Gen mühəndislərindən şok icad

ABŞ-ın Harvard Universitetinin gen mühəndisləri bir siçanın ürək hüceyrələrini silikon və qızılla birləşdirərək canlı robot yarada biliblər.

Ölkə.Az Türkiyə medaisına istinadən xəbər verir ki, professor Kit Parkerin rəhbərlik etdiyi bir qrup alimin yaratdığı manta balığına (dəniz şeytanı) bənzəyən robot cəmi 10 qram ağırlığa malikdir. Bədəni silikondan, skelet sistemi qızıl tellərdən hazırlanan robotun ən təəccüb doğuran xüsusiyyəti alt tərəfində 200 min ədəd canlı siçan hüceyrəsinin yerləşdirilməsidir.

Bu hüceyrələr müəyyən bir dalğada verilən işıq şülarına reaksiya verirlər. Beləliklə işıq şüalarının yardımı ilə yığılıb-açılan əzələləri uzaq məsafədən idarə etmək mümkün olur və robot üzməyə başlayır. Siçan hüceyrələri bu robotun motorunu əvəz edir.

Robot hələlik ancaq steril şəraitdə, laboratoriyada yaşaya bilir, çünki canlı ürək hüceyrələrinin müntəzəm olaraq bəslənməsi və infeksiyalardan qorunması lazımdır. Gen mühəndisləri bu icadın gələcəkdə süni ürək yaradılmasına və dənzialtı canlıların daha yaxından tədqiqinə xidmət edəcəyini düşünürlər.

İlhamə
Ölkə.Az