Xəstəsi əməliyyatda ölən ailə 81 yaşlı cərrahdan qəbir üçün 4500 manat istəyir
Bir neçə müddət əvvəl Sumqayıt şəhər Təcili Tibbi Yardım Xəstəxanasında 1981-ci il təvəllüdlü Veyisova Lumu Fazil Qızının, 81 yaşlı cərrah Cəfər Quliyev tərəfindən əməliyyat olunduqdan sonra vəfat etməsi haqda xəbər vermişdik. Məlumat olduqca böyük rezonans doğurmuş, sosial şəbəkələrdə, KİV-də müzakirələrə səbəb olmuşdur. Nəticədə, “Şöhrət” ordenli cərrah Cəfər Quliyev işindən azad edilmişdir.
Ölkə.Az xəbər verir ki, bu günlərdə Bizimyol.info-ya məsələ barədə maraqlı məlumat daxil olub. Belə ki, əməliyyatdan sonra vəfat edən Lumu Veyisovanın ailəsi cərrahdan şikayət etməmək üçün, ondan vəfat edən qızının qəbir daşının düzəldilməsini tələb edib. Tələblə razılaşan cərrah Veyisovlar ailəsinin Lumu Veyisovanın qəbir daşının 4500 manata düzəldirmək istədiklərini öyrəndikdə bundan imtina edir. O, bu qədər vəsaiti ödəmək üçün, imkanının olmadığını bildirib. Daha sonra Cəfər Quliyev əvvəlki işlədiyi xəstəxananın rəhbərliyinə və kollektivinə xəbər verərək, vəsaitə köməklik göstərilməsi üçün xahiş edib. Artıq problem öz həllini tapıb.
Məsələ ilə bağlı Bizimyol.info-ya açıqlama verən Cəfər Quliyev bu barədə danışmaq istəmədiyini, vəsaitin bir az şişirdildiyini bildirsə də, qismən razılaşıb.
“Belə şeylər barədə danışmaq düzgün deyil. Mən ömrümün 51 ilini səhiyyəyə, xalqa xidmətə həsr etmişəm. Yüzminlərlə belə xəstələr əməliyyat etmişəm və bundan da çətinləri olub. Bu qızın ölümünə səbəb onun bədəninin zəhərlənməsi idi. Çox gec gətirmişdilər. Qaldı ki, mən dünyada yeganə həkiməm ki, özüm özümü əməliyyat etmişəm. Bazar günü idi, xəstəxanada bir dənə də olsun cərrah yox idi. Qasığımda yırtıq var idi, pis gündə idim. Güzgünün qarşısında heç kim olmadan, özüm özümü əməliyyat etmişəm. 105 yaşlı xəstə əməliyat etmişəm. Bu gün də yaşayır. Belə adamı əl üstə saxlamaq lazımdı. Amma nə edək, mənim də taleyim belə yazılıb. Həyat davam edir. Pensiya alıram, dolanıram. Özəl klinikalardan hansısa məni işə dəvət etsə, gedib işləyəcəm. Sağlamam, vəziyyətim əladır”.
