Həftənin icmalı
Ağdamda ermənilərin dağıtdığı evlərin bərpasına başlandı
25.04.2016
Azərbaycan Respublikası Ərazilərin Bərpası və Yenidən Qurulması üzrə Agentlik Ağdamda aprelin 2-dən 5-dək erməni hərbi birləşmələrinin ağır artilleriyalardan atəş açması nəticəsində ziyan dəymiş evlərin bərpasına başlayıb.
Ölkə.Az xəbər verir ki, bu barədə Trend-ə Ağdam rayon İcra Hakimiyyətinin başçısı Raqub Məmmədov məlumat verib.
İcra başçısı bildirib ki, artıq dağıdılmış evlərin siyahı-smeta sənədləri hazırlanıb: "Azərbaycan Respublikası Ərazilərin Bərpası və Yenidən Qurulması üzrə Agentlik artıq rayonun cəbhə xəttində yerləşən 4 kəndində bərpa işlərinə start verib. Həmin kəndlərdə erməni təxribatı nəticəsində ziyan çəkən mənzillər və obyektlərin təmirinə başlanıb. Agentlik həmin evlərin bərpası üçün bütün zəruri tikinti materiallarını gətirib və evlərin təmirinə başlanıb".
Azərbaycan Ukraynadan 2 təyyarə alacaq
25.04.2016
An-178 ilk dəfə 2015-ci ilin mayında havaya qalxıb.
Qrafikə əsasən, “Antonov” dövlət şirkəti qısamüddətli perspektivdə 9 təyyarə buraxmağı planlaşdırır. Sifarişçilər arasında Çin, İraq, Azərbaycan və Ukraynanın Müdafiə Nazirliyi var.
Bu barədə Ukraynanın “Mexatronika” İnnovasiyalı regional aerokosmik klasterinin sədri Viktor Popov bildirib.
“Antonov” dövlət şirkətində müşavirədə Ukraynada təyyarəqayırmanın inkişafından söhbət gedib. Bu gün 9 təyyarənin tədarükündən söhbət gedir – 2 təyyarə Çinə, 2-si Azərbaycan, 4-ü İraq və 3-ü Ukrayna Müdafiə Nazirliyinə tədarük olunacaq”, - deyə, Popov bildirib.
Ermənilər Tərtəri “Qrad”dan atəşə tutub
26.04.2016
Ermənistan ordusu ötən gecə saat 01:00 radələrindən başlayaraq qoşunların təmas xəttində Azərbaycan Silahlı Qüvvələrinin mövqelərini ağır artilleriyadan atəşə tutub.
Ölkə.Az xəbər verir ki, APA-nın Qarabağ bürosunun məlumatına görə, Azərbaycan Silahlı Qüvvələrinin cavab atəşindən sonra erməni birləşmələri bu dəfə Tərtərin yaşayış məntəqələrini hədəf alıb.
Yaşayış məntəqələri ağır artilleriya ilə yanaşı, tanklar və “Qrad” qurğusundan atəşə tutulub.
Zaqatalada vəhhabilərə qarşı xüsusi əməliyyat keçirildi
26.04.2016
Zaqatala rayonunda radikal dini təriqət üzvlərinə qarşı əməliyyat keçirilib.
Ölkə.Az xəbər verir ki, hüquq-mühafizə orqanlarından APA-ya verilən məlumata görə, Zaqatala rayon Polis Şöbəsinə rayonun Yuxarı Tala kəndi ərazisində yerləşən hücrədə Vəhhabi təriqət üzvlərinin toplantı keçirməsi barədə məlumat daxil olub.
Daxil olan əməliyyat məlumatı əsasında həmin ünvanda əməliyyat keçirilib. Əməliyyat zamanı polisə müqavimət göstərən 5 nəfər saxlanılıb.
Zakir Həsənov erməni hücumuna məruz qalan Tərtərə getdi
26.04.2016
"Azərbaycan ordusu ermənilərin təxribatlarına cavab olaraq növbəti dəfə düşmənə sarsıdıcı zərbə endirib".
Ölkə.Az Report-a istinadən xəbər verir ki, bunu müdafiə naziri general-polkovnik Zakir Həsənov Tərtər rayon sakinləri ilə görüşündə deyib.
Müdafiə naziri qeyd edib ki, ötən gecə ermənilər yenidən atəşkəs rejimini pozaraq cəbhəboyu yaşayış məntəqələrini atəşə tutub:
“Cəbhədə erməni hərbi birləşmələrinin növbəti təxribatlarının qarşısını Azərbaycan ordusu layiqincə ala bilib və düşmənə sarsıdıcı zərbələr endirib. Düşmənin mövqeyində yerləşən postlar dağıdılıb”.
