Ümid Partiyasından Həcər Abbaslıya
30 aprel tarixində nizamnamə pozuntusuna görə Ümid Partiyası sədri İqbal Ağazadənin sərəncamı ilə müavinlik postundan uzaqlaşdırılan Həcər Abbaslının Partiya ilə bağlı verdiyi açıqlamaya Ümid Partiyasından cavab verildi.
Ümid Partiyasının Mətbuat və İnformasiya üzrə sədr müavini Elman Abbasovun FB səhifəsində yazdığı cavabda bildirilir:
"Keçmiş müavinlərimizdən biri- xanım Həcər Abbaslı özünü demokrat adlandırsa da, FB səhifəsində həqiqətə uyğun olmayan açıqlama yaydığı üçün ona verilən cavabları silir, həqiqətdən qaçır. Artık demokrat xanım məni blok belə edib. Bu nə etik qaydalara, nə də demokratikliyə sığmır. Mənə buradan bunları yazmaqdan başqa çarə buraxmır:
Əvvəla, qeyd edim ki, Həcər Abbaslı daxili nizam-intizama əməl etmədiyi üçün 30 aprel tarixində Ümid Partiyasının sədri İqbal Ağazadənin qərarı ilə müavinlik postundan azad edilib. Verilmiş qərar mənim humanistliyim ucbatından mətbuatda yayılmayıb. Gənc, aktiv xanım olduğu üçün gələcək fəaliyyəti nəzərə alınıb. Onun həqiətə uyun olmayan açıqlamasından və atdığı addımlardan sonra qəbul edirəm ki, məsuliyyətsizlik etmişəm. Atdığı addımlar nəinki ona, onun kimi bir çoxlarına qarşı məndə güvənsizlik yaradır.
Həcər xanım, sədrin gizli namizədliyini irəli sürməsi məsələsini yazır. Ona bir daha xatırlatmaq istəyirəm ki, bu müzakirələr 90 saylı DSK-da seçki ilə bağlı qərar veriləndən dərhal sonra aparılıb. Bir yox,həm də bir neçə dəfə, özü də müavinlərin və Ali Məclis sədrinin iştirakı ilə. Sadəcə siz iştirak etməmisiniz. Müzakirələr zamanı bir çox rayon şöbə sədrləri ilə də mobil telefon vasitəsilə əlaqə saxlanılıb və onların fikri öyrənilib. Yerli təşkilat sədrləri də yetkinliklə seçkiyə qatılmağı və İqbal bəyin namizədliyini dəstəkləyiblər. Şəxsən mənim də fikrim öyrənilib və müavinlərdən yalnız mən tərəddüd etmişəm və seçkilərə qatılmamaqla bağlı fikir söyləmişəm. Bu da normal qarşılanıb.
Çoxluq seçkiyə qatılmağın tərəfdarı olubsa nə etmək olar? Sizinlə də bu barədə ətraflı söhbətimiz olub. Mən əminəm ki, İqbal bəy də bu mövzuda sizinlə söhbət etməmiş deyil.
Gənc olduğun üçün əlavə olaraq xatırlatmağı özümə borc bilirəm ki, hər atılan adımı da demokratiya saymaq olmaz, Partiya daxili nizam intizam, Partiyanın məramnaməsi və nizamnaməsi var. Hər bir şəxs partiyaya daxil olanda səlahiyyətlərinin bir hisəsini partiyaya verir. Hər halda atılan addımlar da nizamnamə çərçivəsində olmalıdır. Siz nizamnaməni hər addımda pozur və bunu demokratiya hesab edirsiniz. Demokratiya anarxiya demək deyil. Müzakirələrə qatılmaq, namizəd olmağınızla bağlı fikirlərinizi müzakirəyə çıxarmaq haqqınız vardı. Nizamnaməyə uyğun olaraq ali orqanlar qarşısında məsələ qaldırmaq da sizin haqqınız idi. Hətta 30 apreldə sədrin sizinlə bağlı verdiyi qərara şikayət yazıb, prosedur qaydalara başlasaydınız bu sizə daha çox demokrat donu geyindirə bilərdi. Lakin bunu etmədiniz... Xahiş edirəm özünüzü demokrat, haqlı göstərəməyə çalışarkən başqalarının haqqına girməyin. Partiyada yetəri qədər demokratik insanlar var. Hər bir məsələ ilə bağlı veriləcək qərarlarlar zamanı da Rəyasət Heyətinin bütün üzvlərinin fikri dinlənilir.
Yazdığınız kimi əgər sədrin şəxsi iddiası olmasa idi, hər halda az bir müddətdə müavinlik postuna qədər yüksələ bilməyəcəkdiniz. Az müddətdə müavinlik postuna gətirilməyiniz sizdə başgicəllənməsi yaratdı. Əminəm ki, sizin ən yaxşı statunuz da elə bu olacaq və altını cızıram. İstəməzdim ki, az-çox qazandığınız uğurları bundan sonra az müddətdə yerə vurasınız. Hər halda kənardan yaxşı görsənmir. Zəif bənd kimi sizi gələcəkdə siyasi oyunların aləti etməyə çalışacaqlar. Bundan qaçmanızı tövsiyə edirəm. Kimin harada və nə qədər oynaya biləcəyini də, sifarişin haradan gəldiyini də bilir, hələlik susmağa üstünlük verirəm.. Və sonda bildirim ki, gedərkən qapını elə çırpmaq lazımdır ki, o qapını bir də aça biləsiniz.
Elman Abbasov
Ümid Partiyasının sədr müavini"
