Şəhid atası: “Oğlumun qanı yerdə qalmayacaq”

Bu gün Bakının Yasamal rayonunda Ermənistan və Azərbaycan qoşunlarının təmas xəttində baş vermiş son hərbi əməliyyatlar zamanı şəhid olan Xüsusi Təyinatlı Qüvvələrin polkovnik-leytenantı, Azərbaycanın Milli Qəhrəmanı Murad Mirzəyevin 40 mərasimi keçirilib.

Ölkə.Az-ın məlumatına görə, şəhid Murad Mirzəyevin atası Telman Mirzəyev və yaxınları, Azərbaycan və Türkdilli Xalqların Əməkdaşlıq Mərkəzinin (ATXƏM) sədri, Mətbuat Şurasının İdarə Heyətinin üzvü İlham İsmayılov, Azərbaycan Müdafiə Nazirliyinin nümayəndələri və bir sıra ictimaiyyət nümayəndələri iştirak ediblər.

Şəhid Murad Mirzəyevin atası Telman Mirzəyev oğlunun qəhrəmanlığından ata kimi böyük qürur keçirdiyini söyləyib.

T.Mirzəyev yaradılan şəraitə, diqqət və qayğıya görə Azərrbaycanın Ali Baş Komandanı – Prezident İlham Əliyevə və müdafiə naziri, general-polkovnik Zakir Həsənova təşəkkür edib:

“Bu gün təkcə mən qəhrəman oğul itirməmişəm. İndi Azərbaycanda Murad kimi yüzlərlə, minlərlə qəhrəman zabitlər var. Onların hamısı Ali Baş Komandanın bir əmrini gözləyir. Mən inanıram və tam əminəm ki, biz o torpaqları düşmən işğalından azad edəcəyik. Bu gün çox uzaqda deyil. Bir ata kimi söyləyirəm, oğlumun qanı yerdə qalmayacaq. Mən buna tam əminəm. Bu gün Muradın iki yadigar balası var, onlar da ataları kimi qoçaqdırlar. Muradın kiçik balası olan qız nəvəm evdə tez-tez atasını soruşur. Deyir ki, atamız Türkiyədədir, gələcək. Uşaqlar atalarının şəhid olduğunu hələ dərk etmirlər”.

Qeyd edək ki, bu gün şəhid Murad Mirzəyev torpağa tapşırıldığı İkinci Fəxri Xiyabanda da anılıb. Anım mərasimində Azərbaycanın Müdafiə Nazirliyinin yüksək rütbəli zabitləri və Murad Mirzəyevin hərbiçi yoldaşları da yaxından iştirak ediblər.

Elçin Əli
Ölkə.Az