"Dövlət Sosial Müdafiə Mərkəzləri Asan Xidmətə verilsin"

Dövlət Sosial Müdafiə Mərkəzlərində rüşvətxorluq və süründürməçilik baş alıb gedir

Dövlət süd pulu üçün 90 manat pul ayırır, ancaq sənədlərin çoxluğu və yerlərdəki Dövlət Sosial Müdafiə Mərkəzləri əməkdaşlarının rüşvət tələb etməsi vətəndaşların bezərək dövlətin ayırdığı bu puldan imtina etməsinə gətirib çıxarır.

Bu cür hallarla bağlı son zamanlar şikayətlərin sayı çoxalıb.

Məsələ ilə bağlı millət vəkili Araz Əlizadə Ölkə.Az-a danışıb:

"Bu cür hallar olanda qorxmaq lazım deyil. Şikayət etmək lazımdır. Susub mətbəxtdə bu söhbətləri aparanda bunun heç bir əhəmiyyəti olmur.

Bu sahədə bu qədər rüşvətxorluq və süründürməçilik olduğu üçün prezidentdən xahiş etmək lazımdır ki, Dövlət Sosial Müdafiə Mərkəzlərini "Asan Xidmət"ə versin. "Asan Xidmət"də rüşvət yoxdur. "Asan Xidmət"də rüşvətin olmaması onu göstərir ki, rüşvətsiz işləmək mümkündür.

İdarələrin, mərkəzlərin rəhbərliyi şərait yaradır ki, rüşvət alsınlar. Əgər rəhbərlik rüşvət almasa aşağıdakı məmurlar rüşvət ala bilməz. Xahiş edirəm, vətəndaşlar bu məsələ ilə bağlı sizə şikayət məktubu ünvanlayanda həmin məktubları mənə də göndərin, bu məsələni mən də araşdırım".

Qeyd edək ki, Əmək və Əhalinin Sosial Müdafiəsi Nazirliyinin rəsmi saytında lazım olan sənədlər kimi bunlar göstərilib: valideynlərin şəxsiyyət vəsiqəsinin surəti, nigah haqqında şəhadətnamənin surəti, doğum haqqında şəhadətnamənin surəti və yaşayış yerindən arayış.

Səxavət Məmməd
Ölkə.Az