Tələbələrin nəzərinə!

Universitetin ictimaiyyətlə əlaqələr şöbəsindən bildiriblər ki, ötən illərdən fərqli olaraq bu il ADİU-ya qəbul olunan tələbələr yeni tədris standartları üzrə təhsil alacaqlar. Bu standartlar tələbəyə dörd il ərzində iki ixtisasa yiyələnmək imkanı verir. Belə ki, ikinci kursu bitirən tələbə bu ali təhsil ocağının başqa fakültəsinə də qəbul olunub, ikinci ali təhsil ala bilər. Bu, tələbəyə əmək bazarında manevr etmək imkanı yaradacaq. Bununla bağlı universitetdə işçi qrup yaradılıb.

“SABAH” qruplarına yaradılan şərait barədə məlumat verən rektor bu tədris modelinin gələcəkdə bütün universitetə şamil olunacağını bildirib. Rektor universitetin ikinci tədris korpusunda aparılan texniki təchizat işlərindən danışaraq bildirib ki, yeni quraşdırılan videokonfrans zalı vasitəsilə artıq tələbələrin dünyanın istənilən nüfuzlu universitetləri ilə əlaqə saxlamaq, müəllim və tələbə heyəti ilə fikir mübadiləsi aparmaq imkanı var.

Universitet kitabxanasının təkmilləşdirilməsi haqqında məlumat verən rektor qeyd edib ki, oktyabr ayının sonunadək elektron kitabxana layihəsi tam hazırlanaraq tələbələrin ixtiyarına veriləcək. Universitetdə yaxın vaxtlarda elektron sənəd dövriyyəsinə keçiriləcək. Tələbələr arayışlarını dəhlizlərdə quraşdırılan xüsusi lövhələrdən sifariş edə biləcəklər. Bu, tələbələrin vaxta qənaət etməsinə kömək edəcək.

Rektor birinci kurs və “SABAH” qrupları tələbələrinin yazılı imtahan prosesi haqqında da ətraflı məlumat verib. Bildirib ki, tədris edilən mövzular üzrə 25 sual I-V tədris həftələri ərzində tələbələrə təqdim olunacaq. Suallar artıq universitetin saytında yerləşdirilib. İmtahan vərəqələri şifrələnəcək və qiymətləndirmə zamanı tələbənin adı və soyadı görünməyəcək. İmtahanın obyektivliyini təmin etmək məqsədilə nəticələrin ekspertlər tərəfindən selektiv qaydada yoxlanılması nəzərdə tutulub. Bütün imtahan prosesi rektorun şəxsi nəzarətində olacaq.

Görüşdə ADİU-da yeni qüvvəyə minən “Tələbələrin universitetdaxili intizam qaydaları”na da toxunan rektor vurğulayıb ki, universitetdə qaydalara nəzarət komissiyası yaradılacaq və qaydaları pozanlara qarşı müvafiq ölçü götürüləcək. Bu ildən ADİU-da idman dərslərinin ləğv olunduğunu bildirən rektor əlavə edib ki, universitetin bütün tədris korpusundakı idman zalları dərsdən sonra, bayram və istirahət günlərində tələbələrin ixtiyarındadır. Onlar asudə vaxtlarını bu zallarda keçirə bilərlər. “Biz istəyirik ki, tələbələrimiz savadlı və bacarıqlı olsunlar”,- deyən rektor, təhsilin keyfiyyətinin tələbələrin tələbləri əsasında formalaşdığını vurğulayıb. Bildirib ki, onlar öz təklif və iradları ilə bağlı universitetdə fəaliyyət göstərən “Qaynar xətt”ə müraciət edə bilərlər.

Sentyabrın 25-dən oktyabrın 10-dək ADİU-nun bütün tədris binalarında keçirilən görüşlərdə rektor tələbələri maraqlandıran sualları cavablandırıb. (AzərTAc)

Ölkə.Az