Heydər Əliyev prezident həmkarını necə xilas etmişdi?

Azərbaycanın sabiq Prezidenti Heydər Əliyevin yüksək siyasi bacarığı və diplomatiyası bu gün artıq heç kəsə sirr deyil. Heydər Əliyevin çox bacarıqlı, son dərəcə təcrübəli dövlət başçısı və yetkin siyasi xadim kimi çətin və mürəkkəb vəzifələrin öhdəsindən müvəffəqiyyətlə və böyük ustalıqla gəlmək bacarığı Qırğızıstan mediasında da böyük marağa səbəb olub.

“Ölkə.az” xəbər verir ki, bu günlərdə Qırğızıstanın Strateji Araşdırmalar və Təhlil Mərkəzi 1994-cü ildə İstanbulda Türkdilli ölkələrin dövlət başçılarının 2-ci zirvə görüşü zamanı prezident Heydər Əliyevin qırğızıstanlı həmkarı Əsgər Akayevi düşdüyü çətin vəziyyətdən necə xilas etməsini işıqlandırıb.

Mərkəz qeyd edib ki, əslində bu zirvə görüşü Azərbaycanda keçirilməli imiş:

“Ancaq həmin ərəfədə Bakı Müstəqil Dövlətlər Birliyi (MDB) ölkələrinin dövlət başçılarının zirvə görüşünə ev sahibliyi edirdi. Bu səbəbdən də Türkdilli ölkələrin dövlət başçılarının birinci görüşü kimi, ikinci görüşünə də Türkiyə ev sahibliyi etdi.

Bu görüşdə bütün Türkdilli dövlətlərin başçıları kimi, Qırğızıstan və Azərbaycan prezidentləri – Əsgər Akayev və Heydər Əliyev də iştirak edirdi. Zirvə görüşü zamanı prezident Əsgər Akayevin gərgin anlar yaşaması indi çoxlarının yaddaşında yaxşı qalır. O zamanı Əsgər Akayevi Türkiyəli jurnalistin “caynağından” Azərbaycan Prezidenti, rəhmətlik Heydər Əliyev xilas edir”.

Mərkəz həmin hadisəni də belə təsvir edir:

“İstanbula toplanan Türkdilli ölkələrin dövlət başçıları jurnalistlər üçün birgə mətbuat konfransı ilə çıxış edirlər. Brifinqdə Azərbaycandan Prezident Heydər Əliyev və onun millətlərarası münasibətlər üzrə müşaviri olmuş hazırda Azərbaycanın Qırğızıstandakı səfiri Hidayət Orucov da var idi. Türk jurnalistin sual verməsinə qədər hər şey Əsgər Akayevin ürəyincə olur. Ancaq mətbuat konfransı zamanı Türkiyəni təmsil edən bir jurnalistin Qırğızıstan prezidentinə verdiyi “Ermənistana sevginiz nədən qaynaqlanır? Bir türk respublikasının başçısı kimi qondarma “erməni soyqırımı” iddialarını qəbul etməkdən utanmırsınız?” sualları Əsgər Akayevi çətin duruma salır. Həmin an Əsgər Akayev o qədər gərgin anlar yaşayır ki, jurnalistə cavab verməyə də söz tapa bilmir. Bu zaman brifinq zalında digər ölkə başçıları ilə yanaşı əyləşən Azərbaycanın o dövrdəki prezidenti Heydər Əliyev türkiyəli jurnalistə özü cavab vermək istədiyini bildirir. Prezident Heydər Əliyevin jurnalistə cavabı isə olduqca diplomatik və məharətli olur. Heydər Əliyev jurnalistin sualına “Qırğızıstan xalqı belə bir iddianı heç zaman tanımaz. Bütün türk dövlətləri bir-birinin maraqlarını qorumalı və sıx əməkdaşlıqda olmalıdır”, - deyə cavab verir. Doğrudan da Əsgər Akayevin bu mövqeyi heç də Qırğızıstan xalqının mövqeyi ola bilməzdi”.

Xatırladaq ki, Əsgər Akayev Qırğızıstan prezidenti olduğu zaman 1997-ci il aprelin 21-24-də Ermənistana səfəri zamanı İrəvanda qondarma “erməni soyqırımı” abidəsini ziyarət edərək, üzərinə çələng qoyub. Daha sonra Ə.Akayev Ermənistan prezidenti ilə keçirdiyi birgə mətbuat konfransında “1915-ci ildə Türkiyədə ermənilərə qarşı soyqırımı törədilib”, - deyə fikir səsləndirib.

Mahir Hüseynzadə