Hər an döyüş əməliyyatları aktiv şəkildə başlaya bilər

Aprel döyüşlərinin üstündən 3 ay keçdi.

Bu müddət ərzində Azərbaycan və Ermənistan prezidentləri iki dəfə görüşsə də, ortaq məxrəcə gələ bilmədilər. Avqust ayında Azərbaycan və Ermənistan prezidentlərin Fransada növbəti görüşünün keçirilməsi gözlənilir.

Bu arada Azərbaycan Prezidenti Administrasiyası rəhbərinin müavini Novruz Məmmədov bildirib ki, çoxları Dağlıq Qarabağın dondurulmuş münaqişə olduğunu düşünür. Aprel ayının əvvəlində baş verən hadisələr göstərdi ki, bu münaqişə heç də dondurulmuş deyil və hər an alışıb-yana bilər.

Hərbi ekspert Üzeyir Cəfərov Dağlıq Qarabağ münaqişəsi ilə bağlı gedən proseslərə Ölkə.Az-a münasibət bildirib:

"Nə qədər ki, Dağlıq Qarabağ münaqişəsi öz həllini tapmayıb, döyüş əməliyyatları istənilən an başlaya bilər. Bəziləri belə bir fikir səsləndirir ki, Azərbaycan üzərinə hansısa öhdəlik götürüb. Azərbaycanın üzərinə götürdüyü öhdəlik BMT qətnamələrindən üstün öhdəlik deyil. BMT Təhlükəsizlik Şurasının məlum 4 qətnaməsi bu gün Azərbaycana tam mənada icazə verir ki, Azərbaycan istənilən an öz ərazi bütövlüyünü təmin olunması üçün hərəkətə keçsin.

Aprel hadisələrindən artıq 3 ay keçdi. 3 ay ərzində biz heç bir əməli addımın şahidi olmadıq. Sanki ATƏT-in Minsk qrupunun həmsədrləri məqam gözləyirdilər. Anji Kasperşik sevinə-sevinə ştatının artırılması haqqında bəyanat verir. Müşahidəçilərin sayı artırılacaq. Əgər bunlar 20 il ərzində heç nə etməyiblərsə, biz niyə onlara ümid olmalıyıq?

Avqust ayında prezidentlərin Fransada keçiriləcək görüşündə yenə də Ermənistan tərəfi məqsədi, məramı bilinməyən fikirlər səsləndirəcək. Onlar təklif edir ki, ATƏT pilotsuz uçan aparatlarla müşahidələr həyata keçirsin. Hansı özünə hörmət edən komandir icazə verər ki, başının üzərində hansısa aparat gəzsin, onun nə işlə məşğul olduğunu çəksin. Bunun nəyi hərbi oldu? Kalxoz bazarı deyil ki, kim nə istəyir, onu da etsin. Hətta kalxoz bazarının da qaydası, qanunu var idi.

Nə qədər ki, beynəlxalq qurumlar bu problemin həlli ilə bağlı addımlar atmayacaq, istənilən an vəziyyət aprel ayının əvvəlindəki kimi dəyişə bilər. Bunu heç kim Azərbaycana qadağan edə bilməz. Aprel hadisələri bir daha sübut etdi ki, bu dondurulmuş münaqişə deyil və hər an döyüş əməliyyatları aktiv şəkildə başlaya bilər".

Səxavət Məmməd
Ölkə.Az