700 bal toplayan gənc
lk müsahibəm idi ki, bu qədər həyəcanlanırdım. Sanki, qarşımda 30 kitab olacaq və mən onlarla ünsiyyət quracağam. 30 kitabı mükəmməl bilmək hər kəsin işi deyil, axı, mənim qardaşım.
Müsahiblərim iki il müddətində telefon, kompüter, televizor və ən əsası bizim ayrıla bilmədiyimiz internet və sosial şəbəkələrdən ayrı düşən, gecəsinə, gündüzünə haram qatmış Nəzərəliyev qardaşlarıdır.
İlk həmsöhbətim I və IV qrup üzrə TQDK-nın keçirdiyi qəbul imtahanında 700 bal nəticə əldə edən Rəvan Nəzərəliyevdir.
- Rəvan bəy, nələr hiss edirsiniz?
- Sözün düzü, çox həyəcanlıyam, həm də çox xoşbəxtəm. Həm qardaşımın nəticəsi, həm də öz nəticəm üçün çox sevincliyəm.
- Yaşadığınız hissləri oxuculara necə çatdırardınız?
- Nəticənin elan olunmasını səbrsizliklə gözləyirdim. 700 bal nəticə əldə etdiyimi görəndə, özümə sarılmaq, alnımdan öpmək istədim. Qardaşıma sarıldım, sevincimizi bir bölüşdük.
- Hazırlıq və məktəbdə oxuduğunuz müddətdə nələrə üstünlük vermisiniz?
- Orta məktəb dərsliklərinə daha çox üstünlük verirdim. Çalışırdım ki, hər hansı boşluq yaranmasın. Vaxtı-vaxtında dərslərimi yerinə yetirib, həftəsonları da təkrara üstünlük verirdim.
- Belə çıxır ki, dərslərinizi vaxtında hazırlamaq, hazırlıq ərəfəsində sizə çox böyük dəstək olub.
- Əlbəttə, bütün abituriyentlərə səslənirəm. Məqsədi və oxumaq həvəsi olan hər bir abituriyent, hər bir şagird orta məktəb dərsliklərini vaxtında hazırlasın. Hazırlıq ərəfəsində nəticə daha da yüksək olacaq. Açığı bu, sudan quru çıxmaq kimi bir şeydir.
- Sınaq imtahanlarında 700 bal nəticə əldə etmişdinizmi?
- Bir sınaq imtahanında 700 bal toplamışdım.
- İlk sınaq imtahanında əldə etdiyiniz nəticə nə qədər olub?
- Səhv etmirəmsə, 550 bal idi.
- Ötən gecəni necə yatdınız?
- İnanın ki, yata bilmədik. Səhərə qədər şükür etmişik. Hərdən də sevincdən gülmüşük (gülürlər-red).
Növbəti müsahibim 685 bal nəticə əldə etmiş, Rəvan bəyin əkiz qardaşı Nurlan Nəzərəliyevdir.
- Nurlan bəy, siz nə hisslər keçirdirsiniz?
- Bu günün dünənkindən daha fərqli olduğunu hiss edirəm. Əvəzsizdir. Bu hissləri bütün abituriyentlərə arzu edirəm.
- Qardaşınınz Rəvan bəy 700 bal nəticə əldə edib, sizsə 685 bal. Paxıllığınız tutmur ki?
- Əlbəttə, yox. Qardaşımın nəticəsi mənim nəticəmdir. Biz xoşbəxtik ki, eyni anda iki uğura sevinirik (gülür-red).
- Hansı fənnlərin suallarında yanıldınız?
- Fizika və kimya fənnlərinin hərəsində bir sualda yanıldım. Çox çaşdırıcı sual idi. Əslində iki variant arasında qalmışdım. Öncə yazdıqlarım düz imiş. Sonra variantı dəyişdim. 123 suala tam dəqiq cavab verdim. 2 sual isə yanıltdı məni.
