Qızının Vaşinqtonda “dollar qonaqlığı” verdiyi iddia edilən icra başçısı danışdı

 

Ölkə.Az xəbər verir ki, icra başçısı Aqil Məmmədov musavat.com-a açıqlamasında yayılan xəbərlərə aydınlıq gətirib.

 

A.Məmmədovun sözlərinə görə, qızının Vaşinqtona getməsi ilə bağlı xəbər yalan olduğu kimi, orada dostlarına “dollar qonaqlığı” verməsi barədə məlumat da yalandır: “Qızımın ümumvətəndaş pasportu yoxdur. Pasportu olmadığı halda, qızım Vaşinqtona necə gedə bilər? Qızım Göygöldən, Gəncə bölgəsindən kənara çıxmayıb”.

 

İcra başçısı qızının Gəncədə ali təhsil aldığını və kimya-biologiya fakütləsini bitirdiyini qeyd edib: “Qızım universiteti bitirdikdən sonra ailə həyatı qurub. 3 övladı var. Və hazırda Göygöldə yaşayır. Göygöldə yaşayan qızımın Amerikada dollar qonaqlığı verdiyini ancaq vicdanını satmış insanlar yaza bilər. Bu cür mətbuat işçilərinə qarşı vicdanlı, ədalətli mətbuat nümayəndələri öz mövqelərini ortaya qoymalıdırlar. Dövlət rəhbəri, cənab prezidentimiz mətbuat işçilərinə şəffaf bir mühit yaradıbsa, bu, o demək deyil ki, mətbuat işçiləri kiminsə haqqını tapdalamalıdırlar, nə istəsə yazmalıdırlar”.

 

A.Məmmədov məsələ ilə bağlı hüquq-mühafizə orqanlarına müraciət edə biləcəyini də qeyd edib: “Qızım da tələb qoyur ki, bu məsələ araşdırılsın. Hər kəs yazdığı yalan məlumata görə cavab verməlidir”.

 

Xatırladaq ki, aprelin 24-də mətbuatda icra başçılarından birinin qızının Vaşinqtonda dostlarına ziyafət verdiyi və bu zaman masalardakı qablara dollar düzüldüyü haqda məlumat yayılmışdı. Məlumatlarda həmin xanımın Kəlbəcər Rayon İcra Hakimiyyəti başçısının qızı olduğu iddia edilirdi.