“Azəravtoyol”: Cari ildə 230 kilometr uzunluğunda avtomobil yolu təmir olunub
“Azəravtoyol” ASC-də cari ilin 6 ayının yekunlarına və qarşıda duran vəzifələrin icrasına həsr olunan iclas keçirilib.
ASC-dən verilən məlumata görə, cəmiyyət sədri Saleh Məmmədov cari ilin 6 ayı ərzində prezident İlham Əliyev tərəfindən təsdiq olunan “Azərbaycan Respublikası regionlarının 2014-2018-ci illərdə sosial-iqtisadi inkişafı” və “2014-2016-cı illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqram”ları çərçivəsində yol infrastrukturun müasirləşdirilməsi, hərtərəfli inkişafı üçün çox böyük işlər görüldüyünü və hazırda da bu işlərin uğurla davam etdirildiyini bildirib.
“Kənd və qəsəbə yollarının yenidənqurulması da xüsusi əhəmiyyət kəsb edir. Xüsusi olaraq qeyd etmək yerinə düşər ki, kəndlərarası və qəsəbələrarası yolların təmiri və bərpası ilə bağlı işlərin yerinə yetirilməsi yol təmiri və tikintisi üzrə ixtisaslaşmış “Azəravtoyol” ASC-yə həvalə edilib. Bu isə yol inşaatçılarının üzərinə əlavə məsuliyyət qoyur”, - deyə S.Məmmədov qeyd edib.
S.Məmmədov vurğulayıb ki, prezident İlham Əliyev kəndlərarası avtomobil yollarının tikintisi ilə əlaqədar 15 sərəncam imzalayıb və həmin sərəncamlara əsasən 93 yaşayış məntəqəsinin 300 minə yaxın əhalisinin gediş-gəlişi xeyli rahatlaşacaq. Ümumilikdə isə 82 şəhər və rayon ərazisində 84 kəndlərarası avtomobil yolu layihəsinin tikintisi həyata keçirilməlidir: "Tikiləcək və yenidən qurulacaq kəndlərarası avtomobil yolunun ümumi uzunluğu - 2101,2 km təşkil edir. Bu layihələrin həyata keçirilməsi 1,6 milyon əhalinin yaşadığı 859 yaşayış məntəqəsini əhatə edəcək, onların rahat avtomobil yollarından istifadə edərək tədarük etdikləri kənd təsərrüfatı məhsullarını və meyvə-tərəvəzi sürətlə, qısa vaxt ərzində xarab olmadan istədikləri ünvanlara çatdırmağa imkan verəcək".
Qurum sədri bildirib ki, Bakı şəhəri və Bakı ətrafı qəsəbələr üzrə cari ildə 721 min nəfər əhalinin yaşadığı 49 yaşayış məntəqəsini əhatə edən ümumi uzunluğu 167,8 km təşkil edən 18 adda Bakı şəhər və qəsəbələrarası avtomobil yollarının yenidən qurulması və tikintisi nəzərdə tutulub. İclasda həmçinin bildirilib ki, bu ilin 6 ayı ərzində respublika ərazisində 230 km uzunluğunda ümumi istifadədə olan yeni avtomobil yolları, prospekt və küçələr yenidən qurulub, təmir olunub.
"4 ədəd yeni avtomobil körpüsü tikilib, 4-ü isə təmir edilib. Bakı şəhərində ümumi uzunluğu 31,9 km, yol örtüyünün sahəsi 331,9 min kvadratmetr olan 26 adda prospekt və küçə yenidən qurulub və təmir olunub. Göstərilən dövr ərzində Bakı şəhərinin 12 inzibati rayonu ərazisində 157,2 min kvadratmetrdən artıq sahədə cari təmiri işləri yerinə yetirilib”, - deyə S.Məmmədov qeyd edib.