Pakistan hərbçiləri Azərbaycana gəldilər
26.04.2016
Səfir Şah Məhəmməd Camalın rəhbərlik etdiyi Pakistan İslam Respublikasının Milli Müdafiə Universitetinin 18 nəfərdən ibarət heyəti Azərbaycana akademik səfərə gəlib.
Ölkə.Az bilirir ki, bu barədə Müdafiə Nazirliyindən məlumat verilib.
Qonaq heyətin tərkibinə Milli Müdafiə Universitetinin "Milli Təhlükəsizlik və Müharibə kursu"nda təhsil alan Pakistan Silahlı Quvvələrinin və dövlət qurumlarının, o cümlədən Oman, Bruney və Nigeriya Silahlı Qüvvələrinin yüksək rütbəli zabitləri daxildir.
Səfərin əsas məqsədi ölkəmizin tarixi və mədəniyyəti ilə tanışlıqdan, Azərbaycan Respublikasının müdafiə və təhlükəsizlik, iqtisadi, daxili və xarici siyasəti, müstəqillik illərində üzləşdiyi problemlər və əldə etdiyi nailiyyətlər barədə geniş məlumat əldə etməkdən ibarətdir.
Allahşükür Paşazadədən ermənilərə — Çağırış
26.04.2016
“Ermənilər öz ədalətsiz, haqsız iddialarından əl çəkməlidirlər. Başa düşməlidirlər ki, onlar uduzublar”.
Ölkə.Az Report-a istinadən xəbər verir ki, bunu Qafqaz Müsəlmanları İdarəsinin (QMİ) sədri Şeyxülislam Allahşükür Paşazadə jurnalistlərə açıqlamasında deyib.
O bildirib ki, ermənilər təkcə Azərbaycana deyil, dünya ictimaiyyətinə uduzublar: “Onlar başqa dinləri və dilləri saymırlar. Özgəyə məxsus torpaqları zəbt edirlər. Ermənilər hər yerə hər cür vasitəyə əl atan bir millətdir. Ermənistan gec-tez Azərbaycan torpaqlarından çıxmalıdır. Mən Azərbaycanın gələcəyinə inanıram.
Ermənilərin atdığı addımlar isə qəbuledilməzdir. Onlar özlərini də məhv edirlər. Ermənilərin dini liderlərinə bir daha mesaj göndərirəm, insanları başa salsınlar ki, işğal olunmuş Azərbaycan torpaqlarından çıxsınlar ki, onların analarının gözləri yaşlı qalmasın”.
Azərbaycanda 52 növ dərman istehsal ediləcək
26.04.2016
“İranın şirkəti ilə birgə Azərbaycanda dərman istehsalı ilə bağlı müzakirələr davam etdirilir. Hazırda layihə üzərində təhlil işləri aparılır”.
Ölkə.Az Modern.az-a istinadən xəbər verir ki, bu barədə İqtisadiyyat Nazirliyinin mətbuat xidmətinin rəhbəri Abbas Əliyev bildirib. O deyib ki, paralel olaraq layihə smeta sənədləri hazırlanır. Smeta sənədləri hazır olduqdan sonra Sumqayıt Kimya Sənaye Parkında dərman istehsalı zavodun tikinti işlərinə başlanılacaq.
A.Əliyev bildirib ki, ilkin mərhələdə 52 həyatı vacib olan və ən çox tələb olunan dərman vasitələri istehsal olunacaq.
“Sonrakı mərhələdə istehsal olunan dərman vasitələrinin siyahısı daha da genişləndirilə bilər”.
Bakıda “Azərbaycan İnvestisiya Şirkəti” ASC, “Azərsun Holdinq” MMC və İranın “Darou Pakhsh” şirkəti arasında Azərbaycanda əczaçılıq məhsullarının beynəlxalq standartlara uyğun istehsalının təşkili haqqında Anlaşma Memorandumu imzalanıb.
Vətəndaşlar polislə bu qaydada əməkdaşlıq edəcəklər
26.04.2016
Daxili İşlər Nazirliyinin Kollegiyası “İctimai asayişin qorunmasında vətəndaşların polis orqanları ilə əməkdaşlığının təşkili Qaydası”nı təsdiq edib.
Ölkə.Az-ın APA-ya istinadən məlumatına görə, qayda bu gündən qüvvəyə minib.
