Əbülfəz Elçibəyi belə andılar
Bu gün Azərbaycanın ikinci prezidenti, xalq hərəkatının liderlərindən biri olan Əbülfəz Elçibəyin doğum günüdür.
Yaşasaydı 78 yaşı olacaqdı Əbülfəz Elçibəyin. Hər il olduğu kimi bu il də onun Fəxri Xiyabandakı qəbri sevənlərinin axınına uğradı.
Əbülfəz bəyin anadan olmasının 78-ci ildönümündə onun qəbrini keçmiş cəbhə dostları ziyarət ediblər.
Qısa arayış:
Əbülfəz Qədirqulu oğlu Əliyev (Elçibəy) 24 iyun 1938-ci ildə Naxçıvan MR-nin Ordubad rayonunun Kələki kəndində anadan olub. 7 illik Unuskənd məktəbini bitirdikdən sonra Ordubad şəhər 1 saylı orta məktəbində təhsilini davam etdirib. 1957-ci ildə Bakı Dövlət Universitetinin şərqşünaslıq fakültəsinin ərəb filologiyası şöbəsinə daxil olub. Buranı bitirdikdən sonra (1962) təyinatla SSRİ Hidrolayihə İnstitutunun Bakı şöbəsində tərcüməçi işləyib.
8 iyun 1992-ci ildə Azərbaycan Respublikasında ilk dəfə demokratik yolla prezident seçilən Əbülfəz Elçibəy, ölkədə demokratiyanın bərqərar olması, Azərbaycanın tam suveren dövlətə çevrilməsi və xalqımızın rifahının yaxşılaşdırılması yolunda çox mühüm işlər görüb. Əbülfəz bəyin prezidentliyə başladığı ilk vaxtlarda dövlətin qarşısında duran təxirəsalınmaz vəzifələr Azərbaycanın dövlət müstəqilliyini tam gerçəkləşdirmək, Milli Ordu yaratmaq və müharibədəki məğlubiyyətlərin qarşısını almaq idi. Buna görə də ölkənin bütün imkanları Milli Ordu quruculuğuna səfərbər edildi. Ordu quruculuğu yalnız hərbi-strateji problem olmayıb, xeyli dərəcədə siyasi-psixoloji problem səviyyəsinə qaldırıldı.
Əbülfəz Elçibəyin prezidentliyi dövründə rus ordusu Azərbaycandan çıxarıldı.
2000-ci ildə ağır xəstəlikdən dünyasını dəyişən Əbülfəz Elçibəyin dəfn mərasimi həmin dövrlər Azərbaycana rəhbərlik edən Ulu öndər Heydər Əliyevin göstərişi ilə dövlət səviyyəsində təşkil olundu və mərhum eks-prezident Fəxri Xiyabanda dəfn edildi.
Fotolar: Nurlan GÜLMƏMMƏDOV
