\"Cəbhədəki biabırçı məğlubiyyətdən sonra bizi qorxutmaq istəyən ermənilər...\"

Qarabağ cəbhəsində keçən ay baş verən hadisələrdən sonra isteriyaya qapılan və panikaya düşən ermənilər və onların rəhbərləri verdikləri bəyanatlarla bütün dünyada özlərini biabır etdilər.

Cəbhədəki biabırçı məğlubiyyətdən sonra Azərbaycanı qorxutmaq üçün müxtəlif bəyanatlar verən erməni siyasətçiləri hədlərini aşaraq atom bombasına malik olduqlarını və lazım gələrsə Azərbaycana nüvə zərbələri endirəcəklərini bəyan etdilər.

Ermənilərin emosional çıxışlarından sonra bütün dünya mediası bu bəyanatları tirajlayaraq diqqəti öz aqressiyasında boğulan Ermənistana yönəltdi. Müxtəlif beynəlxalq təşkilatlar bu məsələyə aydınlıq gətirmək üçün hətta araşdırmaya belə başladıqlarını bəyan etdilər. Dünya mediasında olduğu kimi erməni siyasətçilərinin bu bəyanatları Azərbaycan mətbuatında, Azərbaycan mediasında da geniş müzakirə mövzusuna çevrildi.

Belə müzakirələrdən biri Region TV-də yayımlanan Mediaradar analitik proqramında aparılıb. Proqramın aparıcısı İsmayil Həsənov Ölkə.Az saytının baş redaktoru Məmməd Gülməmmədov və Oxu.Az saytının baş redaktoru Elvin Şirinli ilə bu məsələnin dərin analizini aparıb.

Proqramda hər iki media kapitanı Qarabağ cəbhəsində baş verən son hadisələri, bu məsələ ətrafında yaranmış beynəlxalq müzakirəni və Ermənistanın bütün beynəlxalq hüquq normalarını, qəbul edilmiş bütün konvensiyaları pozaraq Azərbaycana qarşı "çirkli bombalardan", radiaktiv materiallardan alınmış mərmilərdən, bütün dünyada istifadəsi qadağan edilmiş fosfor bombasından istifadə etməsi geniş müzakirə olunub. Hər iki media rəhbəri Ermənistanın bu barbar və vəhşi hərəkətinin dünya ictimaiyyətinin diqqətinə çatdırılmasının vacibliyini vurğulayaraq bunun üçün milli mediamızın səfərbər olmasını və Qarabağ həqiqətlərinin xarici auditoriyaya çatdırılma istiqamətində bir sıra addımlar atmağın əhəmiyyətini vurğulayıblar.

Ölkə.Az Region TV-də yayımlanan Mediaradar verilişinin videoyazısını sizə təqdim edir:

Ölkə.Az