Femida.az-a qarşı təxribat

“Femida 007” adlı qəzet Femida.az saytının adından sui-istifadə edərək biznes fəaliyyəti məşğuldur.

Daima şantaj və reketçilik xarakterli yazılar dərc edən “Femida 007” adlı qəzet öz saylarında Femida.az saytını qəzetin rəsmi elektron portalı kimi qeyd edib.

Qəzetin baş redaktoru Əyyub Kərimovla əlaqə saxlayıb məsələni həll etməyə çalışsaq da, hüquqşünas mövqeyi deyil "qanuni oğru"münasibəti ilə qarşılaşdıq. Belə ki, özünü hüquqşünas adlandıran, əslində isə qeyri-qanuni əməlləri ilə ölkədə ad çıxaran Əyyub Kərimov etikadankənar davranış nümunələri sərgiləyib. O, əməkdaşımızla danışarkən heç bir etikaya sığmayan “əcəb edirəm”, “get, istədiyin yerə müraciət elə” kimi ifadələr səsləndirib.

Əslində Əyyub Kərimovdan bu cür hərəkət gözləmək ağlabatandır. Böhtan atmaqda ad çıxaran və buna görə vaxtilə haqqında dəfələrlə məhkəməşə şikayət olunan Əyyub bəy yəqin ki, öz keçmişini unudub. Azərbaycan polisini təhqir edən, onlara böhtan atan bu şəxs görünür, öz şantaj və böhtan xarakterli əməllərini indi də media orqanları üzərində yoxlamaq istəyir.

Lakin bildiririk ki, qəzetin növbəti sayında Femida.az saytının adı həmin qəzetin növbəti sayında qeyd edilərsə, məhkəməyə müraciət ediləcək.

Oxucuları xəbərdar etmək istəyirik ki, “Femida 007” adlı qəzetin Femida.az saytı ilə uzaqdan-yaxından heç bir bağlılığı yoxdur. Daima hüququ maarifləndirmə xarakterli yazılar paylaşan, Dağlıq Qarabağla bağlı mövzulara xüsusi olaraq yer ayıran Femida.az saytının belə bir qəzetin səhifələrində reklam məqsədilə istifadə edilməsi bizim imicimizə böyük zərərdir.

Qeyd edək ki, Femida.az hüquq xəbər portalı 2012-ci ilin aprelin 2-də fəaliyyətə başlayıb. Saytda hüquq və hüququn müxtəlif sahələrini əhatə edən fikirlərə, xəbərlərə yer ayrılır. Məqsəd, hüquq sahəsində yaranmış informasiya boşluğunu doldurmaq və ictimaiyyətə tərəfsiz, qərəzsiz xəbərlər vermək və eyni zamanda hüquq mədəniyyətinin yüksəldilməsidir.

Femida.az Azərbaycanda və dünyada baş verən yeniliklərə də yer ayırır. Həmçinin saytımızda müsahibələr, təhlillər, reportajlar, müəllif yazıları da işıqlandırılır. Saytımızın işinin qurulmasında və aparılmasında redaksiyanın yaradıcı kollektivi ilə yanaşı oxucular da fəal iştirak edə bilərlər. Redaksiyamızın əlaqə vasitələri ilə oxucular qarşılaşdıqları hadisələrlə bağlı redaksiyaya operativ məlumat vermək imkanları da var. Xəbər portalı 2014-cü ilin aprel ayından Mətbuat Şurasının üzvüdür.

Femida.az-ın baş redaktoru Vüsal Məmmədovdur.

Ölkə.Az