Qayda vətəndaşların ictimai asayişin qorunmasında polis orqanları ilə əməkdaşlığının təşkili ilə bağlı məsələləri tənzimləyir.
Vətəndaşların polis orqanları ilə əməkdaşlığı onların ictimai asayişin qorunması üzrə vəzifələrin yerinə yetirilməsində iştirakını nəzərdə tutur və bu, onların qanunvericiliklə qadağan olunmayan fəaliyyətlə məşğul olmalarını istisna etmir. İctimai asayişin qorunmasında iştirak edən vətəndaşlar özlərini polis orqanlarının vəzifəli şəxsi kimi təqdim edə, eləcə də hal şahidi kimi prosessual hərəkətdə iştirak edə bilməzlər. İctimai asayişin qorunmasına şəxsi və işgüzar keyfiyyətlərinə görə fərqlənən, müddətli həqiqi hərbi xidmət keçmiş (qadınlar istisna olmaqla), yaşı 20-dən az və 24-dən çox olmayan Azərbaycan vətəndaşları könüllülük əsasında cəlb edilə bilərlər. İctimai asayişin qorunmasında iştirak etmək istəyən vətəndaşların ümumi dünyagörüşünün, şəxsi və işgüzar keyfiyyətlərinin, habelə ictimai asayişin qorunmasında polis orqanları ilə əməkdaşlığa yararlı və layiqli olmasının müəyyən edilməsi məqsədi ilə aşkarlıq şəraitində şəffaf üsullarla müsahibə keçirilir.
MN: Düşmənin ancaq hərbi obyektlərinə cavab zərbələri endirilib
27.04.2016
Aprelin 26-sı axşam saatlarından başlayaraq gecəyədək erməni silahlı bölmələri tərəfindən Tərtər rayonu ərazisində yerləşən yaşayış məntəqələri və mövqelərimiz 82 və 120 millimetrlik minaatanlardan, həmçinin 122 millimetrlik D-30, 152 millimetrlik D-20 haubitsalarından və BM-21 yayılım atəşli reaktiv sistemlərdən atəşə tutulub.
Müdafiə Nazirliyindən verilən məlumata görə, Azərbaycan Silahlı Qüvvələri əməliyyat şəraitinə uyğun olaraq düşmənin ancaq hərbi obyektlərinə adekvat cavab zərbələri endirib.
Müdafiə Nazirliyi bildirir ki, cəbhə xəttində baş verən hadisələrə görə məsuliyyəti Ermənistanın kriminal hərbi-siyasi rəhbərliyi daşıyır.
Qeyd edək ki, aprelin 26-sı saat 01.05-dən başlayaraq saat 04.25-dək də erməni silahlı bölmələri tərəfindən Tərtər şəhəri və rayonunun ərazisi, eləcə də Qapanlı kəndi 82 və 120 millimetrlik minaatanlardan, həmçinin 122 millimetrlik D-30 haubitsalarından və BM-21 yayılım atəşli reaktiv sistemlərdən atəşə tutulmuşdu.
General Vəliyev Moskvada: İnşallah qalib gələcəyik
27.04.2016
Cəbhədə təxribatı kimin törətdiyi hər kəsə məlumdur. Azərbaycan Silahlı Qüvvələri bu təxribatın qarşısını almaq və düşmənə layiqli cavab vermək üçün bütün lazımi tədbirləri görür.
Ölkə.Az xəbər verir ki, APA-nın Moskva müxbirinin verdiyi məlumata görə, bunu Azərbaycan müdafiə nazirinin müavini, general-leytenant Kərim Vəliyev deyib.
Cəbhədə vəziyyətin nəzarət altında olduğunu söyləyən nazir müavini Azərbaycan Silahlı Qüvvələrinin xidmətini layiqincə davam etdirdiyini qeyd edib.
Mehriban Əliyeva: “İşğal olunmuş torpaqların azad edilməsi lazımdır”
27.04.2016
Bakıda BMT-nin Sivilizasiyalar Alyansının VII Qlobal Forum çərçivəsində keçirilən “Sosial inteqrasiya sahəsində qabaqcıl metodlar” mövzusunda ikinci plenar iclasın açılışında Heydər Əliyev Fondunun Prezidenti, UNESCO-nun və İSESCO-nun xoşməramlı səfiri Mehriban Əliyeva çıxış edib.
