Dörd yaşlı Zamiqin həyatını xilas edə bilərsiniz

Babayevlər ailəsi dörd yaşlı övladları Zamiqə görə Ölkə.Az-a müraciət ediblər.

Zamiqin anası Gülşən Babayeva bildirir ki, oğlunun səhhətində üç yaşına qədər heç bir problem olmayıb.

2014-cü ilin dekabr ayının 10-dan isə səhhətində yaranmış problemə görə, uşaq 48 gün Qan İnstitutunun hematologiya şöbəsində yatıb. Balaca zamiqə Leykoz L1 (qan xərçəngi) diaqnozu qoyulub:

"Ondan sonra Şabrandakı evimizi, mal-heyvanımızı satıb müalicələrə xərclədik. Hazırda Zamiqin müalicəsinə görə Bakıda kirayədə yaşayırıq. Hər ay 150 manat kirayə haqqı ödəyirik. İki qızımı anam saxlayır. Vəziyyətimiz getdikcə daha da ağırlaşır. Əvvəl həyat yoldaşım tikintidə işləyirdi. Günə 30-35 manat qazanırdı, onun da bir hissəsini müalicə xərclərinə ödəyə bilirdik. İndi tikintidəki iş dayanıb deyə Şabranda bir qohumumuzun yanında fəhlə işləyir. Zamiqin həftəlik müalicəsinə təxminən 200-300 manat vəsait lazımdır. İmkanlı və mərhəmətli şəxslərdən artıq dərəcədə xahiş edirik ki, övladımızın həyatda qalması üçün kömək etsinlər".

G.Babayeva deyir ki, Zamiqin müalicəsi daha bir il eyni qaydada davam edəndən sonra yenidən müayinə olunmalıdır:

"Həkimi deyir ki, bir ildən sonra nəsə demək olar. Amma bu yerə qədər gəlib çıxıbsa, deməli, müalicə effekt verə bilər. Həftənin üç günü analizlər verilir. Artıq nə edəcəyimizi bilmirik, başımızı itirmişik".

İntiqam VALEHOĞLU
Ölkə.Az