BMT Gəncədə forum keçirəcək
2016-cı ildə Azərbaycan BMT-nin Mərkəzi Asiya Ölkələrinin İqtisadiyyatı üçün Xüsusi Proqrama (SPECA) həmsədrlik edir. SPECA-nın növbəti İdarəetmə Şurası və İqtisadi Forumu bu ilin 4-cü rübündə Gəncə şəhərində keçiriləcək.
İqtisadiyyat Nazirliyindən verilən məlumata görə, bu barədə iqtisadiyyat naziri Şahin Mustafayevin BMT-nin Azərbaycana yeni təyin olunmuş rezident əlaqələndiricisi Qulam İsakzai ilə görüşündə bildirilib.
Görüşdə Azərbaycanın BMT-nin bir sıra proqram və ixtisaslaşmış qurumları - İnkişaf Proqramı (UNDP), Sənaye İnkişaf Təşkilatı (UNIDO), Mərkəzi Asiya Ölkələri İqtisadiyyatları üçün Xüsusi Proqramı (SPECA), Ticarət və İnkişaf üzrə Konfransı (UNCTAD) və digərləri çərçivəsində mövcud əlaqələr və əməkdaşlıq perspektivləri müzakirə edilib.
Q.İsakzaini yeni təyinatı münasibətilə təbrik edən nazir Ş.Mustafayev ölkəmizin BMT ilə əlaqələrinin yüksək səviyyədə olduğunu, Azərbaycanın 2 il müddətinə BMT Təhlükəsizlik Şurasının qeyri-daimi üzvü olduğunu xatırladıb, ölkəmizdə UNDP çərçivəsində 50-yə yaxın layihənin müvəffəqiyyətlə icra olunduğunu qeyd edib. Bildirilib ki, BMT-nin UNIDO təşkilatı ilə də ölkəmiz arasında yüksək səviyyədə əməkdaşlıq mövcuddur. UNIDO-nun təşkilatçılığı ilə 2014-cü ildə Bakıda "XXI əsrdə sənayeləşmə: Sənaye siyasətində əsas trendlər, müasir yanaşma və təcrübələr" mövzusunda Beynəlxalq Sənaye Konfransı keçirilib, tədbir çərçivəsində Azərbaycan Hökuməti və UNIDO arasında əməkdaşlığa dair Çərçivə Proqramı imzalanıb. Aprelin 25-dən 27-dək isə Bakıda BMT-nin daha bir tədbiri - Sivilizasiyalar Alyansının 7-ci Qlobal Forumu və bu forum çərçivəsində Biznes Simpozium keçiriləcək.
Görüşdə Ermənistan-Azərbaycan, Dağlıq Qarabağ münaqişəsinə dair ölkəmizin ədalətli mövqeyini bir daha diqqətə çatdıran nazir Şahin Mustafayev Ermənistanın növbəti təxribatı nəticəsində cəbhə xəttində yaşanan son hadisələr barədə məlumat verib, Ermənistanın münaqişəyə dair BMT-nin 4 qətnaməsinə əməl etməməsinin region üçün ciddi təhlükə yaratdığını vurğulayıb.
Q.İsakzai Azərbaycanın BMT-nin fəal üzvlərindən olduğunu, təmsil etdiyi qurumun bir sıra beynəlxalq tədbirlərin ölkəmizdə təşkilini yüksək qiymətləndirdiyini bildirib. Azərbaycan və BMT arasında həyata keçirilən proqramlar və əməkdaşlıq barədə danışan BMT təmsilçisi əməkdaşlığın genişləndirilməsi imkanlarına dair fikirlərini bölüşüb.
