlığına xitam verilib, onlar vətəndaşlıqdan xaric edilib.
Qeyd edək ki, hesabat martın 15-də Milli Məclisdə müzakirəyə çıxarılacaq.
Bakıda atəşfəşanlıq olacaq
10.03.2016
Bakıda “İlaxır çərşənbə” bayramı keçiriləcək.
Bu barədə Ölkə.Az-a Bakı Şəhər İcra Hakimiyyətindən məlumat verilib.
Məlumatda qeyd olunur ki, 15 mart 2016-cı il tarixdə Mərkəzi Parkda Bakı Şəhər İcra Hakimiyyəti xalqımızın Milli bayramı - “İlaxır çərşənbə” gününü təntənəli şəkildə təşkil edəcək:
“Martın 15-də saat 10.30-da metronun “İçərişəhər” stansiyası və Bakı Şəhər İcra Hakimiyyəti binasının arasındakı sahədən Novruz personajları – Dədə Qorqud, Bahar qızı, Kosa, Keçəl və musiqi qruplarının iştirakı ilə dəvələr, süvarilər faytonların müşayiətilə böyük karvan Suraxanı “Atəşgahı”na yola düşəcək.
Universitetlərdə bu ixtisas ləğv olundu
10.03.2016
Azərbaycan Nazirlər Kabineti "Ali təhsilin bakalavriat səviyyəsi ixtisaslarının (proqramlarının) Təsnifatı"nın təsdiq edilməsi haqqında" qərarında dəyişikliklər edib.
Qərarı baş nazir Artur Rasi-zadə imzalayıb.
Dəyişiklik "ADA" Universitetinin təklifi nəzərə alınaraq edilib.
Dəyişikliyə əsasən, təsnifatın "Texniki və Texnoloji İxtisaslar Qrup"unda yer alan İnformasiya texnologiyaları və sistemləri mühəndisliyi ixtisası ləğv edilib.
Əvəzində isə İnformasiya texnologiyaları və Sistem mühəndisliyi ixtisasları yaradılıb.
Martın 23-də Ay tutulacaq
10.03.2016
2016-cı ilin ilk Ay tutulması hadisəsi martın 23-də qeydə alınacaq.
Ölkə.Az Elmlər Akademiyasının rəsmi saytına istinadən xəbər verir ki, bu barədə məlumat verən AMEA Şamaxı Astrofizika Rəsədxanasının direktor müavini, fizika üzrə fəlsəfə doktoru Xıdır Mikayılovun sözlərinə görə, ilk Ay tutulması saat 13:42-də başlayacaq, hadisənin maksimumu 15:48-də olacaq, 17:54-də isə başa çatacaq. Bu tutulmalar kölgəvari sayıldığından bu prosesi gözlə görmək mümkün olmayacaq. Tutulma Sakit Okean, Asiya, Avstraliya, Meksika, Cənubi Amerika və Antraktidada müşahidə olunacaq.
Prezidentə təqdim edilən siyahıda 140-a yaxın məhbusun adı var
11.03.2016
Azərbaycan Respublikasının Prezidenti yanında Əfv Məsələləri Komissiyasının qəbul etdiyi tövsiyə xarakterli qərarlar dövlət başçısı İlham Əliyevə göndərilib.
Ölkə.Az xəbər verir ki, bu barədə Dövlət Komissiyasından məlumat verilib.
"Bütövlükdə, Əfv Məsələləri Komissiyasının iclaslarında 400 müraciətə baxılıb. Tövsiyə xarakterli qərarlar siyahısı Azərbaycan Prezidentinə təqdim olunub. Dövlət başçısına təqdim edilən siyahıda 140 nəfərə yaxın məhbusun adı var", - Komissiyadan bildirilib.
Qeyd edək ki, Novruz bayramı ərəfəsində Prezident İlham Əliyevin növbəti əfv fərmanı imzalayacağı gözlənilir.
