Sabirabad icra başçısı oğlu üçün tikdirdiyi imarətin izini azdırır
Sabirabadın icra başçısı Nazim İsmayılov Göyçay şəhərində oğlu Anar İsmayılov üçün tikdirdiyi imarətin torpaq sənədlərini başqasının adına keçirir.
İcra başçısının oğlu üçün tikdirdiyi imarətin torpağı məşhur azərbaycanlı iş adamı, hazırda Rusiyada iflası elan olunan Telman İsmayılovun, (AST Telman), ata yurdunun yerləşdiyi torpaq olub. Nazim İsmayılovun oğlu Anar İsmayılov üçün həmin torpaq sahəsini 70 min manata aldığı iddia olunur.
Bir neçə gün əvvəl Sabirabad icra başçısı Nazim İsmayılovun Göyçay şəhərində oğluna dəbdəbəli villa tikdirməsi ilə bağlı məlumat vermişdik. Həmin məlumatda qeyd etmişdik ki, icra başçısı Göyçay şəhər Gənclər Mərkəzinin arxasında aldığı torpaq sahəsində oğlu Anar İsmayılova imarət ucaldır.
Sabirabad rayon İcra Hakimiyyətinin başçısı Nazim İsmayılovun oğluna villa tikdirməsi xəbərindən bir müddət sonra icra başçısının oğlu Anar İsmayılov saytımızla əlaqə yaradaraq həmin ərazinin onlara məxsus olmadığını və qeyd olunan ərazidə villa tikdirmədiklərini iddia edib. Anar İsmayılov saytımıza bildirdi ki, "saytınıza informasiya verən mənbə mənimlə bağlı yalnış məlumat verib, nə o ərazi, nə də onun ətrafında bizə aid heç bir topraq sahəsi yoxdur”. İcra başçısının bu açıqlamasından sonra yenidən Göyçay şəhərindəki mənbələrimizlə əlaqə yaratdıq.
Göyçaydakı etibarlı mənbəyə istinadən xəbər veririk ki, Nazim İsmayılov və oğlu Anar İsmayılov imarət tikdirmələri barədə yayılan xəbərlərdan çox ciddi şəkildə narahat olublar. Məhz buna görə də icra başçısı oğlunu məcbur edib ki, açıqlama versin. Amma Nazim İsmayılov bununla kifayətlənməyərək, Göyçay şəhərində Gənclər Mərkəzinin arxasındakı ərazini oğlu Anar İsmayılovun adından çıxarıb başqa bir şəxsin adına sənədləşdirməyə qərar verib.
Mənbəmiz qeyd edir ki, icra başçısının oğlu üçün tikdirdiyi imarətin torpağı məşhur azərbaycanlı iş adamı, hazırda Rusiyada iflası elan olunan Telman İsmayılovun, (AST Telman), ata yurdunun yerləşdiyi torpaq olub. Ərazini başqa bir şəxs İsmayılovlardan aldıqdan sonra oradakı köhnə evi uçurub. Daha sonra isə baha qiymətə Nazim İsayılovun oğluna və digər bir şəxsə satıb.
Məlumatlı şəxs iddia edir ki, Nazim İsmayılov oğlu Anar İsmayılov üçün həmin torpaq sahəsini 70 min manata alıb. Qeyd edək ki, Göyçay şəhərində ən bahalı ərazi məhz Gənclər Mərkəzinin arxası hesab olunur.
Aldığımız məlumata görə, artıq Nazim İsmayılov oğlu üçün tikdirdiyi imarətin torpaq sahəsinin başqa bir şəxsin adına keçirilməsi prosesini başa çatdırmaqdadır və mənbə bildirir ki, həmin şəxsin kimliyini yaxın günlərdə dəqiqləşdirib saytımıza məlumat verəcək. Çox güman ki, icra başçısı yaxud oğlu torpağın onlara aid olmaması ilə bağlı sənədləri yaymaqla məsələdən qurtulmağa çalışacaqlar. Ancaq Göyçay şəhərində hər kəs yaxşı bilir ki, Anar İsmayılov özünün "Lexsus” avtomobili ilə gündə 3 dəfə tikilən imarətə baş çəkir. Bunu icra başçısının oğlu boynuna almasa da, Göyçaydakı mənbələrimiz təsdiq edir.
Bildirək ki, Sabirabad icra başçısı Nazim İsmayılovun Göyçay rayonunda böyük mal-mülk sahələri, obyektləri mövcuddur. Bu obyektlərdən ən böyüyü rayonun Heydər Əliyev prospekti 88-də yerləşən "Çinar Mehmanxana”sı, "Çinar” şadlıq evi və ətrafındakı bir neçə obyektdir. Mənbəmiz iddia edir ki, Nazim İsmayılov və oğlu bu obyektlərin onlara məxsus olmadığını iddia edirlərsə, bu "başını kola soxan” dəvə məsələsinə oxşayar.
Qeyd edək ki, Göyçay şəhərində ən dəbdəbəli otellərdən biri olan "Çinar” otel müasir standartlara cavab verən bir obyektdir. Yaxın günlərdə icra başçısının oğlu Anar İsmayılovun işlətdiyi bu obyektlərdən geniş reportaj hazırlayacağıq. Bizi izləməkdə davam edin.
Qarşı tərəfin mövqeyini verməyə hazırıq. (Azfakt.com)
