Razi Nurullayev: “5.7 milyard qeyri müsəlmanı öldürmək lazımdır?”
“Pakistanın Lahore vilayətində çox saylı insan tələfatına səbəb olan terror aktını pislədiyirəm. Bu terror aktının xristianlara qarşı törədilməsinin Taliban tərəfindən etiraf edilməsi və ona haqq qazandırılması çox sarsıdıcıdır. Terrorun bütün formaları və səbəbləri iyrəncdir və yolverilməzdir”.
Ölkə.Az xəbər verir ki, bunu Azərbaycan Xalq Cəbhəsi Partiyasının sədri Razi Nurullayev Pakistanda baş verən terrakta bağlı açıqlamasında dyeib. Sədr qeyd edib ki, Pakistan Azərbaycana qardaş ölkədir, strateji müttəfiqdir, müstəqilliyimizi tanıyan ikinci ölkədir və bunun üçün də daha çox üzülürəm:
“Pakistan xalqına sülh və əminamanlıq, terrordan, şər və xətadan uzaq həyat arzulayıram. Ümumiyyətlə, dini zəmində törədilən bu vəhşilik barədə düşüncələrimi paylaşmaq istəyirəm. 2016-cı ilin mart ayına olan hesablamalara görə dünya əhalisinin sayı 7.4 milyard nəfərdir. 2015-ci ilin statistikasına görə dünyada 1.7 milyard nəfərdən çox müsəlman yaşayır ki, bu da dünya əhalisinin 23.4%-ni təşkil edir. Xristianların sayı isə 2.2 milyard nəfərdən çoxdur. 1 milayrd hinduizm dininə, 376 milyon buddizm dininə məxsus şəxs var. Qısası dünya əhalisnin ümumi sayından müsəlmanları çıxanda 5.7 milyard insan qalır. İndi belə çıxır ki, bu 5.7 milyard insanı öldürmək lazımdır? Onlar müsəlman deyillər deyə, hamısı cəhənnəmdə yanacaqlar və bu dünyada adam partladanlar, kamikadzelik edib günahsız qan axıdanlar, din pərdəsi altında min oyundan çıxanlar cənnətlə müjdələnəcklər? Bütün insanları Allah yaradıb. Xristian, Buddist, Hinduist, İudaist və digər dində doğulan uşaqlar da Allahın bəndələridir və müsəlman doğulmadıqlarına görə də günahkar deyillər. Əgər düşünənlər varsa ki, onlar ağıl-kamala çatanda müsəlman olmalıydılar, bu da yanlışdır. Çünki, İslam dininin adını artıq terrorla eyniləşdiriblər. Müsəlman qaydaları - müqəddəs Qurani-Kərimin ayələrinə daha çox xristian və digər dinlərin cəmiyyətlərində riayət edilir və şəriət qanunları da ən çox elə müsəlman cəmiyyətlərində pozulur. Etiraz edənlər olacaq ki, terroru müsəlmanlar etmir, onları Amerika, İngiltərə idarə edir, bütün terror təşkilatlarını xristianlar yaradıb. Qəbul edək bunu, o zaman, özümüz özümüzü təkzib etmiş oluruq. Əgər on minlərlə müsəlman haqq yolundan cayıb, nahaq yola yuvarlanırsa, yüz minlərlə müsəlman İslam dinini öz mənafeyinə uyğun və siyasi məqsədlər üçün istifadə edirsə, günahı özümüzdə aramalıyıq. Amerika bizə desə ki, gəl özünü Sakit okeana at, atmalıyıq?”
AXCP sədri siyasətçi olduğu üçün belə həssas məsələylə bağlı fikirlərini tap aça bilmədiyini bildirib:
“Əfsus ki, siyasətçi olduğum və bu mövzunun da həssaslığını nəzərə alaraq hər şeyi çılpaqlığı ilə deyə və yaza bilmirəm. Müsəlman olduğum və İslam dininə mənsub olduğum üçün şadam. Allahıma, Peyğəmbərimə və göndərdiyi Qurani-Kərimə inanıram. Həm də inanıram ki, Allahın göndərdiyi müqəddəs kitaba Allahın buyurduğu qaydada əməl etmirik. Əksər namaz qılanlar və din adamları içki içməyə ən böyük haram kimi baxırlar, lakin ondan da ağır günah olan zinanı edirlər. Hətta, zina etmək üçün “siğə” də düşünüblər. Bu yaxınlarda mənə dedilər ki, indi mollalar mobil telefonla siğə edirlər. Adam mollanı yığır və mikrofona qoyur, o da ərəb dilində dua oxuyur və zinanı “qanuniləşdirir”. Müqəddəs kitabımızda ən böüyk günah qeybət sayılır. Qeybət etmək ən böyük və bağışlanılmaz günahdır. Həyatımda qeybət etməyən adam görməmişəm. Terror çox böyük günahdır. Günahsız adamları “Allahü-əkbər” deyib partlatmaq, şikəst etmək böyük suçdur”.