Məhkəmə Cahangir Hacıyevin şikayətini təmin etdi
11.03.2016
Bu gün Səbail rayon Məhkəməsində Azərbaycan Beynəlxalq Bankının İdarə Heyətinin həbsdə olan sabiq sədri Cahangir Hacıyevin vəkili Aqil Layıcovun Baş Prokurorluğun qərarının mübahisələndirilməsi ilə bağlı verdiyi müraciətə baxılıb.
Ölkə.Az Trend-ə istinadən xəbər verir ki, hakim Rauf Əhmədovun sədrliyi ilə keçirilən prosesdə müraciət araşdırılıb və qərar qanunsuz hesab edilərək vəkilin şikayəti təmin edilib.
Qeyd edək ki, C.Hacıyev ötən il dekabrın 30-da istintaq hərəkətlərilə əlaqədar 10 gün müddətinə Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinə köçürülsə də, Baş Prokurorluğun qərarı ilə orada 21 gün (11 gün artıq) saxlanılıb.
ATV-də iki veriliş bağlandı
11.03.2016
ATV telekanalında yayımlanan “Mənim mətbəxim” və “Duz və istiot” verilişləri yayımını dayandırıb.
Ölkə.Az oxu.az-a istinadən xəbər verir ki, “Mənim mətbəxim” verilişi həftənin bazar günləri saat 13:30-da müğənni Niyam Salaminin təqdimatında yayımlanırdı.
Ötən il oktyabrından təqdim olunan “Duz və istiot” proqramının aparıcısı isə əməkdar artist Zöhrə Abdullayeva idi.
Hər iki verilişin dayanmasına səbəb sponsorlarla müqavilə vaxtının bitməsi olub.
Mart ayının pensiyaları vaxtından əvvəl veriləcək
11.03.2016
Mart ayı üçün pensiyaların maliyyələşdirilməsində heç bir gecikmə yoxdur.
Ölkə.Az xəbər verir ki, bu barədə Dövlət Sosial Müdafiə Fondunun (DSMF) mətbuat xidmətinin rəhbəri Əmrah Fəqanoğlu bildirib.
Onun sözlərinə görə, ölkə üzrə bu proses qrafikdə nəzərdə tutulan vaxtdan əvvəl başa çatdırılacaq.
Azərbaycanda yay vaxtına keçid ləğv olunacaq
11.03.2016
Bu gün Azərbaycan Milli Elmlər Akademiyası (AMEA) Rəyasət Heyətində Azərbaycan ərazisində yay-qış vaxtına keçid məsələsinin müzakirəsinə həsr olunmuş iclas keçirilib.
AMEA-nın mətbuat xidmətindən Ölkə.Az-a verilən xəbərə görə, tədbirdə AMEA prezidenti, akademik Akif Əlizadə ölkə prezidenti İlham Əliyevin ölkədə yay-qış vaxtına keçilməsi ilə bağlı xüsusi tapşırıq verdiyini qeyd edərək, AMEA alimlərini bu məsələ haqqında elmi əsaslarla çıxış etməyə dəvət edib.
Ölkəmizə gələn əcnəbilərin sayı artıb
11.03.2016
Sosial Müdafiə Fondunun fərdi uçot sistemində qeydiyyata alınan əcnəbilərin sayı artıb.
Dövlət Sosial Müdafiə Fondundan verilən məlumata görə, 2016-cı ilin martın 1-i tarixinə olan statistikaya əsasən, cari ilin əvvəli ilə müqayisədə Dövlət Sosial Müdafiə Fondunun fərdi uçot sistemində qeydiyyata alınan əcnəbilərin sayı 3,71 faiz artıb. Fevral ayı ərzində əlavə olaraq 688 nəfər əcnəbi vətəndaş qeydiyyata alınıb və nəticədə fərdi uçot sistemindəki əcnəbilərin sayı 28 903 nəfərə yüksəlib.
Dövlət sosial sığorta sistemində fərdi şəxsi hesabı olan əcnəbilərin 87,83 faizini (25 385 nəfər) kişilər, 12,17 faizini (3 518 nəfər) isə qadınlar təşkil edir.