- Yuxunuzda 700 bal topladığınızı görmüşdünüzmü nə vaxtsa?
- Bəli, keçən il yay ərəfəsi idi.
- Səhər oyanandan bunun yuxu olduğunu bildikdən sonra ilk reaksiyanın nə oldu?
- İndiki kimi hədsiz sevincli idim. İlk reaksiyam isə "bilsəydim, oyanmazdım" oldu (gülür-red).
Növbəti müsahibim isə Nurlan və Rəvanın valideynləri Aidə xanım və Rauf bəydir. Qeyd edim ki, əslən Zəngəzur mahalının Qafan rayonundan olan Aidə xanım Nurlan və Rəvanın tədris aldığı Xırdalan rayon 5 saylı tam orta məktəbin riyaziyyat müəlliməsidir. Zəngilan rayonundan olan atası Rauf bəy isə avtomobil təmiri mərkəzlərindən birində çalışır.
- Aidə xanım, düşünürük ki, sizin sevinciniz üç qatdır. Bəs, siz bir valideyn olaraq hissinizi necə bölüşərdiniz?
- Çox doğru qeyd etdiniz, Şahin bəy, həm övladlarımın uğurlarına, həm də məktəbimizin uğuruna sevinirəm. Yaşadığım hissləri çox təəssüf ki, sözlə izah edə bilmirəm. Hər bir valideynə bu hissləri yaşamağı arzu edirəm.
- Rəvan və Nurlanın nənələri və babaları xəbəri eşitdiyi anda nələr hiss etdilər? Nələr yaşandı?
- İnanın ki, telefon vasitəsilə əlaqə saxlayıb, ağlaşırdıq. Hər kəsə sevinc göz yaşları qismət olsun, təki (gülür-red).
- Övladlarınıza nəyi söz vermisiniz? Hədiyyə olaraq nəzərdə tuturam.
- Mən çox xoşbəxt anayam ki, övladlarım nəyinsə qarşılığında yüksək nəticə əldə etməyə çalışmadılar. Ən əsası israfçı deyillər. Hətta hazırlığa belə piyada gedirdilər.
- Hazırlıq ərəfəsində övladlarınıza müdaxilə etdinizmi?
- Xeyr, heç bir müdaxilə etməmişik. Müəllim seçimini də özləri edib.
- Rauf bəy, siz nə düşünürsünüz?
- Sanki, göyün yeddinci qatındayam. Hər şey yuxu kimidir.
- Bir gün övladlarınızın gündəmi zəbt edəcəyini düşünmüşdünüzmü heç?
- Onlara güvənirdim. Yüksək nəticə əldə edəcklərinə ümidimiz çox idi. Sınaqda da nəticələri həmişə yüksək olurdu.
- Övladınızı hansı işdə görmək istəyərdiniz?
- Təbii ki, layiq olduqları işdə.
- Övladlarınızın hansı universitetdə təhsil almasını düşünürsünüz?
- Bakı Ali Neft Məktəbi və Qafqaz Universitetini düşünürük. Daha doğrusu, seçim qarşısında qalmışıq. Dövlət proqramı çərçivəsində xaricdə təhsil bölməsi ilə də maraqlanmaq istəyirik.
- Xoşbəxt ata... Xoşbəxtliyi ən əsas nədə görürsünüz?
- Bu xoşbəxtliyi belə izah etmək istəyirəm. Bizi həmişə atamıza görə tanıyırdılar. Məni isə övladlarıma görə tanıdılar. Bu əvəz edilməyəcək anlardır...
Qeyd edim ki, Nəzərəliyev qardaşları Xırdalan rayon 5 saylı orta məktəbin və Hədəf kurslarının məzunlarıdır. Böyük qardaşı Rəşad Nəzərəliyev isə 677 bal nəticə ilə Bakı Ali Neft Məktəbinin tələbəsidir.
