Azərbaycanda ilk buraxılış imtahanları keçiriləcək
Tələbə Qəbulu üzrə Dövlət Komissiyası (TQDK) iyunun 16-da Lənkəran, Astara, Masallı, Lerik, Yardımlı, Cəlilabad, Biləsuvar, Şirvan, Salyan, Neftçala, Hacıqabul, İmişli, Saatlı, Sabirabad, Quba, Şabran, Qusar, Xaçmaz, Xızı, Siyəzən şəhərlərində yerləşən orta ümumtəhsil müəssisələrinin buraxılış siniflərində təhsil alan (IX və XI siniflərdə) şagirdlər üçün mərkəzləşdirilmiş qaydada buraxılış imtahanları keçirəcək.
TQDK-dan Ölkə.Az-a verilən məlumata görə, həmin gün ümumilikdə 45 min 827 şagirdin imtahan verməsi nəzərdə tutulub.
Onlardan 25 min 530 nəfəri IX sinifin, 20 min 297 nəfəri isə XI sinifin şagirdləridir.
Komissiyadan bildirilib ki, bu imtahanlarda iştirak edəcək şagirdlər “İmtahana buraxılış vərəqəsi”ni internet vasitəsilə iyunun 2-dən etibarən çap edib götürə bilirlər.
IX sinif şagirdləri üçün imtahan saat 10:00-da, XI sinif şagirdləri üçün isə saat 15:00-da başlayacaq.
XI siniflərdə təhsil alan şagirdlərin buraxılış imtahanlarının keçirilməsi üçün 74 imtahan mərkəzi ayrılıb. İmtahanların idarə olunmasına ümumilikdə 370 imtahan rəhbəri, 4 min 172 nəzarətçi-müəllim ayrılıb.
