Həftənin icmalı
Bakıdakı çoxmərtəbəli binalarda seysmik monitorinq sistemi qurulacaq
19.03.2016
Bu il Bakıdakı hündürmərtəbəli binalarda seysmik monitorinq sistemi qurulacaq.
Ölkə.Az xəbər verir ki, bunu Report-a açıqlamasında Azərbaycan Milli Elmlər Akademiyasının (AMEA) Respublika Seysmoloji Xidmət Mərkəzinin baş direktoru Qurban Yetirmişli deyib.
O bildirib ki, yaxın vaxtlarda Almaniya mütəxəssisləri Azərbaycana gələcək:
“Layihə almanların maliyyə dəstəyi ilə həyata keçiriləcək. Onlar gələndə iş qrafiki qurulacaq, planlama aparılacaq və işin nə vaxtdan başlayacağı təyin olunacaq. Yəqin ki, ilin ikinci yarısından sonra bu işlər başlayacaq”.
Azərbaycana bahar gəlib
20.03.2016
Azərbaycana bahar gəlib.
Ölkə.Az xəbər verir ki, AMEA Şamaxı Astrofizika Rəsədxanasının direktor müavini, fizika üzrə fəlsəfə doktoru Xıdır Mikayılov APA-ya bildirib ki, bu il Azərbaycan ərazisində baharın gəlişi martın 20-də, Bakı vaxtı ilə təxminən saat 08.30 radələrində baş verib. O bildirib ki, martın 19-da Günəş səmanın cənub yarımkürəsindən şimal yarımkürəsinə keçid edəcək: “Həmin an Günəş Yerin hərəkət müstəvisi ilə Yerin ekvator müstəvisinin kəsişdiyi nöqtədə olacaq. Bu nöqtəyə astronomiyada “yaz bərabərliyi nöqtəsi” deyilir”.
Silahlı Qüvvələrdə "Açıq qapı" günü keçirildi
20.03.2016
Bu gün saat 10.00-da müdafiə naziri Zakir Həsənovun tapşırığına əsasən, Novruz bayramı münasibətilə bütün hərbi hissələrdə əsgər valideynləri və yaxınları üçün "Açıq qapı" günü keçirilir.
Ölkə.Az-ın Müdafiə Nazirliyinin saytına istinadən verdiyi məlumata görə, gün ərzində ziyarətçilərə, ictimaiyyət, kütləvi informasiya vasitələrinin nümayəndələrinə hərbi hissələrdə yaradılan yaşayış və məişət şəraiti ilə yaxından tanış olmaq, xidməti, inzibati binalara, eləcə də əsgər yataqxanaları və yeməkxanalarına baş çəkmək üçün şərait yaradılacaq.
Azərbaycan Novruz bayramını qeyd edir
20.03.2016
Bahar fəsli Azərbaycana bu il martın 20-də saat 08.30-də daxil olub.
Dünyanın bir çox ölkələrində olduğu kimi, Azərbaycanda da bu gün Novruz bayramını qeyd edilir.
Olke.Az-ın məlumatına görə, Novruz yazın gəlişinin simvolu olan qədim xalq bayramıdır, mənası “Yeni gün”dür.
Novruz Şimal yarımkürəsində astronomik yazın başlandığı, gecə-gündüz bərabərliyi günündə (martın 20-si, 21-i və ya 22-də) keçirilir. Bir sıra xalqlar yaz fəslinin gəlməsini təbiətin canlanması ilə bağlayıb, bu münasibətlə şənliklər keçirib, onu yeni ilin başlanğıcı kimi bayram ediblər.
Azərbaycan-Gürcüstan sərhədində sıxlıq yaranıb
20.03.2016
İnsanlar keçid üçün icazənin verilməsini gözləyir.
Azərbaycanın “Sınıq Körpü” gömrük keçid məntəqəsində çiddi problemlərin yarandığı bildirilir.
Ölkə.Az-ın xəbərinə görə, bu barədə musavat.com-a oxuculardan biri məlumat verib.
Oxucunun verdiyi məlumata görə, hazırda “Sınıq Körpü” gömrük keçid məntəqəsindən heç kəsə keçməyə icazə verilmir. Ona görə də, gömrük keçid məntəqəsində uzun növbə yaranıb.
Azərbaycan və Rusiya arasında ilk çarter reysi açılır
21.03.2016
Aprelin 29-dan Azərbaycan və Rusiya arasında Ulyanovsk-Bakı çarter aviareysi açılır.
Bunu Trend-ə Rusiyanın Ulyanovsk vilayətinin Turizm Sənaye Assosiasiyasının prezidenti Yuliya Uba deyib.
