İqtisad Universitetinin yüksək vəzifəli müəllimləri rüşvətə görə işdən qovuldu

 

Bu barədə “Ölkə.az”-a ADİU-dakı etibarlı mənbə məlumat verib.

 

Məlumata görə, bu ayın əvvəlində universitetin 9 nəfər müəlliminin tələbələrdən ümumilikdə 620 min manat rüşvət alması faktının üstü açılıb. Bunu bilən ADİU-nun rektoru Ədalət Muradov dərhal həmin müəllimləri işdən qovub.

 

İşdən çıxarılanlar arasında Universitetin ümumi işlər üzrə sabiq prorektoru Elçin Əliyev, Tədris-Metodiki Mərkəzinin “Texniki və texnoloji ixtisaslar” üzrə direktor müavini Nizami Musayev, Azərbaycan Dövlət İqtisad Universitetinin indiki prorektoru Şaiq Əsgərovun yaxınları da var.

 

İşdən çıxarılan bu şəxslərin kəsiri olan tələbələrdən 620 min manat rüşvət alması iddia olunur.

 

Hazırda sözügedən məsələ ilə əlaqədar rektorun tapşırığı ilə müvafiq araşdırma aparıldığı deyilir və yaxın vaxtlarda digər müəllimlərin də rüşvətə görə işdən çıxarılacağı gözlənilir.

 

Xəbərdə adı hallanmasa da Şaiq Əsgərovun yaxını olaraq bildirdiyimiz Abbasova Sveta (prorektorun qardaşı qızı) redaksiyamıza zəng edib İqtisad Universitetindən çıxdığını təsdiqləsə də, ancaq buna səbəb kimi analıq məzuniyyətini göstərib və hal hazırda yataq şəraitində xəstə olduğunu bildirib. Yuxarda qeyd edilən hadisə ilə əlaqəsi olmadığını əlavə edib.