Soyuq hava şəraiti aprelin 23-dək davam edəcək
Gülşad Məmmədova: “Aprelin 23-dən etibarən havanın temperaturu 16-20 dərəcə arasında dəyişəcək”
Bir neçə gün davam edən isti hava şəraiti aprelin 21-də axşam saatlarından etibarən soyuq hava ilə əvəz olunub. İnsanlar isti paltarlarını yığışdırıb, hətta qolsuz yay paltarlarına keçmişdilərsə, yenidən isti paltarlarına qayıtmalı olublar.
Hətta aprelin 21-də günün ikinci yarısından başlamış qeyri-sabit hava şəraiti ölkənin dağlıq və dağətəyi rayonlarında qarın yağmasına səbəb olub. Belə ki, Gədəbəyin bir neçə dağ kəndinə qar yağıb. Facebook sosial şəbəkəsində qarın yağması ilə bağlı fotolar paylaşılıb.
Maraqlıdır, soyuq, küləkli hava şəraiti nə vaxta kimi davam edəcək?
Ekologiya və Təbii Sərvətlər Nazirliyinin Milli Hidrometeorologiya Departamentinin Hidrometeoroloji Proqnozlar Bürosunun direktor müavini Gülşad Məmmədova musavat.com-a açıqlamasında soyuq havanın aprelin 23-dək davam edəcəyini bildirdi: “Bir neçə gün davam edən mülayim hava şəraitindən sonra aprelin 22-dən etibarən hava şəraitinin dəyişməsi müşahidə olundu. Belə ki, güclü şimal qərb küləyi əsmiş, əksər rayonlarda şimşək çaxmış, yağış yağmış, dağlıq rayonlarda isə yağıntılar sulu qara və qara keçmişdi. Aprelin 22-də də müşahidə etdiyimiz kimi paytaxtda güclü şimal qərb küləyi əsir. Lakin axşam saatlarından başlayaraq güclü şimal-qərb küləyi tədricən mülayimləşəcək.
Havanın temperaturuna nəzər salsaq görərik ki, əvvəlki günlərə nisbətən temperatur aşağı enib. Qeyri mülayim hava şəraiti rayonlarda da aprelin 22-ə kimi müşahidə ediləcək. Lakin bu cür hava şəraiti aprelin 23-dək davam edəcək. Aprelin 23-dən başlayaraq ölkə ərazisində və gün ərzində əsasən yağmursuz keçəcəyi gözlənilir. Cənub-qərb küləkləri üstünlük təşkil edəcək və havanın temperaturu aprelin 23-dən etibarən tədricən yüksələcək”.
Əvvəlki istilərin qayıdıb, qayıtmayacağı məsələsinə gəlincə isə G.Məmmədova aprelin 23-dən etibarən paytaxtda 16-20 dərəcə isti olacağını dedi: “Ötən günlər ərzində paytaxtda havanın temperaturu 27 dərəcə, bölgələrdə 30 dərəcə təşkil etmişdi. Lakin bu gün isə havanın temperaturunun ötən günlərlə müqayisədə 10-12 dərəcə aşağı endiyini müşahidə edirik. Paytaxtda bu gün havanın temperaturunun 15-16 dərəcədən yuxarı olacağı gözlənilmir. Lakin yaxın günlərdə, belə ki, aprelin 23-dən etibarən havanın temperaturu 2-3 dərəcə yüksələrək, 16-20 dərəcə arasında dəyişəcək”.
