TQDK-nın keçmiş sədri ləğv edilmiş komissiyanın yerinə yaradılmış qurumdan danışdı
Prezident İlham Əliyev aprelin 11-də Azərbaycan Respublikasının Dövlət İmtahan Mərkəzi publik hüquqi şəxsin yaradılması haqqında Fərman imzalayıb.
Fərman nəticəsində Dövlət Qulluğu Məsələləri üzrə Komissiya və Azərbaycan Respublikasının Tələbə Qəbulu üzrə Dövlət Komissiyası ləğv edilib, bunun yerində Dövlət İmtahan Mərkəzi fəaliyyət göstərəcək.
TQDK-nin ləğv edilməsi və Dövlət İmtahan Mərkəzinin yaranması barədə TQDK-nın keçmiş sədri Vurğun Əyyub Ölkə.Az-a danışıb.
"Bir qurum ləğv olunub yeni bir qurum yaradılıb. Qurumun adı dəyişdirilib. Gördüyü işlərə uyğun olaraq ad verilib. Tələbə Qəbulu üzrə Dövlət Komissiyası adından göründüyü kimi tələbə qəbulu ilə məşğul idi. Ancaq son vaxtlar bu komissiya dövlət qulluğunda işləmək istəyənlərin də seçimini aparırdı. Ona görə də, adla görünən işlər arsında bir uyğunsuzluq var idi. Bu uyğunsuzluq aradan qaldırılıb. Bəlkə də, yeni yarana qurumun səlahiyyət və funksiyaları da artırılıb.
Gələcəkdə yeni yaranan qurum necə fəaliyyət göstərəcək, buna dövlət orqanları cavab verməlidir. Yeni yaradılan qurumun ortada bir əsasnaməsi yoxdur. Əsasnamə ilə tanış olmadan yeni yaranan qurum haqqında bir söz deyə bilmərəm".
Qeyd edək ki, TQDK mərhum eks-prezident Əbülfəz Elçibəyin 21 iyul 1992-ci il tarixli 74 saylı fərmanı əsasında Nazirlər Kabineti yanında yaradılmışdı.
Səxavət Məmməd
Ölkə.Az
