Kanberrada “Azərbaycan günü” keçirilib
23 mart 2016-cı il tarixində Avstraliyanın paytaxtı Kanberra şəhərində “Hellenic Club”da Səfirlik tərəfindən “Azərbaycan günü” adlı Novruz bayramına həsr edilmiş tədbir keçirilmişdir. Tədbirdə 300 nəfərdən çox qonaq iştirak etmişdir.
Beynəlxalq Qadınlar Klubu (Women’s International Club) ilə əməkdaşlıq çərçivəsində Səfirlik tərəfindən təşkil olunmuş tədbirə qatılan qonaqlara ölkəmizin turizm imkanlarını, tarixini özündə əks etdirən video çarxlar nümayiş etdirlikdikdən sonra, səfirliyin əməkdaşları Araz Xasıyev və Ləman Xasıyeva tərəfindən Azərbaycana aid geniş təqdimat həyata keçirilmişdir. Təqdimat zamanı iştirakçıların çoxsaylı sualları cavablandırılmışdır.
Təqdimatdan sonra avstraliyalı rəqqasə Körsti Dunkanın ifasında bir neçə milli Azərbaycan rəqsi nümunəsi, daha sonra isə tarda Azərbaycan bəstəkarlarının əsərlərindən ibarət nümunələr qonaqlara tədim edilmiş, Mədəniyyət və Turizm nazirliyi tərəfindən hazırlanmış iyirmidən çox müxtəlif səpkili broşür və məlumat kitabçaları, Novruz bayramı ilə əlaqədar olaraq hazırlanmış milli şirniyyat nümunələri təqdim olunmuş, milli geyim dəstləri, əl işi xalçalar, qədim Azərbaycan qonaq otağı, azərbaycanlı rəssamların əsərlərindən ibarət qarışıq sərgi nümayiş etdirilmişdir.
Qonaq qismində tədbirdə diplomatik korpusun, Kanberrada fəaliyyətl göstərən qadın təşkilatlarının, ictimaiyyət nümayəndələri iştirak etmişlər.
Tədbir iştirakçılar tərəfindən böyük rəğbətlə qarşılanmışdır.
