\"Mənə imza verənlərə qarşı təzyiqlər edirlər\"

90 saylı Ağdaş Seçki Dairəsində təkrar keçiriləcək seçkilərə namizədliyini verən Ümid Partiyasının sədri İqbal Ağazadəyə və ona imza verənlərə qarşı təzyiqlər var.

Bununla bağlı Ümid Partiyasınn sədri İqbal Ağazadə Ölkə.Az-a danışıb:

"İmza götürən şəxslərə qarşı təzyiqlər var. Bəzilərinə teleqram vururlar, bəzilərindən isə izahat alırlar. Mülki prosesual məcəllənin tələblərinə görə imzanı geri götürmə anlayışı yoxdur. Seçki məcələsinin tələblərinə görə seçki komissiyasının üzvləri və ekspertlər imzaları yoxlayarkən imza vermiş şəxslərlə təmasa girməyə hüquqları yoxdur. Bu onların hüquqlarını pozmaqdır. Bu adamlar haradan bilir ki, onların imzaları yoxlanılır və yaxud onların imzaları haqqında şübhə var ki, onlara teleqram vururlar. Demək onlara qarşı təzyiqlər var. Bu təzyiqlər açıq aşkardır.

Hazırda nəticələri gözləyirik. 21 may qeydiyyat üçün son tarixdir. Qeydiyyata alınma tarixindən sonra mövqeyimizi tam şəkildə açıqlayacağıq. Əlimizdə olan faktları açıqlayacağıq. Əgər namizədliyim qeydə alınmasa əlimizdə olan faktlarla, sübutlarla məhkəməyə müraciət edəcəyik".

Qeyd edək ki, MSK-ya müraciət edən 90 saylı Ağdaş Seçki Dairəsindən Yeni Azərbaycan Partiyasından (YAP) deputatlığa namizədliyi irəli sürülmüş və deputatlığa namizədliyi qeydə alınmış İlqar Vəliyev və bu dairədə deputatlığa namizədliyi qeydə alınmış Qalib Qarayev 90 saylı Ağdaş Seçki Dairəsində seçkinin nəticələrinin ləğv edilməsini xahiş etdikdən sonra MSK 90 saylı Ağdaş Seçki Dairəsində seçkinin nəticələrinin ləğv edilməsi barədə qərar qəbul etmişdir və hazırda həmin dairədən deputatlığa yenidən seçkilər keçirilir.

Səxavət Məmməd
Ölkə.Az