Prezidentlər iyunda görüşəcəklər

ATƏT-in Minsk qrupunun həmsədrləri İqor Popov, Ceyms Uorlik və Pyer Endryu və fəaliyyətdə olan sədrin şəxsi nümayəndəsi Anjey Kasprşikin mayın 31-də Brüsseldə Elmar Məmmədyarovla, iyun 2-də isə  Edvard Nalbandyanla görüşüblər.

Görüşdə tərəflər mayın 16-da Vyanada Azərbaycan və Ermənistan prezidentlərinin görüşü zamanı qəbul edilən qərarların icrasını müzakirə ediblər.

Ölkə.Az xəbər verir ki, nazirlər Dağlıq Qarabağ münaqişəsinin sülh yolu ilə nizamlanmasına sadiq olduqlarını bir daha təsdiq ediblər.

ATƏT-in Minsk qrupunun həmsədrləri Azərbaycan və Ermənistan xarici işlər nazirlərinə ATƏT-in fəaliyyətdə olan sədrinin şəxsi nümayəndəsinin mövcud ofisinin genişləndirilməsi və ATƏT-in istintaq mexanizminin yaradılması üzrə sənədlərin layihəsini təqdim ediblər.

Nazirlər hərtərəfli nizamlanma üzrə danışıqların bərpa edilməsi məqsədi ilə iyun ayında danışıqların növbəti raundunu keçirmək barədə prezidentlərin razılığını təsdiq ediblər.

Ölkə.Az