“10 milyon xalqı barmağına dolayanlar, cavab verəcəksiniz”
Tarif Şurası elektrik enerjisinin qiymətini qaldırıb və deyib ki, 10 ildir baxmamışıq, bu vaxt ərzində çox şey dəyişib. Bir də deyib ki, qiymətin qalxması 18,000 işçinin əmək haqqını qaldırmağa kömək edəcək.
Bunu Ölkə.Az-a Azərbaycan Xalq Cəbhəsi Partiyasının sədri Razi Nurullayev Tarif Şurası elektrik enerjisinin qiymətini qaldırmasına münasibət bildirərkən deyib. Olduqca sərt danışan partiya sədri bu addımın xalqın onsuz da çətin olan güzaranını daha da ağırlaşdıracağını deyib:
“Diktatura qurmağa belə hazıram. Bu xalqı və milləti xilas etmək üçün”
“Mən isə sual edirəm. 20-25 ildir eyni vəzifəni daşıyan adamlar var, nazirlər var, şöbə rəhbərləri var, komitə sədrləri var. Onların da barəsində qərar vermək yetişməyibmi? Bəs, bu qərarı verənlərin özlərinin 10 illik sroku çıxmayıbmı? Sizin vicdanınız və ədalətiniz haradadır? Yox olub, itib, yoxsa qərar qəbul edəndə evdə qoymuşdunuz?
Ay biçarələr, ay dünyanı və 10 milyonluq xalqı barmağına dolayanlar. Bilin, verdiyiniz hər qərarın yaratdığı çətinliklər və məşəqqətlər sizin vicdanınıza yazılır. Ən azından Allahdan qorxun.
Başqa izah tapmadınız? Xalqı özünüzə güldürürsünüz. 18,000 insanın əmək haqqını on-on beş manat artıra bilərsiniz, amma siz 10 milyon vətəndaşı incitdiniz. Cavab verdiyiniz gün olacaq. Bəli, get-gedə qərara gəlməkdə davam edirəm ki, bu ölkəni xilas etmək üçün ən sərt diktatura qurmaq və cəmiyyəti iki il ərzində təmizləmək və sonra da üsulluca David Kameron kimi çıxıb getmək. Diktatura qurmağa belə hazıram. Bu xalqı və milləti xilas etmək üçün”.