Ölkə.Az APA-ya istinadən xəbər verir ki, M. Əliyeva forumun dialoqa, qarşılıqlı anlaşmanı gücləndirəcəyinə töhfə verəcəyinə inandığını bildirib. O deyib ki, bəzi hallarda insanların cəmiyyətlərdən təcrid olunması müşahidə edilir:“İnsanların adaptasiyası müxtəlif cəmiyyətlərdə fərqli yollar tələb edir. Bu gün mən sizinlə ölkəmizin təcrübəsini bölüşmək istəyirəm. Biz 25 illik müstəqillik dövrü keçmişik. İqtisadiyyatımızın dünya iqtisadiyyatına inteqrasiyasını təmin etmişik. Elm və mədəniyyət sahəsində islahatlar aparılıb. Bu irəliləyiş tariximizin bu dövründə xalqımızın üzləşdiyi böyük çətinliklərə baxmayaraq, əldə edilib. SSRİ-nin süqutundan sonra ölkə böyük iqtisadi-sosial çətinliklərlə üzləşdi, torpaqlarımızın bir hissəsi işğal olundu. Ermənistanın işğalı nəticəsində 900 məntəqə, 693 məktəb, 975 bağça, 695 xəstəxana dağıdılıb, 40 mindən artıq unikal muzey materiallarını itirmişik. Azərbaycana vurulan zərbəni təsəvvür etmək çətindir. Həmin çətin anlarda bizimlə birlikdə olmuş BMT qurumlarına təşəkkür edirəm”.
MTRŞ: Efir toyxanadan, aparıcı “tamada”dan seçilməlidir
27.04.2016
“Space televiziyasında yayımlanan “Sevimli mahnı” verilişinin aparıcısında “Sevimli şou”dakı xarakterinə meyllənmə hiss olunur”.
Ölkə.Az xəbər verir ki, bunu APA-ya Milli Televiziya və Radio Şurasının (MTRŞ) Ekspertiza, proqramlaşdırma və analitik şöbəsinin müdiri Təvəkkül Dadaşov deyib.
Onun sözlərinə görə, verilişin son buraxılışlarda yenə də ictimaiyyət arasında daha çox toy biznesinin nümayəndələri kimi tanınan müğənnilərin iştirakı ilə toyxana mahnılarından ibarət veriliş formatına keçid müşahidə olunur: “Düzdür, verilişdə həmin müğənnilərin ifasında hərdən muğam da eşitmək mümkündür. Amma bir neçə veriliş öncəyədək veriliş daha çox ciddi incəsənət xadimlərinə, onların yaradıcılığına həsr olunurdu. Azərbaycan milli efirində çal-çağır verilişləri az deyil. Lakin əvvəllər “Sevimli şou”, indi isə “Sevimli mahnı” get-gedə digər verilişlərdən fərqlənir”.
Cəbhə bölgəsində dağıdılan evlər — SİYAHI
27.04.2016
Aprelin 5-də Azərbaycanla Ermənistan arasında atəşkəs rejiminin bərpa olunması ilə bağlı razılıq əldə edilməsinə baxmayaraq, aprelin 26-27-də erməni silahlı birləşmələri iri çaplı silahlardan, “Qrad” qurğusu, top və tanklardan istifadə etməklə Azərbaycan Ordusunun mövqelərini, habelə qoşunların təmas xəttinə yaxın yaşayış məntəqələrini intensiv atəşə tutublar.
Ümumilikdə Ağdamda 98, Tərtərdə 198, Goranboyda 85 olmaqla, cəmi 381 tikiliyə ziyan dəyib ki, onlardan da 341-i evdir. Ziyan dəymiş evlərin 72-si Ağdam, 190-ı Tərtər, 79-u isə Goranboy rayonu ərazində yerləşir. Onlardan 300-ü zədələnib, 26-na ciddi ziyan dəyib, 15-i isə tamamilə dağıdılıb. O cümlədən atəşkəsdən sonra 27 evə ziyan vurulub. Onlardan 1-i tamamilə dağıdılıb, 1-i ciddi şəkildə zədələnib, 25-nə isə ziyan dəyib.
Bu tələbələrin imtahan nəticələri ləğv edildi
27.04.2016
Tələbə Qəbulu üzrə Dövlət Komissiyası (TQDK) aprelin 24-də keçirilmiş sınaq imtahanının nəticələrini açıqlayıb.
Komissiyadan verilən məlumata görə, hər bir abituriyent TQDK-nın internet saytına daxil olaraq imtahan nəticələri və cavab kartının qrafik təsviri ilə tanış ola bilər. Abituriyentlər imtahan nəticələri barədə məlumatı həmçinin iş nömrələrini mobil telefonla 7727 nömrəsinə göndərməklə öyrənə bilərlər.
