Razi Nurullayev 9 May münasibəti ilə veteranları təbrik etdi
"Bu gün yüz minlərlə azərbaycanlı var ki, Almaniyada yaşamaq istərdi. Taleyin qismətinə bax. Faşizmin tüğyan etdiyi və Berlinə qədər öldürə-öldürə getdikləri torpaqlarda yaşamaq istəyənlər var. Çünki, orada daha gözəl, daha azad və daha firavan həyat var”.
Bu sözləri Ölkə.Az-a Azərbaycan Xalq Cəbhəsi Partiyasının sədri Razi Nurullayev 9 May - Qələbə bayramı münasibətilə verdiyi təbrik açıqlamasında deyib. Partiya sədri bu bayramın qeyd edilməsində sevindirici və üzücü məqamların olduğunu bildirib.
R. Nurullayevin 9 May - Qələbə bayramı münasibətilə təbriki:
"Bu gün qələbənin qeyd edilməsinə iki məsələyə görə sevinirəm, həm də bir neçə məsələyə görə üzülürəm. Sevinirəm deyəndə ki, bu bayramı haqqı olanlara hörmət olaraq sevinirəm.
Birincisi, 1941-1945-ci illərdə Azərbaycandan 640 min nəfərədək səfərbər edilib cəbhəyə göndərilib. Bunlardan 11 mini qadın olub. Döyüşlərdə göstərdikləri şücaətə görə 139 soydaşımız «Sovet İttifaqı Qəhrəmanı» adına layiq görülüb. İkinci dünya müharibəsində həlak olan 57 milyon adamdan 27 milyonu Sovet vətəndaşları, onlardan da 300 mindən çoxu azərbaycanlılar olub. Sovetlər birliyinin ideologiyasına inanan və xoşbəxt gələcəyin anası olan kommunizmi qurmaq üçün çarpışan neftçilərimiz 41-45-ci illərdə 75 milyon ton neft istehsal edib. SSRİ-də isə 110 milyon ton neft hasil edilib. Bunun 75 milyon tonu bizim qəhrəman neftçilərimiz tərəfindən çıxarılıb.
Elə bu insanların əziz xatirəsi üçün sevinməyə borcluyuq. 300 mindən çox həlak olan azərbaycanlının əziz xatirəsi hər zaman xatirimdə yaşayacaqdır.
İkincisi, faşizm bir bəla idi və qarşısı alındı. Biz bu gün erməni faşizmi ilə üz-üzə qalan xalq kimi bunu çox gözəl anlayırıq. Elə faşizmin irəliləməsinin qarşısının alındığına görə də sevinməyə dəyər.
Üzüldüyüm məqamlar da var. Azərbaycan dünyada neft istehsal edən ilk ölkə kimi, Şərqdə ilk demokratik cümhuriyyət yaradan ilk ölkə kimi haqq etdiyi yeri tuta bilməmiş və vətəndaşlarımızda haqq etdiyi sosial və siyasi həyatı yaşaya bilməmiş və bu günə kimi də bu çilə davam etməkdədir. Hətta, insanların "kaş Hitler gəlib Azərbaycanı tutaydı" kimi fikirlərini də eşitmişəm. Bir çox insanlarda bu inam var ki, Hitler Azərbaycana müstəqillik verəcəkdi. "Bəlkə bu gün daha normal bir cəmiyyətdə yaşayardıq" deyən insanlar var.
Bu gün yüz minlərlə azərbaycanlı var ki, Almaniyada yaşamaq istərdi. Taleyə bax, Faşizmin tüğyan etdiyi və Berlinə qədər öldürə-öldürə getdikləri torpaqlarda yaşamaq istəyənlər var. Çünki, orada daha gözəl, daha azad və daha firavan həyat var.
Bayramınız mübarək, əziz müharibə veteranları!”
