Bakının qurumuş ağacları

Yaşıllıqlar bizim ağciyərlərimizdir. Hər birimiz bu ağciyərləri öz bədənimizdəki orqan kimi qorumalıyıq. Amma bəzən elə də olur ki, məhs qoruduğumuz yaşıllıq bizim həm də quruyub aşması ilə ölümümüzə də səbəb olur.

İllərlə boy atıb böyümüş ağacların çoxu deyəsən artıq ömrünü başa vurmaq üzrədir. Elə qurumuş ağaclar var ki, indi bir küləyə bənddir ki, kökündən qopsun. Bu isə çox vaxt faciə ilə nəticələnir. Elə müsahibim Məmməd dayı da həyətlərində yerləşən ağacın bir gün aşıb faciəyə səbəb olacağından qorxur.

Söhbət Nərimanov rayonu, Təbriz küçəsi, 226 ünvanindan gedir. Ərazidə olan ağacların ən azı 60-70 yaşı var. Quruyaraq hər an aşma təhlükəsilə ətrafdakıları üz-üzə qoyur. Maraqlısı isə odur ki, ağaclar qurusa da gəlib buna bir əlac tapan yoxdu. Elə söhbət etdiyim Məmməd dayı da həm bina sakinlərinə, həm də həyətdəki maşınlara ziyan dəyməsin deyə əvvəlcədən müvafiq qurumlar tərəfindən tədbir görülməsini istəyir. Bununla bağlı müraciət də edib. Amma hələ ki, heç bir faydası olmayıb.

“Bu ağac gərək kiminsə başına düşə sonra kəsilə? gərək kimsə, ölə ondan sonra gəlsinlər də. O qədər belə olub ki, sonda ölümlə nəticələnib. Mən yaşıllaşdırmaya müraciət etdim. Onlar da mənə dedilər ki, get nazirliyə müraciət et”, - deyə şikayətçi Məmməd Hüseynov qeyd edib.

Ekologiya və Təbii Sərvətlər Nazirliyindən bildirdilər ki, paytaxda olan və sakinlər üçün təhlükə yaradan yalnız qovaq ağacları Bakı Şəhər İcra Hakimiyyətinin yaşıllaşdırma idarəsi tərəfindən kəsilə bilər. Digər hallarda isə nazirlikdən rəy alınmalıdır. Yaşıllaşdırma idarəsindən isə bizə dedilər ki, əgər sakinin şikayəti varsa, o zaman o, nazirliyə müraciət etməlidir. Yalnız nazirliyin verdiyi rəydən sonra ağaclar kəsilə bilər. Belə olan halda isə sakin elə günü bü gün Ekologiya və Təbii Sərvətlər Nazirliyinə müraciət etməlidir. Əks halda nəticə ürəkaçan olmaya bilər. Qurumuş ağacların evlərin və maşınların üstünə aşması halları ilə az qarşılaşmamışıq. Hətta qurumuş ağacın kəsilməməsi keçən il iki insanın ana və balanın həyatına son qoydu. Odur ki, bu cür halların bir daha yaşanmaması üçün müvafiq qurumlar tezliklə iş başına keçsələr bu hər kəs üçün yaxşı olar. (ANS TV)

Ölkə.Az