Sınaq imtahanında iştirak etmək üçün qeydiyyatdan keçmiş 48382 abituriyentdən 3259 nəfəri imtahana gəlməyib. İmtahan qaydalarına zidd hərəkətlərə yol verdikləri üçün 10 abituriyentin imtahan nəticələri ləğv edilib.
Bu şəxsləri Azərbaycandan xaricə buraxmayacaqlar — SİYAHI
28.04.2016
Vergilər Nazirliyi 216 nəfər fiziki şəxsin vergi borcuna görə ölkədən getmə hüququnu müvəqqəti məhdudlaşdırıb.
Ölkə.Az bu barədə nazirliyə istinadən xəbər verir.
“İcra haqqında” Azərbaycan Respublikasının Qanununun 84-1.1-ci maddəsinə, Vergi Məcəlləsinin 23.1.16-cı və 23.1.15-3-cü maddələrinə əsasən vergi ödəyicisi vergi borcunu ödəmədikdə məhkəmənin qərarı əsasında fiziki şəxslərin və ya hüquqi şəxslərin icra orqanlarının rəhbərlərinin ölkədən getmək hüququ müvəqqəti məhdudlaşdırıla bilər.
Bu isə o deməkdir ki, vergi borcunu tam ödəməyənə kimi belə şəxslərin ölkədən kənara çıxmasına icazə verilmir”, - deyə nazirliyin açıqlamasında qeyd edilib.
General Vəliyev Ohanyanın ittihamlarına cavab verdi
28.04.2016
“Ermənistan müdafiə naziri Seyran Ohanyanın Moskvada təhlükəsizlik məsələləri üzrə beynəlxalq konfransda çıxışı erməni tərəfinin öncədən hazırlanmış təxribatıdır. Məqsəd beynəlxalq tədbir iştirakçılarının diqqətini münaqişə zonasında baş verənlərə cəlb etməkdir”.
Ölkə.Az APA-ya istinadən xəbər verir ki, bu barədə Azərbaycan müdafiə nazirinin müavini Kərim Vəliyevin Ermənistan müdafiə nazirinin Moskvada keçirilən beynəlxalq konfransda təxribat xarakterli çıxışına cavabında deyilir.
“Erməni naziri “sülhməramlı” qismində çıxış edərkən, Ermənistan silahlı qüvvələri artıq üç gecədir cəbhə zonasında yaşayan Azərbaycanın dinc əhalisini atəşə tutur. Dinc sakinləri və onların evlərini atəşə tutan erməni tərəfindən fərqli olaraq, Azərbaycan ordusu yalnız düşmənin atəş nöqtələrinə preventiv cavab zərbələri endirir”, - deyə o vurğulayıb.
Düşmənin növbəti hədəfi Ağcabədi oldu
28.04.2016
Ötən gecə ermənilərin ağır artilleriyadan açdığı atəş nəticəsində Ağcabədi rayonuna 100-dək mərmi düşüb.
Ölkə.Az-ın APA-ya istinadən verdiyi xəbərinə görə, bunu Ağcabədi rayon İcra Hakimiyyətinin başçısı Şahin Məmmədov deyib.
Mərmilərdən 50-nin Qaraxanlı kəndi ərazisinə düşdüyünü açıqlayan İH başçısı 35 həyətyanı sahəyə mərmi düşməsi nəticəsində 19 evin yararsız hala düşdüyünü deyib.
Həmin evlərdən biri tamamilə yanıb.
Ş.Məmmədov bildirib ki, Ermənistan silahlı qüvvələri mülki əhalini hədəfə alıb.
Son hadisələrlə bağlı Ermənistana qarşı cinayət işi qaldırıldı
28.04.2016
Azərbaycan Respublikasının işğal altında olan ərazilərində yerləşən Ermənistan hərbi hissələri növbəti dəfə təcavüzkar əməllərini davam etdirərək ağır artilleriya qurğularından Azərbaycan Silahlı Qüvvələrinin cəbhəboyu mövqelərini və mülki əhalinin yaşadığı əraziləri intensiv atəşə tutmaqla beynəlxalq humanitar hüquq normalarınının tələblərini kobud surətdə pozmuşdur.
Baş Prokurorluğun mətbuat xidmətindən Ölkə.Az-a verilən məlumata görə, Ermənistan Silahlı Qüvvələri aprelin 27-28-də Azərbaycanın işğal olunmuş ərazilərindən Ağdam və Tərtər rayonlarının ərazilərini iri çaplı silahlardan və ağır artilleriya qurğularından atəşə tutaraq mülki əhalinin qəsdən öldürülməsi və vətəndaşların şəxsi mülkiyyətində olan əmlaklarının qəsdən məhv edilməsi məqsədilə təxribat törətmişlər.