Onun sözlərinə görə, reys mövsümidir, lakin gələcəkdə tələbat olarsa, bu marşrut üzrə uçuşlar daimi əsasda həyata keçiriləcək: "İl ərzində AZAL ilə bu cür imkanı müzakirə etdik, çünki Azərbaycanda çox yaxşı dağ-xizək kurortları da var".
Azərbaycan ordusu yeni silahla silahlanacaq
21.03.2016
Azərbaycan Türkiyənin yeni istehsal etdiyi milli tüfəngi öz arsenalına qata bilər.
Ölkə.az xəbər verir ki, türk mediasının məlumatına görə, bu Türkiyənin yeni istehsal etdiyi MPT-76 avtomatik silahıdır.
Türkiyənin Makina və Kimya Sənayesi Qurumu (MKEK) tərəfindən istehsal edilən milli piyada tüfənginə maraq olduqca böyükdür. Silah fabrikinin istehsal rəhbəri Mehmet Dəmirəl bu barədə açıqlama verib. Onun sözlərinə görə, tüfəngə Azərbaycandan başqa ABŞ, Çili kimi ölkələrdəndə tələb var.
BMT baş katibi Novruzu qeyd edən xalqları bayram münasibəti ilə təbrik edib
22.03.2016
“Bu bayram xoş niyyət bağları ilə icmaları birləşdirir”.
Novruz müasir aktuallığı ilə qədim bir ənənədir. Onun dostluq, həmrəylik və ətraf mühitə hörmət ruhu BMT-nin dəyərləri ilə güclü uyğunluq təşkil edir.
Ölkə.Az-ın APA-ya istinadən məlumatına görə, bu sözləri BMT baş katibi Pan Ki Munun Beynəlxalq Novruz Günü ilə bağlı mesajında deyilir.
Onun sözlərinə görə, Novruz milli sərhədləri, dini ayrılıqları və digər fərqlilikləri aşaraq xoş niyyət bağları ilə icmaları birləşdirir:
“Bu cür ümumi məqsədlər insanlığın inkişaf etməsinə kömək edə bilər”.
Azərbaycan aeroportlarında təhlükəsizlik tədbirləri gücləndirilib
22.03.2016
Brüsseldə baş vermiş terror aktları ilə əlaqədar.
“Azərbaycan Hava Yolları” QSC (AZAL) Heydər Əliyev Beynəlxalq Hava Limanında, eləcə də ölkənin regionlarındakı aeroportlarda təhlükəsizlik tədbirlərini gücləndirib.
Ölkə.Az-ın məlumatına görə, bunu Trend-ə AZAL-ın mətbuat xidmətinin rəhbəri Paşa Kəsəmənski deyib.
P.Kəsəmənski qeyd edib ki, bu gün Brüssel aeroportunda baş vermiş terror aktı ilə əlaqədar olaraq, AZAL rəhbərliyinin tapşırığı ilə müvafiq tədbirlər görülüb.
Onun sözlərinə görə, ölkə aeroportlarının bütün təhlükəsizlik xidmətləri işçiləri aviasiya təhlükəsizliyi rejiminin gücləndirilməsi ilə əlaqədar təlimat alıblar.
İntiqam Əliyev azadlığa buraxıla bilər — Zakir Qaralov protest verib
24.03.2016
Baş prokuror Zakir Qaralov hüquq müdafiəçisi İntiqam Əliyevə verilən cəzanı ağır hesab edib.
Ölkə.Az xəbər verir ki, bu barədə vəkil Cavad Cavadov məlumat verib.
O bildirib ki, Baş prokuror İntiqam Əliyev barəsində seçilən cəzanın ağır olmasına dair əlavə kassasiya protesti ilə Ali Məhkəməyə müraciət edib: "Martın 28-i saat 12-ə plenum təyin olunub. İntiqam Əliyev həmin gün buraxıla bilər".
Keçmiş MTN generalı apellyasiya şikayəti verib
24.03.2016
Ləğv edilmiş Milli Təhlükəsizlik Nazirliyinin (MTN) Transmilli İqtisadi Cinayətkarlığa Qarşı Mübarizə Baş İdarəsinin (TİCQMBİ) sabiq rəisi, general-mayor Sübahir Qurbanov barəsində seçilmiş həbs qətimkan tədbirinin müddətinin uzadılmasına dair Səbail Rayon Məhkəməsinin qərarından apellyasiya şikayəti verib.
Ölkə.Az xəbər verir ki, Report-un əldə etdiyi məlumata görə, Bakı Apellyasiya Məhkəməsində keçiriləcək proses martın 28-nə təyin edilib.
İşə hakim Vaqif Mursaqulovun sədrliyi ilə baxılacaq.
