Azərbaycanda bir gün ərzində 150 yeraltı təkan qeydə alınıb
“Hazırda Azərbaycan ərazisində seysmoloji vəziyyət fon səviyyəsindədir”.
Ölkə.Az xəbər verir ki, bunu "Report"-a açıqlamasında Azərbaycan Milli Elmlər Akademiyasının (AMEA) nəzdində Respublika Seysmoloji Xidmət Mərkəzini (RSXM) baş direktoru, AMEA-nın müxbir üzvü Qurban Yetirmişli deyib.
O xatırladıb ki, bir neçə gün öncə Şamaxı rayonunda Pirqulu yaxınlığında aktivlik olub:
“Həmin ərazidə hiss olunmayan çoxlu sayda zəif təkanlar baş verdi. Pirqulu yaxınlığında bir gün ərzində 150-yə kimi xırda təkanlar qeydə alınıb. Həmin sahədə enerji boşalması getdi. Hazırda təkanların sayı tamam azalıb. Ərazidə iyulun 24-ü, gün ərzində təkan qeydə alınmayıb. Sonrakı iki gündə isə 2-3 dənə xırda hiss olunmayan təkanlar olub”.
Q.Yetirmişli həmçinin qeyd edib ki, Azərbaycanın digər ərazilərində də hiss olunmayan təkanlar olur: “Amma bununla bağlı narahatçılığa ehtiyac yoxdur”.