“Düşmənin bütün hərbi obyektləri vurulsun” — Nazir əmr verdi
28.04.2016
“Bütün qoşunlara düşmənə qarşı cavab zərbəsi endirmək əmr edilib”.
Ölkə.Az atv.az-a istinadən xəbər verir ki, bunu cəbhə bölgəsində jurnalistlərin suallarını cavablandıran Müdafiə Nazirliyinin mətbuat xidmətinin rəisi, polkovnik Vaqif Dərgahlı deyib. Onun sözlərinə görə, Ermənistan hərbi birləşmələri artıq iki gecədir BM-21 yaylım atəşləri sistemindən də yaşayış kəndlərini atəşə tuturlar:
“İri çaplı silahlardan atırlar. Minaatanlardan, o cümlədən D-20 və D-30 haubitsalarından atırlar. Hətta iki gecədir artıq BM-21 yaylım atəşləri sistemindən də atırlar. Əsasən atılan mərmilər yaşayış kəndlərinə düşür. Mülki əhalinin yaşadığı kəndlərə düşür. Müdafiə naziri tərəfindən tapşırıq verilib. Bütün qoşunlara əmr verilib ki, düşmənə qarşı cavab zərbəsi açılsın. Və vurulan atəş ancaq onların hərbi obyektlərinə və yaşayış məntəqələrində gizlətdikləri hərbi nöqtələr vurulmalıdır. Cavab tədbirləri görülür”.
“Ermənilər çaylara zəhərli maddələr axıdır” — Nazir
28.04.2016
Aprelin 28-də ekologiya və təbii sərvətlər naziri Hüseynqulu Bağırov cəbhəyanı kəndlərimizdə olub.
Ölkə.Az AzərTac-a istinadən xəbər verir ki, nazir əvvəlcə Ağcabədi rayonundakı Qaraxanlı kəndindəki yanan evə baxış keçirib.
H.Bağırov daha sonra Ağdam rayonunun artilleriya zərbələrinə məruz qalan Qaradağlı, Mahrızlı, Çəmənli kəndlərində, mərmi atəşi nəticəsində dağılan evlərdə olub, ev sahibləri ilə görüşüb. Sarıcalı kəndindəki dağılmış orta məktəbə və ərazilərdəki qırılmış ağaclara baxıb.
Nazir jurnalistlərə deyib ki, ermənilərin mülki əhaliyə qarşı törətdiyi cinayətlərin, terror aktlarının nəticələri sənədləşdirilərək beynəlxalq təşkilatlara göndəriləcək.
H.Bağırov bildirib ki, mənbəyi Ermənistan ərazisində olan çaylarda təmizləmə qurğuları tikilir:
Xarici və yerli media təmsilçilərinin cəbhə bölgəsinə səfəri başladı
29.04.2016
Xarici və yerli media təmsilçilərinin cəbhə bölgəsinə səfəri başlayıb.
Ölkə.Az APA-ya istinaən xəbər verir ki, Azərbaycan Xarici İşlər Nazirliyinin təşkilatçılığı ilə Azərbaycanda akkreditasiyadan keçmiş xarici ölkələrin media orqanlarının təmsilçiləri və yerli KİV nümayəndələri (ümumilikdə 45 media nümayəndəsi) XİN-in mətbuat xidmətinin rəhbəri Hikmət Hacıyevin müşayiəti ilə Bərdə rayonuna gəliblər.
Jurnalistlər öncə Bərdə Diaqnostika Mərkəzində ermənilərin yaşayış məntəqələrini atəşə tutması nəticəsində yaralanan mülki vətəndaşlara baş çəkiblər.
Burada isə media nümayəndələri Ağdam və Ağcabədi rayonlarına yol düşəcəklər. Jurnalistlər orada ermənilərin ağır artilleriyadan açdığı atəş nəticəsində dağıdılan, yanan evlərə baxış keçirəcəklər.
Erməni mərmisindən ölən dinc sakinin yaxınları: "Bizi hədəf seçiblər"
29.04.2016
Azərbaycan Ordusuna gücü çata bilməyən erməni hərbi birləşmələri dinc əhaliyə silah tətbiq edirlər.
Ölkə.Az Trend-ə istinadən xəbər verir ki, bunu jurnalistlərə açıqlamasında aprelin 27-dən 28-nə keçən gecə ermənilərin Ağdam rayonunu ağır artilleriyalardan atəşə tutması nəticəsində həlak olan Hüseynov Əli Müseyib oğlu və Mustafayev Famil Əli oğlunun qohumu Əhməd Əhmədov deyib.