Azərbaycanda işsizlərin 38,1 faizi qadınlardır
24.03.2016
Azərbaycanda işsizlərin 38,1 faizi qadınlardır.
Dövlət Statistika Komitəsindən verilən məlumata görə, 2016-cı il mart ayının 1-i vəziyyətinə məşğulluq xidməti orqanları tərəfindən ölkə üzrə rəsmi işsiz statusu verilmiş şəxslərin sayı 30,6 min nəfər olub.
İşsizliyə görə müavinətin orta məbləği 263,1 manat olub.
Azərbaycanda 173 mindən çox muzdlu işçi var
24.03.2016
Bu ilin yanvar ayında sənayedə çalışan muzdlu işçilərin sayı 173,4 min nəfər təşkil edib.
Dövlət Statistika Komitəsindən verilən məlumata görə, onların 33,9 min nəfəri mədənçıxarma, 88,7 min nəfəri emal, 25,6 min nəfəri elektrik enerjisi, qaz və buxar istehsalı, bölüşdürülməsi və təchizatı, 25,2 min nəfəri isə su təchizatı, tullantıların təmizlənməsi və emalı bölmələrində çalışıb.
Yanvar ayında sənayedə işləyənlərin orta aylıq əmək haqqı 33,3 faiz artaraq 939,2 manata çatmışdır. Artımın əsas səbəbi mədənçıxarma sənayesində xarici investisiyalı müəssisələrdə çalışan əcnəbi işçilərə hesablanmış əmək haqlarının devalvasiya ilə əlaqədar milli valyuta ekvivalentində artması olmuşdur.
Bakının bütün avtobuslarında gediş haqqı kartla ödəniləcək
25.03.2016
Azərbaycanda ictimai nəqliyyatda gediş haqqını ödəmək üçün "BakıKart"ları hazırda gedişin nağd ödənildiyi avtobuslarda istifadə etmək mümkün olacaq. Bunu Trend-ə "BakıKart" layihəsinin rəhbəri Ceyhun Əliyev deyib.
Onun sözlərinə görə, hazırda Bakının bütün avtobuslarında gediş haqqının nağdsız ödənişinin tətbiqi məsələsi müzakirə edilir.
C.Əliyev qeyd edib: "Ümid edirik ki, növbəti mərhələdə "BakıKart" kartları digər özəl nəqliyyat şirkətlərinin avtobuslarında da gediş haqqını ödəmək üçün istifadə ediləcək".
Xatırladaq ki, hazırda "BakıKart"lar Bakı Metropolitenində və "BakuBus" nəqliyyat şirkətinin 8 marşrutunda gediş haqqını ödəmək üçün istifadə olunur.
Azərbaycan daha bir şəhid verdi
26.03.2016
Martın 25-də qoşunların təmas xəttində işğalçılarla döyüşdə Azərbaycan Silahlı Qüvvələrinin hərbi qulluqçusu kiçik çavuş Abbaszadə Elşad Raquf oğlu həlak olub.
Bu barədə Ölkə.Az-a Müdafiə Nazirliyinin mətbuat xidmətindən məlumat verilib.
Müdafiə Nazirliyinin rəhbərliyi şəhidin yaxınları və əzizlərinə dərin hüznlə baş sağlığı verir və səbr diləyir!
Müdafiə naziri general-polkovnik Zakir Həsənovun əmri ilə kiçik çavuş E.Abbaszadə ölümündən sonra "Hərbi xidmətdə fərqlənməyə görə" 3-cü dərəcəli medalı ilə təltif edilib.
Qarşı tərəfin itkiləri dəqiqləşdirilir.
Bakı metrosunda əməliyyat — Metronun hava borusuna girmək istəyən əcnəbi yaxalandı
26.03.2016
Bakı metrosunda keçirilmiş əməliyyatla bağlı Azərbaycan Respublikası Daxili İşlər Nazirliyi (DİN) və Baş Prokurorluq birgə məlumat yayıb.
DİN-in və Baş Prokurorluğunun Mətbuat Xidmətlərindən Ölkə.Az-a verilən məlumatda bildirilir ki, 2016-cı il mart ayının 25-i saat 01.30 radələrində Daxili İşlər Nazirliyinin Əlahiddə Çevik Polis Alayının əməkdaşları tərəfindən paytaxtın Nəsimi rayonunda Bakı Metropoliteninin havalandırma sisteminin borusu ilə həmin obyektə keçmək üçün orada olan dəmir barmaqlıqları xüsusi alətlə kəsmək istəyən Belarus Respublikasının vətəndaşı İlyevskiy Sergey Timofeyeviç saxlanılıb.
