Həmkarlar Təşkilatı sədri və 122 saylı MİS rəisinin "yataqxana əməliyyatı"
Zığ yolu, Cavanşir küçəsində yerləşən avtomobil zavodunun yataqxanasında yaşayan sakinlər köçürülür.
Köçürülmə zamanı çox böyük fırıldaqçılıq yolu ilə insanları aldadıb onlara məxsus pulları mənimsəyirlər. Belə ki, vaxtı ilə avtomobil zavodunda işləyən və yataqxanadakı evin orderləri adlarına olmasına baxmayaraq işçilər qalır kənarda, avtomobil zavodunun həmkarlar təşkilatının sədri Oruc Səmədov adlı şəxs və 122 saylı MİS-in rəisi saxta sənədlər hazırlayaraq siyahıya öz adamlarının adlarını daxil edərək yataqxadan çıxarılanlara ayrılmış pulları mənimsəyirlər. Redaksiyamıza müraciət edən şəxslər orderləri olduğu halda pularını ala bilmədiklərindən şikayətlənirlər.
Bizə müraciət edən Söylü Güləliyevanın da həmin yataqxanada evi var. 95 saylı mənzilin orderinin Söylü xanıma məxsus olduqu halda, yaşadığı yataqxana otağını 2003-cü ildə oradan çıxan və Sulu Təpədə özünə ev alıb orda məskunlaşan Xəyal Vəliyev adlı şəxsin adına rəsmiləşdiriblər. Söylü xanım isə haqlı olduğu halda almalı olduğu puldan məhrum olub. Bütün bunları edənlər isə 122 saylı MİS-in rəisi Asif Şərifov adlı şəxs və onunla bu məsələdə ortaq olan zavodun həmkarlar təşkilatının sədri Oruc Səmədovdur. Sözügedən yataqxanada onlarla belə adamlar var. Hamısına da deyilir ki, narahat olmayın, məsələ həll olunacaq. Artıq 2 ay keçməsinə baxmayaraq heç kəs onların problemi ilə maraqlanmır.
Qeyd edək ki, yataqxanada olan hər bir mənzil sahibinə 45 min AZN verilib.
Ölkə.Az məsələ ilə bağlı adları keçən Söylü Güləliyev, Oruc Səmədov və Asif Şərifovla əlaqə saxlayıb.
Söylü Güləliyeva əməkdaşımızla söhbətində bildirdi ki, mənim adım 2003-cü ildən yataqxanda gedir. 95 nömrəli otaq mənim adımadır. Yataqxananın sökülmə məsələsi ortaya çıxanda müraciət etdim zavodun Həmkarlar Təşkilatnın sədri Oruc Səmədova.
"Oruc Səmədov dedi ki, sizin siyahıda adınız var, hər şey qadasındadır, narahatçılığa heç bir əsas yoxdur. Bundan sonra həmin əraziyə baxan 122 saylı MİS-ə getdim. 122 saylı MİS-in rəisi Asif Şərifov bildirdi ki, adınız siyahıdadır. Qulağıma xəbərlər çatdı ki, yataqxanada olan hər kəs sənəd düzəldir. Hara getdim dedilər, gözlə. 122 saylı MİS-ə yenidən getdim. 122 saylı MİS-in rəisi Asif Şərifov bildirdi ki, sizin kimi 25 adam var, onlar haqqında müraciət olunub. Hazırda orada yaşamayan, 2003-cü ilə kimi orada yaşamış Ağdam rayon sakini Xəyal Vəliyevə kompensasiya ödənilib. Biz də dəqiq bilirik ki, Xəyal Vəliyev qaçqın olsa da Sulutpədə torpaq alıb, ev tikib və orada yaşayır. Orada yaşayan birinə o pul verilsə, mənə o qədər təsir etməz. 122 saylı MİS-ə yenidən gedəndə orada işləyən Aidə adlı qadın bildirdi ki, Xəyal Vəliyev 45 min manat pulu alıb. 95 nömrəli ev - mənzil mənim adıma olsa da pulu Xəyal Vəliyev alıb. 30 il o zavodda işləmişəm. Sadəcə zavod fəaliyyətini dayandırandan gedib-gəlmirik. Deyirlər zavod işləmir, ancaq yalandır, zavodun sexləri fəaliyyət göstərir", deyə şikayətçi Söylü Güləliyeva əməkdaşımızla söhbətində bildirib.
Həmkarlar təşkilatının sədri Oruc Səmədov yataqxanada baş verənlərlə bağlı bildirir ki, Söylü Güləliyeva mənim işçim olub. Zavod hazırda işləmir.
- Söylü xanım bildirdi ki, zavodun sexləri hələ də fəaliyyətdədir.
- 1996-cı ildən zavod işləmir, ancaq zavod rəsmən bağlanmayıb. Sexləri icarəyə götürüb işlədirlər.
- Məsələ zavod deyil, yataqxanadır. Yataqxana sökülür...
- Söylü Güləliyevaya 95 nömrəli mənzili vermişik, 2003-cü ildə. Təsdiq edirəm ki, o mənzili mən vermişəm.
- Vermisiniz, ancaq həmin mənzilin pulunu Xəyal Vəliyev alıb.
- Elə deyil. Bir həftə də gözləyin. Bakı Şəhər İcra Hakimiyyətində Nizaməddin müəllimin yanında olmuşam, siyahını da təsdiq etmişəm ki, onlar hamısı mənim işçilərimdir. Mənzilləri də mən vermişəm. Ailə üzvlərinin sayı çox olanlar, kirayədə qalanların hamısının adını yazıb vermişəm. Söylü Güləliyeva da nəzərə alınacaq.
- Həm deyirsiniz ki, evi mən vermişəm, həm də deyirsiniz ki, nəzərə alınacaq...
- Qərar gözləyirik. Qərara görə qaçqınlara pul veriləcəkdi.
- Söylü xanım deyir ki, yataqxanadakı 95 nömrəli mənzilin orderi mənim adımadır, ancaq 95 nömrəli mənzilə görə Xəyal Vəliyevə 45 min manat pul veriblər.
- Qaçqın ayrıdır, qaçqının bizə dəxli yoxdur.
- 95 saylı mənzilə görə Xəyal Vəliyev 45 min manat pul alıb?
- Bu məsələ ilə əlaqədar sizə tam cavab verə bilməyəcəm. Verəcəyim cavab sizi qane etməyəcək. Gözləyin, hazırda BŞİH-ə gedirəm.
Oruc Səmədovun anlaşılmaz və bir-biri ilə uyğunlaşmayan cavablarından sonra 122 saylı MİS-in rəisi Asif Şərifovla əlaqə saxlayırıq.
122 saylı MİS-in rəisi Asif Şərifov deyir ki, Xəyal Vəliyev qaçqındır. Onlara 45 min manat pul verilib. Söylü Güləliyevaya pul verilməyib. Bu məsələdən xəbərimiz var. Biz onlara bildirdik ki, bu məsələ ilə bağlı Maliyə Nazirliyinə getsinlər. Çünki 1993-cü ildən o yataqxanada qaçqınlar məskunlaşıb. Sadəcə olaraq bina bizim balansımızdadır. Biz binanın sökülməyinə, sakinlərin çıxmağına nəzarət edirik. Deyildiyi kimi, mənim bu məsələdə əlim yoxdur.
Orderi olan şəxs pulsuz qalıb, kənar şəxs isə 45 min manat pul alıb. Aidiyyatı orqanlar isə məsələni bir-birinin üzərinə atmaqla məşğuldurlar.
Məsələni diqqətimizdə saxlayacağıq...