O bildirib ki, həlak olan dinc sakinlərin hər ikisi eyni mərminin partlaması nəticəsində həyatlarını itirib: "Yaxınlıqlarına mərmi düşüb və onlar həlak olublar. Ermənilər mülki əhalini hədəf seçiblər, silahsız əhaliyə silah tətbiq edir. Ermənilərin cürəti çatmır ki, bizim ordu ilə qarşılaşsın. Ona görə də mülki əhalini hədəf seçirlər. Əgər Qarabağla bağlı danışıqlar belə fəsadlarla davam edəcəksə, biz bu danışıqlara yox deyirik. Əgər həqiqiətən danışıqlar gedirsə, bu cür hadisələr olmamalıdır. Biz hər birimiz Ali Baş Komandanın əmr verəcəyi təqdirdə döyüşə getməyə hazılrıq. Heç vaxt öz torpaqlıarımızı tərk etməyəcəyik. Son vaxtlar ermənilər həddindən artıq azğınlaşıblar".
Qarabağda döyüşən rus zabiti mükafatlandırıldı
29.04.2016
Azərbaycan müdafiə nazirinin müavini, general-leytenant Kərim Vəliyev birinci Qarabağ müharibəsində Azərbaycanın ərazi bütövlüyü uğrunda döyüşmüş ehtiyatda olan polkovnik-leytenant Sergey Uvarovu “Hərbi xidmətlərə görə” dövlət mükafatı ilə təltif edib.
Ölkə.Az APA-ya istinadən xəbər verir ki, Azərbaycanın Rusiyadakı səfirliyində keçirilən təltifetmə mərasimində çıxış edən nazir müavini K. Vəliyev S. Uvarovun Azərbaycan Silahlı Qüvvələrində xidmət etdiyi dövrlə əlaqədar bu mükafata layiq görüldüyünü bildirib: “Azərbaycan Ermənistan tərəfindən işğala məruz qalıb. Müharibə vaxtı Azərbaycanda xidmət keçənlərin bir çoxu öz döyüş yoldaşlarına qoşularaq Azərbaycan xalqı ilə birlikdə ölkəmizin müstəqilliyi və bütövlüyünu müdafiə etdilər. Göstərdiyi şücaətə və ölkənin silahlı qüvvələrinin möhkəmləndirilməsində xidmətlərinə görə Sergey Uvarov ali dövlət mükafatı olan “Hərbi xidmətlərə görə” mükafatı ilə təltif olunub”.
İlqar Məmmədov azadlığa buraxılmadı
29.04.2016
Bu gün Şəki Apellyasiya Məhkəməsində “REAL” hərəkatının həbsdə olan sədri İlqar Məmmədov və Müsavat Partiyası başqanının müavini Tofiq Yaqublunun apellyasiya şikayətləri üzrə məhkəmə prosesi keçirilib.
Ölkə.Az-ın APA-ya istinadən verdiyi xəbərinə görə, məhkəmə müdafiə tərəfinin İlqar Məmmədov və Tofiq Yaqubluya bəraət verilməsi barədə vəsatətləri təmin etməyib.
Birinci instansiya məhkəməsinin hökmü qüvvədə saxlanılıb.
Qeyd edək ki, ötən prosesdə vəkillər İlqar Məmmədov və Tofiq Yayublu barəsində olan hökmlə əlaqədar Avropa İnsan Hüquqları Məhkəməsinin qəbul etdiyi qərarlara uyğun olaraq onların barəsində bəraət hökmü çıxarılmasını xahiş ediblər.
Dövlət ittihamçısı isə çıxışında birinci instansiya məhkəməsinin hökmünün qüvvədə saxlanmasını istəyib.
İlqar Məmmədov və Tofiq Yaqublu da barələrində bəraət hökmü çıxarılmasını istəyiblər.
Ali məktəblərə qəbul imtahanlarında cəmi üç fənn olacaq
29.04.2016
“Ali məktəblərə qəbul imtahanlarında cəmi üç fənn olacaq”.
Ölkə.Az-ın Report-a istinadən məlumatına görə, bunu Dövlət İmtahan Mərkəzi publik hüquqi şəxsin Direktorlar Şurasının sədri Məleykə Abbaszadə "ASAN radio"nun “Qəbuldasan” verilişində deyib.
