Azərbaycan cəbhəyanı xətdə sədd ucaldacaq

Tərtər rayonunun bir neçə kəndində yerli sakinlərin erməni atəşindən müdafiəsi məqsədi ilə daş-beton sədd ucaldılması planlaşdırılır.

Ölkə.Az xəbər verir ki, sədlər cəbhə xəttindən 3 km uzaqlıqda yerləşən Qaradağlı və Qapanlı kəndlərində inşa ediləcək. Sədlərin inşası Azərbaycan dövlət büdcəsinin vəsaiti hesabına həyata keçiriləcək.

Ermənilərin atəşi nəticəsində Tərtər rayonunda 162 ev ciddi ziyan görüb, onlardan bəziləri tamamən dağılıb. Qarabağ münaqişəsinin ərazisində Azərbaycanın dinc əhalisi arasında ölənlərin sayı 2016-cı ilin 2-28 aprel tarixində 6 nəfərdir, azyaşlı uşaqlar daxil olmaqla onlarla insan müxtəlif dərəcəli xəsarətlər alıblar.

Hazırda Azərbaycan Respublikası Ərazilərin Bərpası və Yenidən Qurulması üzrə Agentliyi səddin inşasının podratçısının müəyyən edilməsi üçün sorğu keçirir.

İlhamə
Ölkə.Az