Ümumilikdə 118 ölkənin vətəndaşlarını əhatə edən əcnəbilər arasında ən yüksək say göstəricisi Тürkiyə Respublikası vətəndaşları (14 053 nəfər) üzrə müşahidə olunur. Fərdi uçot sistemində qeydiyyata alınan əcnəbilərin sayına görə ikinci yerdə gələn Gürcüstan Respublikası vətəndaşlarının sayı 3 068 nəfərə, üçüncü yerdə gələn Rusiya Federasiyasının vətəndaşlarının sayı isə 1 749 nəfərə çatıb.
Azərbaycanda Daxili Qoşunlar Günüdür
12.03.2016
Bu gün Azərbaycanda Daxili Qoşunlar Günüdür.
Daxili Qoşunlar 1991-ci ildə Azərbaycan Respublikası Prezidentinin fərmanı ilə yaradılıb.
Daxili Qoşunların funksiyaları, vəzifələri, fəaliyyətinin əsas prinsipləri “Daxili Qoşunların statusu haqqında" Azərbaycan Respublikasının 1994-cü il tarixli Qanunu ilə müəyyən olunub.
Daxili Qoşunların Komandanı birbaşa Daxili İşlər Nazirinə tabedir və onun müavinidir.
Azərbaycan Respublikası Prezidentinin 2002-ci il 11 mart tarixli fərmanları ilə «Daxili İşlər Nazirliyinin Daxili Qoşunlarının Hərbi Hissəsinin Döyüş Bayrağı haqqında» Əsasnamə, «Azərbaycan Respublikası Daxili İşlər Nazirliyinin Daxili Qoşunlarının Döyüş Bayrağının təsviri», «Azərbaycan Respublikası Daxili İşlər Nazirliyinin Daxili Qoşunlarının emblemi haqqında» Əsasnamə və «Azərbaycan Respublikası Daxili İşlər Nazirliyinin Daxili Qoşunlarının emblemi» təsdiq olunmuşdur.
Daxili İşlər Nazirliyi işçi axtarır
12.03.2016
2016-cı il martın 16-da saat 12:00-da Azərbaycanın daxili işlər naziri general-polkovnik Ramil Usubov tərəfindən Bərdə, Ağcabədi, Tərtər, Ağdam, Şuşa, Laçın, Beyləqan, Füzuli, Xocavənd, Goranboy, Naftalan və Xocalı şəhər, rayon polis orqanlarında vakant olan sıravi və kiçik rəis heyəti vəzifələrində xidmətə qəbulla bağlı Bərdə rayon Polis Şöbəsində sıra baxışı keçiriləcək.
Daxili İşlər Nazirliyindən Ölkə.Az-a verilən məlumata görə, sıra baxışında müddətli həqiqi hərbi xidmət keçmiş, ali və ya orta-ixtisas, yaxud tam orta təhsilli, boyu 175 santimetrdən yuxarı, yaşı 20-dən 24-dək olan, özü və yaxın qohumları məhkum olunmamış, atletik cüssəli Azərbaycan vətəndaşları iştirak edə bilərlər.
Azərbaycan və Türkiyə hərbi pilotları uçuş keçirdi
12.03.2016
"TURAZ Şahini - 2016" birgə taktiki-uçuş təlimləri davam edir.
Müdafiə Nazirliyinin mətbuat xidmətindən verilən məlumata görə, təlimlərin ssenarisinə əsasən Azərbaycan və Türkiyə Hərbi Hava Qüvvələrinin pilotları ətrafı tanıma uçuşlarını icra ediblər.
Uçuşlardan əvvəl təyyarəçilər üçün brifinq təşkil olunub, hava şəraiti və digər texniki məsələlər müzakirə edilib.
Sonra türkiyəli pilotlar Miq-29 qırıcı və Su-25 hücum, azərbaycanlı hərbi təyyarəçilər isə F-16 qırıcı təyyarələrində uçuşlar keçiriblər.
Təlimlər davam edir.