O bildirib ki, bakalavr imtahanında Ana dili və Riyaziyyat fənlərindən olan nəticələr eyni fənnin buraxılış imtahanından olan nəticələrlə əvəz edilə bilər: "Amma hələlik buraxılış imtahanının səviyyəsi, xüsusilə I və II qruplarda olan Riyaziyyat fənnindən olan suallarla buraxılış imtahanında eyni fənlərdən hazırlanan suallar eyni səviyyədə deyil. Bu səbəbdən də hələ bu prosesin reallaşması mümkün deyil. Biz bununla bağlı iş görürük, bu proses üç il davam edəcək. Biz çalışacağıq ki, gələcəkdə ixtisas qrupları üzrə institut imtahanları üç fəndən ibarət olsun".
ADNA faciəsindən — 7 il ötür...
30.04.201
Bu gün Azərbaycan Dövlət Neft Akademiyasında (ADNA) törədilən terror hadisəsindən 7 il ötür.
Azərbaycanı dəhşətə gətirən hadisə 2009-cu il aprel ayının 30-u səhər saat 09:30-da baş verdi. ADNA-nın Bakı şəhəri Dilarə Əliyeva küçəsi, 227 saylı ünvanda yerləşən ikinci korpusuna daxil olan silahlı şəxs inzibati binanın birinci mərtəbəsindən altıncı mərtəbəsinədək qarşısına çıxan hər kəsə “Makarov” tipli tapançadan atılan atəşlə xəsarət yetirib. İstintaq materiallarına və şahid ifadələrinə görə, cinayətkar şəxsləri əsasən baş və boyun nahiyəsindən güllələyib. Gülləyə tuş gələnlərin içərisində akademiyanın professorları, laborantlar, tələbələr, müəllimlər, qapıçı və hətta yeməkxanaya süd məhsulları gətirən yaşlı bir qadın da olub.
Qanlı hadisə nəticəsində aşağıda adı olan şəxslər öldürülüb:
1. Neft qaz istehsalı və emalı texnikası kafedrasının müdiri, professor Abdullayev Ramiz Xəlil oğlu, 1940-ci il təvəllüdlü
2. Nəzəri Mexanika Fakultəsinin laboratoriya müdiri Əzizova Tamilla Zülfüqar qızı, 1951-ci il təvəllüdlü
3. Neft qaz istehsalı və emali texnikası kafedrasının müəllimi, dosent Vahidov Məcnun Abdulvahid oğlu , 1946-ci il təvəllüdlü
4. Biotexniki və texniki cihazlar kafedrasının laborantı Məmmədova Şəfa Afət qızı, 1978-ci il təvəllüdlü
Tələbələr
5. Məmmədov Taleh Tariyel oğlu, 1988-ci il təvəllüdlü
6. Bəndəliyev Yusif Telman oğlu, 1989-cu il təvəllüdlü
7. Bağırov Ayaz Cavanşir oğlu, 1988-ci il təvəllüdlü
8. Cabbarov Savalan Allahverdi oğlu, 1987-ci il təvəllüdlü
9. Abdullayev Emin İmaməli oğlu , 1989-cu il təvəllüdlü
10. Babaşov Ruslan Cəfər oğlu, 1990-ci il təvəllüdlü
11. Aslanov Ceyhun Sakit oğlu, 1988-ci il təvəllüdlü
12. Akademiyaya süd məhsulları gətirən Qurbanova Ayna Abbasqulu qızı , 1957-ci il təvəllüdlü.
Yaralananların siyahısı:
1. İsayev Kənan
2. Mustafa Məhəmməd
3. Rüstəmbəyov Faiq
4. Şirəliyev İlkin Azər oğlu (1989-cu il)
5. Mustafayev Elşən Elbəy oğlu (1989-cu il)
6. Axundov Rəhman
7. Cəmiyev Elvin Azər oğlu (1989-cu il)
8. Hüseyinli Zemfira
9. Daas Muavviyyə (Suriya)
10. Seyidəhməd Əmru.
Hadisəni törədən cinayətkar ələ keçməmək üçün əlindəki silahla özünü vurmuşdu. Hüquq-mühafizə orqanı əməkdaşlarının hadisə yerində apardığı araşdırmadan məlum oldu ki, cinayətkar 29 yaşlı Gürcüstan vətəndaşı Fərda Qədirovdur. Onun üzərindən şəxsiyyətini təsdiq edən sənədlə yanaşı, “Makarov” tipli tapança, habelə hər biri 40 güllə tutumlu və içərisində 71 güllə olan xüsusi üsulla hazırlanmış 3 ədəd patrondaş, 2 tapança sandıqçası aşkar edildi.
